â¢â¢â¢
Aglay din office se wapsi par sadr darwaza khulte hi usay jo pehla chehra nazar aya tha, woh jannat kamal ka chehra tha. Tayyar, fresh aur nikhre wajood ke sath woh us ke intezar mein khadi thi. Faris ki peshani par bal aa gaye.
Mrs. Shirazi Lounge mein hi moujood thi, tabhi apne tasurat narm rakhta woh dil hi dil mein kurhte hue andar daakhil hua tha. Woh sofa par betha to mulazimah ko dining hall mein khana lagane ka hukm dete hue Jannat Kamal bhi us ke paas aakar beth gayi thi. Apne zajbaat zabt kar ke woh mrs. Shirazi ki taraf mutawajjah ho gaya. Un se baat chit karne laga. Is dauran Jannat jabarjasti hi gufatgu me apna hissa dalti rahi. Dining table par to usne inteha hi kardi.
"Faris! Ye fish kabab try karo, mene khas tumhare liye banaye hai!.." uske barabar me beth kar uske plate me khana nikale, usse wo yu mukhatib ho rahi thi jesey unke mubail is tarah ki baatchit hoti rehti ho.
Faris ka para aasman ko chhu raha tha. Samne Mrs shirazi moujud thi, ab na to wo ghussa dikha sakta tha aur nahi uska hath jhatak sakta tha.
"Biryani kaisi lagi..?"
Chamche ko sakti se dabate hue usne daat pisey. "Theek hai..!"
"Sirf theek? Mene itni mehnat se banai hai!" Mrs. shirazi ne muskura kar dono ko dekha. "aur yeh pasta lona."
"Nahi, bas kaafi hai..!" usne zabt se jannat ko roka lekin woh nahi ruki. apni manpasand dishes is ki plate mein zabardasti daalti rahi.
shaam ke khanay ke baad woh mushtael asaab ke sath lawn mein kaafi der tehelta raha tha. gehri sansen letay hue khud par, apne ghusse par control panay ki har koshish karta raha tha. raat gaye tak jab woh kuch had tak apne asaab par qaboo pa chuka to usne kamray ka rukh kya tha. aur aik baar phir is ka Parah charh gaya tha.
bed par darmiyan mein cushion rakh, hatt bandi kiye bed crown se take lagaye jannat kamaal aaraam se baithi thi. Comforter tangon par phela rakha tha. mobile hathon mein tha.
"Yahan kya kar rahi ho?" woh dheemi aawaz mein gurraya tha. Jannat ne sar utha kar usey dekha. woh mushtael nazar araha tha halaanke un mein teheltay waqt is ke tasurat itnay khauf naak to hargiz na thay .
"Mujhe sofay par theek se neend nahi aati.."
"Yeh mera masla nahi hai!"Â durushti se baazu se pakar kar faris ne usay bed se utha diya tha. phir ungli rakh kar usay warn karte hue pehlay sofay ki taraf ishara kya, phir darwazay ka rasta dikha diya. ke sona hai to wahan so jao, warna is kamray se dafaa ho jao.
Jannat lab bheenchey apni jagah khari rahi. woh bed se cushion hata kar yahan wahan phainknay laga .
woh kuch der tak andheray mein khari usey dekhati rahi. phir is ne aankhon mein ubharti nami ko dabate hue yu kandhay jhatke jaisay keh rahi ho koi baat nahi! phir cushion waghera uthaye, apne sofay par jaa soyi.
"Mujhe tumhara phone number chahiye" subah sawere woh aik aur mutalbe ke sath haazir thi. Cufflinks lagatay hue faris wajdan ne lab bhinch kar usay dekha. safaid printed kamiz par zard rang ke trousers mein malboos woh nikhri nikhri si bohat fresh lag rahi thi. balon ka oopar se puff bana kar khulay chhor rakhay thay. chehra make up se aari tha. honton par lip gloves ki gulaabii chamak.
nazar hata kar is ne rukh badla aur tie ki knot bandhnay laga. woh ghoom kar samnay aagai. "Kuch kaha hai mene?" woh suni un suni kaisay wrist watch kalayi par charhaney laga.
"Ab kya mein auntie se tumhara phone number maangti achhi lagoon gi, kya sochen gi woh tumahray baray mein?"
Faris ki aankhon ki surkhi gehri hui. mobile is ke hathon se kuch sakhti se jhapat kar taizi se number type kar ke is ne mobile bed par pheink diya.
"shukriya! Waise, mein pehli biwi hu jisey apne shohar ka number shadi ke poore aik mah baad mila hai.." usne hashte hue yun kaha jaisay yeh bade aisas ki baat ho.
tie ki knot lagata woh bigre tewaroon ke sath kamray se nikal gaya. zair lab muskuratay hue woh bhi neechay aagai thi.
Nashtay ki maiz par woh musalsal bolti rahi. mrs. Shirazi ke samne usay bhi majboor jawab dena par raha tha. tasurat kuch behtar thay magar uski aankhon mein gussa tha, nafrat thi, hiqarat thi .
Woh office ke liye utha to jannat bhi is ke peechay bahar aagai. ab ki baar woh sidiyo par nahi ruki thi, balkay is ki gaari ke paas ja kar khadi ho gayi thi. woh baith raha tha to gussa naak par hi dhara tha. magar jane kyun woh apne un tasurat ke sath bhi usey hargiz bura na laga .
"Apna bohat khayaal rakhna!" Usne kaha. suni un suni karte woh car reverse karne laga. jannat tab tak wahan
khadi rahi jab tak woh gaari nikaal kar wahan se chala nahi gaya tha.
Usdin pehli baar is ne faris ko WhatsApp par message kya tha .
~ Kaisay ho?
~ Kya kar rahay ho?
~ Kya khayal hai aaj shaam ka dinner kahin bahar kare?
~Tumhari pasandeeda dishes kon si hai?
~tum coffee ziyada pasand karte ho ya chai ?
~Pasandeeda Colour Kon Sa Hai Tumhara ?
~ Tum apni biwi mein kisi tarah ki khoobiyan dekhna chahtay ho?
Sham tak woh faris wajdan ke WhatsApp par block ho chuki thi. woh ghar aaya to aik baar phir woh usey, apne intezaar mein sadr darwazay par khari hui mili thi .
"Ab kya mein auntie ko yeh batati achi lagoon gi, ke tum ne mujhe whatsapp par block kiya huwa hai ?" masnoi khafgi. ke sath usne tewar charha kar usse poocha tha .
Faris aik baazu par coat daaley, dosray haath mein tissue ka pack pakde peshani par bal daale khara tha. safaid shirt shikan liye hue thi. tie ki knot dheeli. aaj uski kuch foreigners ke sath meeting thi tabhi woh takheer se ghar pouncha tha. kuch thaka huwa bhi lag raha tha.
Jannat ko mehsoos hua jaise usey zukham ki shikayat ho rahi ho tabhi tissues ka pack bhi hathon mein hi tha. woh usey koi bhi jawab diye baghair sidiyon ki janib badh gaya. Dinner bahar se hi kar ke aaya tha.
woh kamre mein aayi to kapray badlay woh bed par aada tirchha laita huwa tha. Chhekhon (sneeze) se kuch aajiz hokar karvat par karvat badal raha tha. Pani ka glass aur tablets table par dharay thay.
"Tum theek ho?" fiqarmandi se puchhte hue usne haath barha kar side table se tablets ki sheeshi uthani chahi magar faris ne kohni ke bal oopar hotay hue is ka haath jhatak diya.
"Apne kaam se kaam rakho!" is ki aawaz nazla se mutasir lag rahi thi .
jannat ne is ki surkh padtee aankhon mein dekha, jin mein nami tair rahi thi. Eyelids bhaari aur suje hue lag rahay thay.
"T-Tumahray liye c-chai ya qehwa lau?"
"Ab mujhe tumhari aawaz na aaye" usne ungli utha kar mutambliya kiya, phir comforter liye apna sar takiye mein garh liya. kuch der tak to woh chhekho se uljha raha. lekin phir is ki aankh lag gayi. woh pursukoon neend so raha tha aur idhar sofay par jannat kamaal be sukoon baithi thi .
Usne khamoshi ka qafal tod diya tha magar faris wajdan ki sard Mehri, nafrat aur hiqarat thi ke kam hone nahi aa rahi thi. 'kitna mushkil tha wo samjh se katai bahar na nafrat ki koi wajah batata tha, na koi apna narm rukh dikhlata tha.'
Gehri saans letay hue is ne blanket aur cushion uthaya aur sitting area mein ja soyi. woh hargiz nahi chahti thi uski wajah se aaj faris Wajdan ki neend kharab ho.
---- â¢â¡â¢ ----