Chapter 89: ּ ֶָ֢.CH88

•••

Adina zubair se uski pehli mulaqat us company mein hi hui thi jisme woh job kar raha tha. Uske dad finance manager the. Woh unke office mein unhein kuch zaroori files dene aaya tha jahan woh pehle se mojood thi.

Mobile screen par scrolling karte uski nigah jaha uthi wahan thehr gayi.

Siyah three-piece suit mein malbous woh ajlaat mein qadam uthakar andar daakhil hota apni jagah ruk gaya tha. Finance manager Sohail sahab kahin nahi the..

Usay bohat fursat aur gaur se dekhte woh apni jagah se uth khadi hui thi.

"Umm.. director ne bulaya tha to woh wahi gaye hai" Usne guftagu mein pehl khud hi kar di. Siyah jeans par surkh top pehene, baalo ko khula chhode woh nazakat se maiz ke saath lag kar khadi ho gayi.

"Aap ruk kar intezaar kar sakte hain?"

Adina ki baat sunte, khafeef sa sar hila kar woh wahan ruk gaya.

"By the way, I'm Aleena zubair.." taaruf karwate hue, usne office table ki taraf gardan ko jhukaaya. "Unki beti!"

Woh is company mein ghaliban naya tha tabhi woh us se na waqif tha. Magar hairat is baat ki thi ke woh usay dekh nahi raha tha. Uski zindagi mein aisa pehli dafa ho raha tha ke koi aik nazar daal kar usay dobara nahi dekh raha tha. Usne guftagu mein pehl nahi ki thi. Koi uske husn ka aseer nahi hua tha. Aamuman log khud hi us se mukhatib hone ki koshish karte thay. Uske aage peechay phirte thay.

Usay naaz uthwane ki aadat thi. Magar yahan mamla ulat par gaya tha. Zindagi mein pehli dafa kisi ke sehr angez roop aur shakhsiyat ke asar mein aate hi pehl usne kar di thi. Jawaab mein rad-e-amal waisa nahi tha. Jaisa hona chahiye tha.

Ek Tarruf iska tha dusra taruf uska hona chahiye tha. Magar wo kalai mod kar waqt dekhta glass door ke samne khada reh gaya tha. Aqb me staff kam karta nazar aa raha tha. Kuch hi dair me sohail sahab aa gaye the. Woh file liye unke office table me aa gaya tha. Unhone apni kursi sambhal li thi, taham wo jhuk kar kuch documents par sign karte huye, khalish British lehje me unhe tafsil se kuch batane laga tha. Wo sunte huye sar hila rahe the, mutasir ho kar sarha bhi rahe the, uski koshish aur uski strategies ko bhi. Dono baat kar rahe the aur Adina zubair tang par tang jamaye uska jaiza le rahi thi. Woh usey achha laga tha,

"kaun hai? Koi naya employee?" Woh ja chuka to usne apne dad se poocha Woh Pakistan se ab ayi thi, tabbhi nahi jaanti thi. Unhon ne mukhtasir uske baare mein bataya. Woh uski salahiyat aur qabilat ki bhi tareef kar rahe thay. Apne dad ke office se nikalne ke baad, woh ruk kar samne dekhne lagi.

Shirt ki aasteen kehniyon tak fold kiye, woh maiz par hathiyan jamaye staff se baat kar raha tha. Agle kai dino tak woh be-nayaz sa chehra, woh aankhein, woh mazboot aur tawana saraapa uske hawaas par chaaya raha. Woh apne dad ke office mein kabhi kabhaar hi jaati thi, ab roz jaane lagi thi. Nigahen Faris Wajdan ki talash mein rehti thi.

Woh apne office mein baitha hua call sunte, files dekhte, laptop screen par nigahen jamaye tezi se type karte. Inteha ka musroof nazar aata... woh glass wall ke us paar deewar se lag kar usay dekhte rehti.

"Koi itna pyara kaise ho sakta hai? Itna perfect? Itna mukammal? Aur phir koi use is tarah nazar andaaz kaise kar sakta hai?"

Jitni baar woh wahan aayi, usne har baar usse baat karne ki koshish ki. Aur har baar uski sakht nazron ki hi zadd mein aayi. No left ka sign wazeh tha. Uska rawaiya sirf uske saath hi nahi, company ke female staff ke saath bhi aisa hi tha. Uske hadh darja lehje se woh phir bhi dilbardasht na hui na hi usne company mein aana tarb kiya.

Apne jazbaat aur ehsaasat ko samajhte, uspar aik dum se inkishaaf hua ke woh usse mohabbat karne lagi hai. Jo chehra din raat aankho mein rahe, aur jiske aik jhalak dekhne ko hi dil be-qarar rahe, usay pane ki khwahish sar uthati hai. Uske andar bhi woh khwahish uthne lagi thi. Woh is ajnabiyat ko mitana chahti thi. Woh Faris Wajdan ke dil mein jagah banana chahti thi.

Uska sukoon khatam hone laga. Neend gayab hone lagi. Usne khaas soch vichar ke baad weekend par ghar mein dinner ka plan rakh liya. Uske dad aksar apne Pakistani colleagues ko dinner par daawat dete rehte thay. Woh jaanti thi ke is baar Faris bhi un mein shamil hone wala tha.

Us raat woh khaas tor par tayar hui. Usne safed rang ki skirt par halke jamuni rang ka sweater pehna. Sonahri baalon ko unchi pony mein muqeed kiya. Gol gol ear rings pehne, light sa makeup kiya.

Door bell bajte hi usne foran se darwaza khola. Neelago jeans par siyah shirt zeeb tan kiye woh bilkul aam se chele mein khada uski dharkanain muntasar kar gaya. Uske baal oopar ko utke hue thay. Nafees frame-less glasses se jhanki aankhon mein hanuz ajnabiyat ki thehri hui thi.

Usne muskurate hue usay andar aane ka rasta diya. Woh mehmaan ban kar uske ghar mein aaya tha. Badakhlaqi ka muzahira na kar saka. Na hi kisi qisam ka sakht rawaiya dikha saka. Woh baat baat par usse mukhatib hone ki koshish kar rahi thi aur usay jawab dena par raha tha.

Us raat woh deegar mehmaanon ki mojudgi mein, sohail sahab ke hote hue, unke hi ghar mein unki beti ko nazar aata raha.

Is raat woh deegar mehmaano ki mojudgi mein Sohail sahab ke hote hue, unke hi ghar mein unki beti ko nazar andaaz nahi kar saka tha.

Is raat pehli baar Adina Zubair ko usay qareeb se dekhne aur jaanchne ka moka mila. Woh kam-go, khaamosh-tabiyat aur sanjeeda sa no Jawan tha. Uski shakhsiyat mein laa-abali pan nahi tha. Woh apni umar se zyada mature nazar aata tha. Baate mukhtasar magar jaameya mufhoom liye hui hoti thi. Chahe siyasat ho ya karobari behas, uski guftagu usay achi lagi thi. Apne dad ke mobile se uska number hasil karke woh usay calls aur messages karne lagi. Kabhi raat ke waqt, kabhi ice-timing ke dauran, kabhi woh ussi park mein aajati jahan woh aksar jogging karta tha. Us gym mein bhi jahan woh workout ke liye jata tha. Woh uske saath rabte mein reh kar, usse baat kar ke, uske saath mulaqat kar ke, uske liye laazim or mulzoom hona chahti thi.

Saari justujo lagan uski taraf se thi. Woh aik ibtida se chaahne lagi thi. Magar Faris Wajdan ka rawaiya aik sath tha, mohtat, reserve sa, khamosh aur formality puri karta hua, jo uske dad ki wajah se uske saath ehtiyaat se barhta gaya tha. Uske sard rawaiye se woh aajiz aane lagi thi.

"Kya usay mohabbat ka aitraaf kar lena chahiye?" Thak haar kar usne socha tha. Woh mohabbat ka aitraaf sunne ki aadat rakhti thi. Khud se aitraaf usne bhi nahi kiya tha. Koi usay apne qabil lagta hi nahi tha. Koi usay apne pehlu mein jachta hua mehsoos hota hi nahi tha. Faris Wajdan woh waheed insaan tha, jiska aik jhalak uski dharkano ko mushtarka kar deti thi. Jiski awaaz sunne ko woh be-taab rehti thi, jiska saath ab usay umar bhar ke liye chahiye tha.

Rasta aik hi tha, aur hal bhi aik woh bhi aik din woh usse milay, aur apne jazbaat ka izhaar kar de. Usne weekend par zaroori baat ke liye usay restaurant mein bulaya aur uske samnay apni mohabbat ka izhaar kar diya. Agle ke kai lamhon tak aankhon mein aik nahi kabhi ka asar liye woh confused hokar usay dekhte raha.

"Tum ne mujhe yahan yeh batane ke liye bulaya hai?" Adina Zubair ko aik dum se apna wajood khak hota hua mehsoos hua. Ana uski bhi thi, izzat-e-nafs bhi. Woh is shakhs ke liye jitna khud ko jhuka rahi thi, woh utna hi uski pahunch se door hota ja raha tha.

"Haan!" Uske lab hile. "Main tum se mohabbat karne lagi hoon." Der se woh bolti hui.

"There's no such things called love." (Mohabbat naam ki koi cheez nahi)

Adina dam sade kar usay dekh kar reh gayi.

"Mere dil mein to hai, tumhare liye." Himmat jod kar bolti, Warna uske parkhichhe udane mein usne koi kasr nahi chhodi thi. Woh us waqt table chhod kar uth gaya tha. Woh ujalat mein qadam uthati tezi se uske peeche aayi thi.

Restaurant ke bahar logon ke hamaam mein kahin woh usay rokne mein kamyab ho gayi thi.

"Mohabbat karti hoon main tum se, apni saari zindagi tumhare saath guzarna chahti hoon Faris!" Aankhon mein nami liye usne buland awaaz mein kaha tha. Apna baazu uski gript se chharta, woh use hairaan ho kar dekhte reh gaya. Uski neeli blue aankhein mukammal tor par bhar gayi thi. Uska chehra bhi surkh parhne laga tha. Woh jaise bas ab ro dene ko thi.

"Tum is tarah meri mohabbat ko nahi thukra sakte." Usne keh diya.

"Magar mere dil mein aisa kuch nahi hai!"

Adina Zubair ke andar aik dum se aziyat ne sar uthaya tha.

"koi masla nahi hai! Mere liye sirf yeh ahem hai ke main tumhein chahti hoon." Har woh baat jo Faris Wajdan ko kehni chahiye thi, ab woh keh rahi thi. Har woh ibtida jo aik mard se honi chahiye thi, woh khud kar rahi thi. Faris Wajdan jaise ab uski zid ho chuka tha. Usay taskheer karna hi tha. Uske saath sirf wohi bach sakta tha. Uska intikhab sirf wohi ho sakta tha.

Woh chand lamho tak usay dekhta raha. Phir maazrat kar ke wahan se chala gaya. Chand dino ke baad woh usay park mein mili. Woh jogging track se utar kar sabzay par baitha tha. Aur do wein aagayi thi. Usne aik baar phir wohi baat shuru kar di.

"Tum aik aise insaan ke saath kyun rehna chahogi jo mohabbat par yaqeen hi nahi rakhta?" Woh ab samne kahin dekh raha tha.

"Dil ka mamla hai, kya keh sakti hoon." Labo par muskurahat liye aahista se boli. Nigahe jogging track par aik jode par padi, Barabar qadam uthate, mehnat bhagte hue.

"Main bhi zindagi ke track par tumhare saath isi tarah chalna chahti hoon!"

"Mere saath chalo gi toh khaak ho jaogi." Usne pani ki bottle labo se lagali.

"Tumhare saath khaak hona bhi qubool hai." Uske lehze mein musarat ka rang jhalak raha tha. "Main nahi chaahunga koi meri wajah se khaak ho." Jawab de kar uth gaya.

Uska woh jawab usay kai dino ke baad ja kar samajh mein aaya. Woh kitni pagal hai. Woh yeh bhi toh keh sakti thi ke woh usay khaak nahi hone degi. Usay khud par ghussa aaya. Faris Wajdan par bhi usne inkaar bhi kisi maharat se kiya tha. Woh usay ek dam sebahut mushkil aur pechida sa lagne laga.

"Shadi toh tum ne waise bhi karni hi hai. Toh phir mujh se kyun nahi?" Woh uske office aayi hui thi. Bina ijazat andar aa kar baray dhadle se keh diya tha.

Laptop screen se nazar uthaye woh usay dekhta raha.

"Mera shadi ka aglay das pandrah saal tak koi irada nahi!" Usne keh diya. Woh hansi.

"Yani, iske baad irada ban sakta hai?"

"Toh main intezaar kar leti hoon." Kursi khainch kar baith gayi.

"Das pandrah saalo tak?"

"Bilkul. Tum ne meri mohabbat ko kya mazaq samajh rakha hai?"

Woh dheere se muskuraya.

Aur Adina Zubair ki dharkane tham gayi. Woh kam hi muskurata tha. Aur jab muskurata tha toh..

"main yaqeen se keh sakti hoon tumhein koi larki mere jaisa chaah hi nahi sakti!"

"Tumhein aisa kyun lagta hai mujhe kisi ki mohabbat ki chaahat hai?"

Woh chup hui thi. Aur woh call aane par file haath mein liye uth kar chala gaya tha. Tasalsul ke saath aur kuch dinon ka waqfa kar ke woh park mein zaroor milne aajati thi. Usay uski office aur gym ki timing, uske aane jaane ke waqt ka pata hota tha.

"Mere dad rishte dekh rahe hain. Kaafi well off families ke rishts hain."

"That's good news!" Dheere se keh kar qadam uthata raha.

"Lekin main ne sab ko inkaar kar diya."

"Kis liye?"

"Shadi toh mujhe wahan karni hai, jahan mera dil chahega..."

"Jahan tumhara dil chahe, wahan tumhare dad na maane toh?"

"Mere dad kam az kam is mamle mein mujh par dabao nahi daalenge. Woh azad khayaal insaan hain."

Usne keh diya.

Woh chup raha. Haftay ki raat woh usay dobara park mein mili.

"Toh phir tum ne kya socha hai? Kis bare mein?"

"Mere bare mein?"

"Kuch bhi nahi!" Usay bohot andar tak dukh pohanch gaya. Woh aik be-intaaha haseen larki, Faris Wajdan ke samne apne aap ko khaak hota mehsoos karti thi.

"Kya mujh mein koi aik bhi aisi khoobi nahi jo iski bina par tum mujhe apna sakho?" Usne sawal kar ke us par khamoshi taari kar di. Woh jeebon mein haath daale khada raha.

"Main apni aane wali zindagi ka tasawwur karti hoon toh tumhare bagair mujhe sab andhera lagta hai, baar baar tumhare peechay aati hoon aur tum..." Uski awaaz lamhay bhar ke liye bhar gayi thi.

"Adina," usne kuch kehna chaha.

"Mujh se meri friends kehati hain main khoobsurti ki bina par kuch bhi haasil kar sakti hoon. Lekin yahan woh ghalat hain. Baaz mamlaat toh sirf dil ke hote hain. Baatan tak zahiri husn koi asar nahi karta."

Hamesha wohi uth kar chala jata tha. Aaj woh chali gayi thi. Woh kuch dair tak peech par baitha raha. Ghar pohanch kar usne Jameela Dawood ko call ki, woh jis tarah unse apni har baat share karta tha, yeh bhi share kar di.

Pehle toh woh khush hui ke zindagi mein pehli baar woh unse kisi larki ki baat kar raha tha.

"Larki kaisi hai?" Unhone poocha toh kuch lamhon tak woh apne andar hi apne dil se is sawal ka jawab dhoondhta raha. Magar andar aik maheeb sa sunaata tha.

"Theek hai. Achhi hai." Mukhtasar jawab deta sofa par baith gaya.

"Sirf theek hai? Sirf achhi hai?" Unhone kareeda.

"Main sirf yeh keh sakta hoon."

Woh aik dum se muskurayi.

"Pasand karte ho usay?"

"Mushkil sawal hai." Woh is waqt khud ko samajhne se qaasir tha, is liye jhoot nahi bol sakta tha.

"Tum ne inkaar nahi kiya, so yeh aik khush aind baat hai." Woh mehsoos hui.

"Kya woh pasand karti hai?"

"Kehti toh yahi hain."

Mrs. Shirazi  ko aik dam se khushgoari herat ne ghera tha. Faris itni asani se kisi ko apne qareeb nahi aane deta tha. Baath agar aitraaf tak pohanch chuki thi toh yaqinan dono mein baat cheet hui hogi. Aik dosray ko samajhne ka moka bhi mila hoga.

"Aur tumhara kya khayal hai?"

"Mujhe lagta hai main iske liye tayar nahi hoon."

"Par kyun?" Woh hairan hui.

"Rishtey mohabbat se bante hain, I don't think towards her." (Main uski taraf kuch bhi mehsoos nahi karta).

"Aur kis ne kaha ek achi aur khushgawar zindagi ke liye sirf mohabbat zaroori hai?" Unhone narmi se poocha, toh woh kuch keh na saka.

"Ek dosre ko samajhna, ek dosray ka ehtram karna, izzat dena, zarurato ka khayal rakhna, khushi aur gham mein saath dena. Is ke liye wada aur ehsaas zimmedari chahiye hoti hai. Nikah kya hota hai Faris? Ek moahida ke aap yeh sab karenge, kya tum yeh sab nahi kar sakte? Aur yeh mohabbat, yeh rahm se, unsiyat se, khayal rakhne se hi toh dil mein utarti hai."

Woh chup baitha raha tha. Andar ek jang si chhidhi hui thi. Samajh mein kuch nahi aaraha tha.

"Main yeh sab karoon aur mohabbat na kar sakoon toh..."

"Kyoon nahi kar sakoge?"

"Mujhe mohabbat karna aati hi nahi hai mummy!"

Jameela Dawood apni jagah tham gayi thi.

"I mean," woh kuch kehte kehte ruk gaya tha. "Mujhe toh kisi par bharosa karna bhi nahi aata, mujhe ehsaasat samajh mein nahi aate."

Mrs. Sherazi ko bohot andar tak takleef ka ehsaas hua.

"Abhi toh woh mohabbat ka keh rahi hai. Ho sakta hai baad mein, I mean shadi ke baad usay main pasand na aaoon. Meri aadate achi na lage, Meri shakhsiyat se masla ho. What if?" Uske andar apni zindagi ko le kar jo khadsat the usne keh diye, woh kuch Aziyat se sunti rahi.

Usay fikar thi abhi woh sirf uska saath maang rahi thi. Saath chah rahi thi. Woh usse mohabbat nahi karta, is tarah ke ehsaasat nahi rakhta. Is baat se Adina zubair ko parwah nahi hai, lekin baad mein usey parwah hogi. uske liye apne dil ke darwaze kholna mushkil tha.

"Faris," unhone usay tok diya tha. Woh bohot manfi sochne laga tha. Waswaso mein ghira hua tha. Aane wali zindagi mein aik saathi ke saath usay apni zindagi ghutan zada si lag rahi thi. Uski kefiyat aur ehsaasat uski apni samajh se bahar ho rahe thay.

Woh khud mein uljha hua tha. Andar hi andar apni zaat ki giraho mein phansa hua...

"Jinhon apne walidain ki mohabbat na mile, unhein phir duniya ki har mohabbat par shak rehta hai." Jameela Dawood usay pareshani se dekh kar reh gayi thi.

Har woh takleef jo uske maazi ka hissa thi. Woh ab uske haal par asar andaaz ho rahi thi. Uske rishtey ki nafraton ne mohabbat par se uska yaqeen uthaa diya tha. Uske andar khauf bithaa diya tha.

Aur unhein yeh soch kar dukh ho raha tha.

Bohat zyada dukh!

•••

Weekend par woh aik baar phir uske samne thi.

"Tum haar nahi manogi?"

"Nahi!" Coat ki jeebo mein haath daal kar muskurayi. Qudrati saakal liye baalon ko ikatha kar ke usne kuch mein jakhra hua tha. Kuch latain dudhiya galo par lehra rahi thi, Honth shokh surkh rang ke thay.

Neeli aankhein chamak rahi thin. Uski sangat mein, usse baat karte uska chehra aise hi khil jata tha.

"Mujhe nahi lagta tumhare dad kabhi mere liye haami bharege."

"Kyun nahi bharege?"

Woh saamne chalte hue bench par baith gaya, toh woh bhi. Kuch dair tak khamoshi chhayi rahi. Phir usne gardan mod kar uski taraf dekha. Woh bhi usi ko dekh rahi thi.

"Main bohot chhota tha jab mere parents ki separation ho gayi thi," usne soch samajh kar wo baat kehne ka faisla ki jo shaadi aur rishto ke hawale se uske zehan mein thi.

"Main apne kuch relatives ke saath raha..." Baat yahi thi magar usey kuch yun laga jaise woh jhoot keh raha ho.Asal mein woh apne kisi rishtedaar ke saath nahi raha tha. Usay lagta tha yeh hi asal haqeeqat hai.

"Main pichle kai bees saalo se apne parents ke saath contact mein nahi hoon. Woh kahan hain mujhe ilm nahi. Tumhein is liye bata raha hoon kyun ke rishte ki baat ghar ke bade karte hain. I don’t think ke mere ghar se koi bada aa sakega. Aur tumhare father kabhi bhi kisi aise ladke ke saath tumhara rishta tay nahi karenge jiske bade uske saath na hon. Woh family background ke baare mein poochenge. I have no answer to this question. Agar woh mere parents se contact ki baat karenge, to mere paas jawab ke liye sirf inkaar hoga."

Adina Zaheer dum sadhe usay dekhti rahi.

"Is liye tumhein wahi karna chahiye jo tumhare father chahte hain," usne apni baat khatam kar ke, sard padte dono haathon ko ragadte hue honton ke qareeb le aya.

Woh kuch dair tak chup rahi. "Main paanch behan bhaiyo mein sabse chhoti hoon. Mere mamoo ki aulad nahi thi, to mere baap ne mujhe unhein de diya."

Woh gardan mod kar usay dekhne laga.

"Mere dad rishte mein mere sage mamoo hain. Aur mujhse itni mohabbat karte hain ke tum soch bhi nahi sakte. So aisa mumkin hi nahi ke main unke samne apni pasand ka izhaar karu aur woh tumhein is liye reject kar dein ke tum akelay ho ya tumhare parents tumhare saath contact mein nahi hain."

Woh dheere se, magar kuch aziyat se muskara diya.

Usay yaqeen tha ke uske dad mana kar denge. Usay yaqeen tha yeh mukhtasir sa hawala unhe mukammal tor par us se mutnaffir karne ke liye kaafi hoga. Magar yeh uski kham khayali rahi. Do din baad usne phone kiya tha:

"Tum mere ghar rishte ke liye kab aa rahe ho?"

Woh kitchen mein khana bana raha tha, apni jagah khada reh gaya. "Kya tumne?"

"Haan, maine apne dad se baat ki. Unhein manane mein thoda waqt laga magar woh maan gaye," woh beinteha khush thi.

Woh pareshan ho gaya. Usne burner band kar diya.

"Unhone aitraaz nahi kiya?"

"Aitraaz to thay. Zindagi maine guzarni hai. Jab mujhe aitraaz nahi to baat hi khatam," woh khilkhilayi.

"Waise bhi unhein tum bohot pasand ho. Har waqt to tareef karte thay. Ab kaise inkaar kar dete?"

Uske lehje aur andaz mein khushi aur musarrat ke rang thay.

"Yeh sab itni aasani se ho gaya?" Usay yaqeen nahi aa raha tha.

"Mohabbat mein bohot taqat hoti hai," us ne bataya. "Waise bhi woh jaante hain ke mujhe khandan mein shaadi karni hi nahi hai. Na hi mera Pakistan jaane ka koi iraada hai."

"So..."us ne ruk kar gehri saans li.

"Main to Pakistan mein apni madad se bhi baat kar chuki hoon. Jhoot nahi bolungi, woh raazi nahi hain," us ne muskara kar kaha. "Lekin jab tak Dad mere saath hain, mujhe kisi ki fikar nahi!"

Sohail sahab Pakistan jaane waale the. Unka wai settle hone ka plan tha. Taham, woh Pakistan kabhi nahi jaana chahti thi. Shaam mein, us ne Jamila Dawood se baat ki to un ke paon zameen par nahi lag rahe the.

"Mera nahi khayal ke main us ke Dad se mil pauga."

"Wa tumhe milne ki zarurat bhi nahi. December mein main London aa rahi hoon. Tumhara rishta main maangungi." Aur unhone itni si baat keh kar us ke seene se manon bojh utaar diya tha.

December mein Mrs. Shirazi London aayin to unhon ne Adina zubair ke dad se mulaqat ki. Woh dono ke rishte ke liye baqaida unke ghar gayi thin. Woh Faris Wajdan ki rishtedar thin aur maa se barh kar thi. Apni beti ki khwahish ko madde nazar rakhte hue unhon ne haan kar di thi. December ke ikhtitam tak dono ka sadgi se nikaah ho gaya.

Faris ki taraf se Jamila Daud ne aur Adina ki taraf se door ke chand rishtedaar aur ahbab ne shirkat ki thi. Shadi Pakistan mein sar anjaam paani thi. Adina ka khandan wahi abaad tha. Taaham Faris Pakistan nahi jaana chahta tha. Uske kuch tahaffuzat the. Goke Mrs. Shirazi ne bhi use tasalli di thi ke koi masla nahi hoga, magar phir bhi...

"Tum fikr kyun karte ho? Main hoon na. Mere hote hue tumhein bhala kya khatra ho sakta hai?" Raahim ko baat pata chali to usne tasalli dene ki koshish ki.

"Sabse bada khatra to mujhe tumse hi hai," burbura kar reh gaya., phir hansa

"Ek baar phir soch lo. Shaadi ka faisla badi zimmedari hai. Aise nahi, main kunwara phir raha hoon, warna mujhe rishton ki koi kami nahi."

"Haan, main jaanta hoon, poora Pakistan tumhein apna damaad banane ke liye betaab hai," Raahim ne has kar kaha.

Is beech, Alvi sahib Pakistan gaye hue sirf chaar haftay hi guzre thay ke unka car accident mein inteqaal ho gaya. Pakistan mein jitna paisa unhon ne karobaar par lagaya tha aur jo factory khadi ki thi, us par unke sagay bhatijo ne qabza kar liya. Chand zameen aur bungalow par bhi yeh kaam Adina ke apne baap aur bhaiyo ne bhi kiya tha. Adina ke paas sirf London ka ek flat bacha tha, jise bech kar usay apne dad ke qarze utarne paday.

Uske paas kal tak sab kuch tha aur ab woh ek dum se bilkul khaali ho gayi thi. Ek hi rishta tha, woh bhi nahi raha tha. Halat ek dum se tang aur pareshan kun ho gaye thay. Woh sadme mein thi. Uske maa baap usay Pakistan bula rahe thay, magar woh kisi surat nahi jaana chahti thi.

"Main unhein kehti rahi ke Pakistan nahi jaye, magar unhon ne meri ek nahi suni," woh roh kar keh rahi thi jab Faris usay milne aaya. Woh apni dost ke ghar par thi aur itna ro chuki thi ke apna bura hashr kar chuki thi.

"Ghar chalo. Mera nahi khayal ke is tarah kisi aur ke ghar rehna theek hoga."

Faris ko samajh aa gaya tha ke ab Adina uski kanuni aur sharai biwi thi. Uski zimmedari thi. Uske dad ke shaadi ke hawale se kuch khwab thay, aur uske bhi. Mrs. Shirazi ne bhi bohot kuch socha hua tha. Naya sadma tha Fotgi hui thi to woh saadgi se usey rukhsat kar ke use apne flat le aaya tha.

Waqt ke saath Adina kuch sambhal gayi. Khud ko is gham ki kefiyat se nikal liya. Shohar man pasand saathi tha jise woh junoon ki hadd tak chahti thi. Woh uski soch se barh kar uska khayal rakh raha tha. Bazaahir reserve sa, bohot kam baat karne wala, bohot kam jazbaat ka izhaar karne wala, magar uska rawaiya uske saath uski tawaqqu se bhi zyada achha tha. Adina ki talab jaise yahan tak nahi thi. Woh bhi us se mohabbat ka ehtraaf sunna chahti thi. Uski aankhon mein mohabbat ka tasur dekhna chahti thi.

Faris bhi uski tareef kare, jazbaat ka izhaar kare. Usne shikwa ki toh Faris koi file check karte karte ruk gaya. Zara si muskaraahat ke saath usay kuch hairat se dekha. Shaadi shuda zindagi ke chhay mahine baad woh us se pehli dafa mohabbat ke baare mein istifsar kar rahi thi.

"Kya woh usse mohabbat karta hai?" Is sawal ne Faris ko thoda out of context mehsoos karwaya. Kisi logic ke bagair lagta tha.

Adina Zubair ko toh is baat se koi farq nahi padta tha ke uska dil khaali hai. Mohabbat jaise jazbaat uske liye mehsoos nahi hotay thay. Uske liye toh sirf woh mohabbat aham thi jo woh usse karti thi. Go ke woh uska khayal rakhta tha, izzat karta tha, kabhi gusse se baat nahi ki thi, uske kisi maamle mein dakhal nahi diya tha, aur na hi kisi baat pe aitraz kiya tha. Woh apni marzi se is ghar mein jaise chahe rehti thi. Phir bhi woh usse yeh sawal kar rahi thi.

"Ab tak tumhein andaaza ho jaana chahiye."

"Main tumhare munh se sunna chahti hoon ke tum mujhse mohabbat hai."

"Pehle tumhein is baat se koi farq nahi padta tha," usne yaad dilaya.

" Ab padhta (wo usey dekh kar reh gaya) Har aurat ko padta hai. Woh lafzo se izhaar chahti hai. Hamari shaadi ko chhay mahine ho chuke hain aur tumne aaj tak kabhi nahi kaha ke mohabbat karte ho ya tareef... kuch bhi nahi."

"Jo tum mujhe achhi lagti ho tabhi meri zindagi mein ho. Is se barh kar aur ehtraaf kya chahiye?" Usne sambhal kar kaha.

Is baat se Adina Zubair ke dil ko ek dum sukoon pahuncha tha. Woh muskara di thi. Uska ehtraaf-e-mohabbat bhi anokha tha.

"Sirf achhi lagti hoon?"

"Kabhi kabhi buri bhi lagti ho. Jab is tarah ki baatein karti ho." Aur woh hans di thi. Faris muskara kar reh gaya. Usne file band ki, laptop on kar liya.

Usne socha tha ke shaadi tak rehaish ka behtar intezam kar lega magar sab aana faana itni jaldi mein hua ke kuch nahi kar saka. Flat chhota tha magar do logon ke liye kaafi tha. Woh jald hi behtar rehaish ka bandobast karne wala tha.

❏❏❏