Chapter 106: ּ ֶָ֢.CH105

Ghar pahunch kar unho ne khud ko kamre mein band kar liya. Khabar aisi nahi thi ke khandan bhar mein na phailti. Sham mein sab behne wahin ikathi ho gayi thi. Peshimani ka asar har aik chehre par nazar aa raha tha.

"Aapi!" Hafsa qaleen par deewar ke saath hi baithi hui thi. Unke bacche pareshan ho rahe thay. "Yeh hum ne kya kar diya?" Unhone apna sar hathelio par gira liya tha.

Iman samne hi kursi par baithi thi. Uska sar jhuka hua tha. Aankhe mukammal tar thi. Nafisa ki wafat par sab se bura rawaiya uska tha, sab se zyada sakhti bhi usne dikhayi thi. aur usne ghusse se rote cheechne hue Jannat ko ammi ke qareeb bhi nahi aane diya tha.

Unhone maa ko kho diya tha. Woh gham us waqt dil cheer raha tha. Woh mehroomi us waqt bohot bhaari thi. Bhari duniya mein bilkul tanha ho jane ka tasavvur unke hwaas mafluj kar gaya tha. Woh sab behnein, narm khoo ehsaas karne wali apni hi sagi bahen ke liye phir aur behis ho gayi thi. Woh bhi Jannat ko har takleef ka zimmedar thahrane lag gayi thi. Har musibat aur pareshani ko uske wajood se jodne lag gayi thi.

Woh be-gunah thi. Jannat be-gunah thi. Hafsa rote hue dohra rahi thi. Haniya ne bohot dekha aur be-basi se unhein dekha. Kise ilm tha be-gunaahi yun sabit hogi aur Jannat kamal par se har ilzaam hat jayega.

"Aapi! Hum bhi to jin halat se guzre hain, woh" Mariya ke lab hile.

Koi hujat, daleel kuch to ho jiss se woh khud ko bari kar sake. Magar alfaz kam ho gaye. Jo talum Jannat kamal ke saath hua tha, woh kisi tor jisify nahi kiya ja sakta tha. Apni sagi behen ko lawaaris kar dena kisi tor bhi maslay ka hal nahi tha.

"Kisi aur se pehle hum Jannat ke jurm hai. Hum usay apni har takleef aur musibat ka zimmedar samajhtay rahey. Un logo ke darmiyan hansi khushi rehtay rahe, jin ki wajah se hamara yeh ghar jahannum ban gaya, tabah hua, jin ki wajah se ammi nafsiyati mareeza ban gayi."

Iman ne aahiste se sar uthakar unhein dekha.

"Tum sab chhoti thee. Main to chhoti nahi thi." Aankho mein haza liye, rote tadhapte maazi ke woh tamam manazir aankho mein lete, bohot dukh se lab bhainch kar boli,

"Mujhe Tai Ammi ki, badi chachi ki dadi ki, phapho ki, sab ki baatein, sab ke tanz, sab ki nafratein yaad hain. Woh sab ammi ko baate sunane, unki beboosi ka mazaak udane aati thi."

Nafeesa aur Kamal ki betiyan apni zindagi mein ek khala sa liye bilkul khamosh khadi thi Woh bohot karb se badi behen ko dekh rahi theen.

"Ammi chup chaap sunti theen aur chhup chhup kar roti thi. Baba ka rawaiya hamarey saath kaisa hota tha, Iman? " Ab ke usey mukhatib kiya. "Yaad nahi, hum kaise unse darte the, aur unke ghar aate ho kamare mein chhup jate the? Baat tak karne ki himmat nahi hoti thi. Jara jara si ghalti par maar par jani thi. Dadi poore ghar ka mahaul jahannum bana kar rakh deti theen. Har waqt un par tanaz karti theen. Betiyo ki line ka rakhhi hai. Abbu ko doosri shaadi ka mashwara kitni baar diya gaya."

Kamre mein sakoot chhaya hua tha. Woh dam sade usi waqt ke daire mein is talkh zindagi ko ek baar phir jeete hue dekh sakti thi.

"Har baar hum mein se kisi na kisi ki paidaish par log afsos karne aate thay. Amma kitne dino tak  la parwah rehti thi, bacchi ko uthakar dekhti tak nahi thi, sab kehte the hamari maa badnaseeb hai, manhoos hai, betiyo ko duniya me laa rahi hai.." wo ro rahi thi. "Magar koi khushi ka izhar nahi karta tha, ammi bhi nahi, har waqt ki tension me kaha yaad rehta tha ki khush rehna chahiye, jab zindagi azab hi hamari wajah se thi" sisak padhi, aankhe ragad dali.

"Baba ki pehle ek dukan thi phir dusri aa gayi, phir unhone store khol liya tha, unhone plot kharid liya tha ghar ke halat achhe ho rahe the, kisi ne nahi kaha ki betiya naseeb layi hai, izzat layi hai ba barkat hai is ghar ke liye, kisi ne nahi samjha , sabne hame auk azaab , auk bhojh aik karb bana diya aur ham ne phir ham sab ne mil kar Jannat ke saath yeh sab kiya. Ham bhool gaye hamari muzrim to Jannat kabhi thi hi nahi, jo muzrim the unke sath milkar hamne jannat ko akela kar diya.."

Iman ne kuch aziyat se aankhein meech li thi.

"Mujhe ammi ka rawaiya kabhi bhi normal nahi laga. Pehle woh hum se uljhti rehti thi, phir Husnain paida hua to theek ho gayi. Aur jab Husnain nahi raha to apni nafrato ka rukh Jannat ki taraf kar liya. Aur hum ne, hum chhe behno ne aise hone diya. Hum ne kabhi bhi ammi aur Jannat ke darmiyan faasla kam karne ki koshish nahi ki. Hum ne kabhi bhi ammi ko nahi samjhaya. Hum ne kabhi nana se nahi kaha ke woh Jannat ko wapas le aaye"

Unhone aankhein saaf ki.

"Ham ne usay apne se door kar diya. Apne sasural mein woh laawariso ki tarah rahi. Taya ki puri family ne usay jis tarah torture kiya, kya hum is baat se waqif nahi the? Kya hum mein se koi uski madad ko gaya? Kya hum mein se kisi ne uske liye stand lene ki koshish ki? Woh kitni baar yahan aayi, ammi se milne, ammi nahi mili. Hum to mil sakte the. Baat kar sakte the. Sahara de sakte the. Kya hum ne diya?"

Esi be-hissi par, khudgarzi par jo hum ne Jannat ke saath ki thi, us par jitni bhi malamat karain, wo kam thi. Hania ne kuch sharmindagi se sar jhuka liya.

"Uski shaadi ho gayi, hum ne ek baar bhi uski khabar nahi li. Usne ghar chhod diya tab bhi nahi. Kya itna patthar dil bhi hota hai Iman? Yeh humein kya ho gaya tha?"

Waqt aur halaat kuch is tarah ke ho gaye ke Jannat Kamal ko apni behan samajhna hi unhein kisi gunaah se kam nahi lagta tha. Uska mashkook kirdar sab ki zubaan par rehta tha. Uski zaat ke qisse barha chadha kar sunaye jaate the. Usne jaane kin halaat mein ghar chhoda, aur yehi phaila diya gaya ke wo kisi aur ke saath bhag gayi hai. Usse to khabar bhi nahi hogi ke kitne afsane the jo us par ghad diye gaye the. Kitne ilzaam the jo us par dhar diye gaye the. Aur uski apni saggi behnein ne sar jhuka liya tha.

"Humne bhi wahi kiya jo ammi karti rahi. Jo abba karti rahe. Jo poore khandaan ne kiya. Hum ne bhi Nana ki tarbiyat par sawal uthaya. Hum ne bhi sach maan liya."

Iman uth kar unke paas aa bethi thi. Yeh gham ke unhone Jannat ko aakhri waqt mein apni maa bhi milne nahi diya tha, yeh gham, yeh dukh ab dil ko cheer raha tha.

Zakhm gehre the jo unhone use diye. Makhsoos kar ke apni behen ko, bohot buri tarah se toda tha unhone. Dhatkar alag kiya tha. Bohot nafrat se taalluq khatam hua tha. Bhale se uski Zaman se shaadi ho ya Kamran se. Kisi ko koi farq nahi pada tha. Woh chacha ke ghar kis haal mein thi. Kisi ko zara ehsaas nahi hua tha. Jis se shaadi kar rahe the, wo satrah saal bara tha usse. Unhein kuch bhi nahi hua. Apni iddat ke dino mein, terrace ke veeran kamre mein jane kaise usne waqt guzara hoga. Woh sab to ikathi the, ek doosre ko sambhalne aur sahara dene ke liye bhi, us mushkil ghadi mein talaaq ki aziyat aur maa ki judai ka gham sehate hue, usne kaise sambhala tha khud ko? Sabko ghalti ka ehsaas shiddat se ho raha tha. Jannat kamal muzrim aur gunahgar hoti tab bhi usay alag nahi kiya jaa sakta tha. Uski zindagi ka faisla dusro ke hath me nahi diya jaa sakta tha.

Us raat unhon ne nam aankhon se baar baar sab ko dekha.

"Ammi ne apne aakhri waqt mein Jannat ka naam liya..."

Iman ne gehre gham aur sadme se unki taraf dekha...

"Woh baat nahi kar pa rahi thi lekin uska naam le rahi thi. Mujhe kuch samajh nahi aaya. Kaash main Jannat ko usi waqt hospital bula leti. Kaash!"

Khushk labo ko tar karte, aankhein ragar kar saaf ki.

"Jab se unka inteqal hua hai, uske baad se baar baar yeh baat kehna ke woh naam kyun le rahi thi. Kis liye le rahi thi. Kehna kya chaah rahi thi? Pehle to kabhi bhi nahi liya. Kabhi bhi nahi. To phir us waqt kyun? Yeh sawal mujhe bohot bechain karta raha aur main ignore karti rahi. Main ne kuch samjha hi nahi. Woh us waqt, woh Jannat se milna chahati thi. Woh aakhri lamhon mein us waqt Jannat ke paas rahi thi aur maine, maine apne gusse mein unki baat, unka ishaara nahi samjha."

"Sakina bata rahi thi ke woh Jannat ka haal poochti thi. Unhein sab pata tha uske saath is ghar mein kya ho raha tha. Woh unhone Jannat ko wapas ghar laane ka faisla kar liya tha..."

Darwaze par dastak de kar Khalah andar aayi to Hafsa foran se uth kar unke paas chali gayi. Haath tham liya.

"Please Khala! Mujhe uske paas le jaayein. Main usse milna chahti hoon."

"Meri uske shauhar se baat hui hai. Woh Quetta mein hain..." Unhone sanjeedagi se aagaah kiya.

"Kya aap mujhe wahan le ja sakti hain? Khala! Sirf aap hi humein usse milwa sakti hain."

"Main tumhare khalu se baat karti hoon." Unhon ne kandhay par narmi se haath rakh kar kaha. Tasalli di.

Iman bhi un ke saath hi jana chahti thi magar khala ne mana kar diya tha.

Woh nahi jaanti thi is tamam situation par Jannat ka rad-e-amal kya hone wala tha.

•••

Agle din mausam kuch behtar tha to woh usay usi aqbi darwaze se hi baagh mein le gaya tha. Yeh darwaza haal hi mein dobara banwaya gaya tha.

Faris ka haath tha aur woh behad ehtiyat se qadam utha rahi thi. Darakht, podhe, sabz o zar, aur thandi yakh basta fiza mein saans lete hue us ne door tak dekha tha.

"Janna" sannate me bachho ki awaaz goonji. Aasman se badal hat gaye. Kirne zameen par utaar aayi. Khamosh baagh mein aik dam se zindagi ke aasaar door tak phail gaye.

Woh baagh ke wusat mein us Jannat ko dekh sakte the jo khelti koodti hanste muskarate bhagti ja rahi thi. Us ke dost shor macha rahe thay aur peeche kahin Faris bhi tha. Aur uski aankhe thi aur halki ka halka sa tassur tha. cycle thi. Ghubare the aur darakhto par charhne ki mashqe ho rahi thi. Aur koi ro raha tha. Kisi ko hansi rahi thi. Woh raasta woh bohat si yaado mein jura hua tha. Aur jo phool the pagdandi par unhe todte, sunghte nanhu Janna apne Twiti bag mein daale ja rahi thi.

Samne hi woh ghar tha jo nana ka tha. Us ke aahani gate par taala laga hua tha. Goya waqt ko tham kar har aik yaad ko wahi kahi mehfooz kar diya gaya tha. Gate khol kar andar daakhil hotay Jannat ki nigahen kiariyon se markazi darwaze tak gayi.

Kitni khamoshi aur wiraani thi wahan, rounaqein to thi hi Nana ke dam se.

Woh Faris ke hamrah lawn mein khadi thi. Aur Nana ko podon ko pani deta hua dekh sakti thi. Woh deewar par rang kar rahe the aur woh frock mein unke aage peeche bhagti phir rahi thi. Woh seedhiyo par baithi thi. Aur kuch gaa rahi thi.

Woh chhupke se phal todh kar kha rahi thi. Muny ko bhi khila rahi thi. Darwaze se andar ghar mein sanbato ka raaj tha magar do sun sakti thi. Woh Nana ki awaaz aur apni khilkhilahat sun sakti thi. Badi badi aankho mein taaro ki chamak liye, har naye adventure ke liye mustaid apna Twiti bag pehne yahaan wahan har jagah pahuchne ki justuju karti hui. Woh kitchen mein dieting table par tang chalate hue khana kha rahi thi aur musalsal bol rahi thi aur Saleem ke sar mein dard ho raha tha aur Nana hanse ja rahe thay. Aur woh sawal kar rahi thi. Woh khidki mein baithi chidiya ka naam rakh rahi thi. Billi ko zabardasti ghar ka aik fard bana rahi thi.

Nana uski peshaani par bikhre balo ko barabar kaat rahe thay. Woh uski do poniya bana rahe thay. Uske kaanon mein tops pehna rahe the.

Wo Eid ke din gulabi frock pehne aik jeeti jaagti gudiya ke roop mein hasti khilkhilati apni Eidi gun rahi thi. Is baar usay Eidi Azam Shirazi se bhi mili thi. Apni siyah gaadi ko rok kar sheesha neeche kar ke. jis tarah pehle aik baar us se sani di thi to ab ki baar Eidi.

Wahan aik Faris tha. Dr. Mustafa se baate karta, khafgi dikhata hua, apna homework karta, shikwe mein ghar hua nazar aa raha tha. Woh ab usi table ke paas khada tha jahan baith kar usne pehli baar do judwa bachho ki tasveer mein dekhi thi.

" Tum ne Mummy se kaha tumhara naam Dr. Mustafa ke kisi dost ne rakha tha."

"Haan!" Woh kitchen ki khidki se bahar dekh rahi thi.

"Woh main tha, Tumhara naam main ne rakha tha."

Ek jhatke se palat kar usne Faris ko dekha. Be yaqini se...

" Tum ne rakha tha."

"Haan!" Woh deewar par lagi kisi tasveer ko dekh raha tha.

Aur woh samjhti rahi thi Nana ka koi dost tha. Nana hi ka ham umar.

"Woh tum the?" Paas aakar tasdeeq chaahi. Abhi tak sakte mein thi.

"Bilkul main tha, yahan baith kar rakha tha."

Jannat Kamal apne shohar se ek dam se bohot marub hui. Yaqeen abhi bhi nahi aarha tha.

"Shayad main woh pehla mard hoon jisne apni biwi ka naam khud rakha hai." Hans kar bola to uski biwi asbat mein sar ko janbish deti bari mutaasir nazar aayi. Phir kuch kehne ko munh khola hi tha ke Faris ne haath khada kiya.

"Ab yeh mat poochna yeh Jannat kaun thi jiske naam par main ne tumhara naam rakha. Woh koi nahi thi."

Rahdari se usne seerhiyon ki taraf dekhte hue dekha.

"Tumhari one class ki koi crush hogi."

Jannat ko yaqeen tha.

"Main us waqt two main tha."

"To yeh bhi batao woh kaun thi?"

"Meri kisi teacher ki beti paida hui thi. Meri kisi teacher ki beti paida huyi thi uska naam jannat tha ab bas ya kuch aur taftees baki hai?"

Nafi mein sar hila kar muskurahat dabati wo modid si ho gayi, aankho me sararat nzar aa rahi thi.

Seedhiya chadh kar woh uske saath upar uske kamre me gaya, bohut sa samaan Nana saath le gaye thay magar bohot kuch yahi reh gaya tha. Khidki ka nazara karte apne Nana ki hi kisi cheez ko haath mein le kar unhein yaad karte woh abdeeda hoti rahi. Unki baatein karti rahi.

Kitni awaaz mein thi wahan, kitna shor aur raunak woh usay sun raha tha aur yaad kar ke suna bhi raha tha. Jannat Kamal apne khilono ke naam khud rakhti thi. Uske paas ek naam tom tha aur Jerry nahi tha. Uski pas ek batakh thi aur chhota sa kachwa jo sir se chalta tha. Ab woh yaad kar ke bata raha tha. Woh kaisi thi. Woh kya karti phirti thi aur kaise baate kiya karti thi. Aur uske sawaal kitne ajeeb hotay thay. Woh pariyo ki baatein karti thi aur Ted poles ko machhliya samjhjti thi.

"Abhi kuch din pehle tak to kisi ki yaaddasht bohot kamzor thi..." Woh ab chidh rahi thi.

Usne phir uska ek aur kaarnama sunaya. Matar ka daana bistar ke neeche rakhne se woh shehzadi sabit nahi ho sakti thi.

"Aisa to bilkul bhi nahi hua tha..."

"Bilkul yehi hua tha..."

Pata nahi uski yaaddasht itni tez kyun thi? Jannat ko pehli baar tap chadhyi. Uski saari yaadain usay yaad thein.

"Saleem bohot tang tha tum se."

"Qasoor bhi uska hai."

"Woh bechara ab tajurbe ke liye gadde ikattha karta phirta."

"Ek bachhe ki khwahish ke liye, haan karna chahiye tha." Woh ab chhoti Jannat ka difa kar rahi thi.

Woh muskara kar reh gaya.

Aur uski biliya, Unhein yaad kar ke Jannat Kamal ko gehre dukh ne gher liya.

"Tumhari wajah se main biliyon ko ab haath bhi nahi laga sakti!"

"Kya maine mana kiya hai?" Apne coat ki jebo mein haath daale ulta sawaal kiya.

"Bewa bhi to nahi hona chahti." Be basi se kaha.

Aur woh hans diya tha.

•••

Siyah rang ki maxi numa frock pehene, jis ki peti aur gale par nageeno ka khoobsurat kaam hua tha. Cap sleeves kandho se neeche tak phailw hue, baalo ka joda bana rakha tha. Mascara, eye shadow ke saath usne surkh rang ki lip stick laga rakhi thi. Uski siraahi numa gardan par lambe ear rings jhool rahe the. Mrs. Shirazi ke humraah woh mehmaan khawateen ke saath lawn mein baithi thi. Khane ke baad wahan chai ka daur chal raha tha. Upar apne bedroom ki gallery mein khada Faris railing par kohniya jamaye use hi dekh raha tha.

Woh kisi ladki se baate kar rahi thi. Aur mobile par kuch dikhayi bhi rahi thi. Phir uski kisi baat par hans bhi rahi thi. Rayyan uske paas hi khada tha wo gubbare jesi gend ko bazu me bhare hue tha aur un bacho ko dekh raha tha jo door tak bhage ja rahe the. Kisi baat ka jawab de kar sar hilate uski nigah zard roshniyo mein nazar aati us aalishan gallery uth gayi, vas mein hi woh khada tha.

Gharelu se huliye mein, saadah trousers par dheele dheele se gale ka sweater mein malboos.

Chai ka mug zara sa upar kar ke saraha to woh muskura kar reh gayi.

Zindagi se bhar poor muskurahat uski aankho mein thehr gayi. Jo shawl usne le rakhi thi, usse durust karte apni jagah se uth gayi. Ahate mein gaadiya daakhil ho rahi thi. Khawateen ab jaane ko tayar thi. Jannat unse mil rahi thi. Woh doosri ladki ki kisi baat par muskara bhi rahi thi. Kuch hi dair baad woh kamre ka darwaza khol rahi thi aur woh gallery ki slides band karta andar aa gaya tha. Khaali table par rakh diya. Jannat ne shaala utaar kar kursi par daal di.

"Kya koi humein miss kar raha tha?"

"Bilkul bhi nahi..."

"Lekin koi gallery se taar to raha tha."

"Ab insaan khuli fiza mein saans bhi na le..."

Woh hans di.

"Yeh insaan kuch zyada ajeeb nahi hai?" Aankhein roshan thi. Lehje mein shararat.

Faris ke narm haatho ki giraft uske kandho par pathar gayi.

"Apni baat kar rahi ho?"

"Tumhara zikar kar rahi hoon..."

"Mujhe nahi pata tha meri biwi aik alien hai..."

Bohat acha aur khushgawar sa mood bas aik lamhe mein ghaarat ho gaya tha. Lab bheench gayay bhanwe sukad gayi.

"Tum pehle zyada acchi lag rahi thi..."

"Tum mujhe ab zyada bure lag rahe ho..."

Woh hans parha.

Apna necklace utaarne ko haath uthaye to Faris ne hook kholne mein madad kar di. Khafa khafa si apne libas ka ghera sambhalay dressing table par ja baithi. Woh uske peeche khada tha. Labo par muskurahat thi,

"Itni si baat par itna ghussa?"

"Mujhse baat nahi karo please..."

"Zaahir hai aliens ko insaanon ki baatein kahan samajh mein aayengi?"

Bhunna kar rukh badla, larne ko munh kholne hi wali thi ke Faris ka mobile baj uthha.

"Aik second!" Haath uthakar usay rok diya.

Goya woh bhi is jang ke liye mukammal tayar tha bas call zaroori thi. Jannat Kamal lab bheench kar rukh badal gayi. Phone par doosri taraf Agha Ali tha. Uski baat sunte Faris ne be-ikhtiyar Jannat ki taraf dekha. Earrings utarte hue usne bhi aaine mein Faris ko hi dekha. Aankho hi aankho mein ishratan sawal kiya. Ke kya hua? Uske ta'ssurat kuch the thi aise ke na chahte hue bhi woh alert ho gayi.

"Theek hai, aane do unhein,.." sanjeedgi se baat karta woh usi waqt kamre se chala gaya.

Jannat ne joda khol kar dheeli si braids banayi. Munh dhoya aur kapde badal kar bahar aa gayi. Mulazima kar bhi tak upar nahi laayi thi. Woh lift se neeche floor par aa gayi. Aahista se qadam uthate aage barhi. Kuch jani pehchani awaaz mein samaat se takrayi to chonk gayi. Khadshaat ki zadd mein uska dil zor se dhadakne laga.

Dahine taraf lounge ka manzar numaya hua to uski raftaar aik dam se sust padi. Jameela Dawood wahan thi. Saira Khala unke shohar aur uski Hafsa Aapi bhi.

Jannat ka wajood patthar ho gaya.

---- •♡• ----