â¢â¢â¢
"Aima ki call thi, uski friend ki engagement hai, mujhe bhi invite kya hai"
apni baat ke ehtemam par is ne faris ke tasurat jacchay. shayad woh kuch der tak apna kaam moqoof kar ke is ki zaat ko apni tawajah aur inayat ke hisaar mein le le. shayad woh inkaar kar de to aur is ka beya nigaar is ke khayalat ki nafi kar de ya phir khulay dil se ijazat de kar apni zindagi mein is ki mojoodgi ko ahem kar day. magar doosri taraf aik mukammal khamoshi thi. nah inkaar, nah iqraar. Usne jaisay kuch suna hi nahi. woh office table ke samnay khadi rahi. muntazir nigahon se usay dekhatii rahi. magar doosri taraf khamoshi thi. khamoshi hi rahi.
phir woh bhaari dil ke sath study se bahar aagai. Mrs. Shirazi ko apne programme se aagah kar ke, Aima 'Done' ka messege bhej diya. tayyari karte waqt baar baar is ki ankhen bhiig rahi theen. aisa kab tak chalay ga? aakhir kab tak woh apni izzat ko zillat ki nigah se dekhe ga?
siyah aur golden contrast mein nafees kaam wala fancy drees jis ke ghair, baazu aur galey par golden kaam huwa tha. matching jewellery siyah heels, shehad balon ki ponytail banai. atraaf mein kuch laton ko nikala. khud ko mazboot kiye khayalat jhutla kar is ne mukammal tayari ki. no bajey usay Aima lainay aagai thi. jatay waqt lamhay bhar ke liye woh is ki study ke samnay ruki thi. phir sir jhatak kar bahar chali gayi.
shadi ke baad woh pehli baar koi function attend kar rahi thi. yahi wajah thi ke woh kuch nervous thi. nah to wo is tarah ke azadana mahol ki aadi thi, aur nah hi is terhan ke malbosaat pehnay thay jin mein beshtar khawateen is ke samnay ghoom rahi theen.
yeh jagah mahol aur log sab is ke liye naye thay. Aima ne apni doston se is ka tarruf karwaya to sab ki aankhon mein herat aayi.
"O to yeh hai woh larki jis se faris ne shadi ki hai?" jannat ko faris ki wajah se guftagu ka markaz banna kuch ziyada acha nahi laga tha. Dulhan ki behan Nisha is ka haath pakra aur Aima se moazrat karti usay taqreeban khenchte hue apne sath le gayi .
seedhiyan charh kar woh usay dressing room mein le aayi thi jaha deewar geer aaiine ke samnay larkiyon ka tola mojood tha. koi liners lga rahi thi to kisi ko apni lip stick se masla tha, kisi ko gehray gilaay ne tang kar rakha tha, to koi apne balon ko naye siray se set kar rahi thi.
"Guess what, yeh mere sath kon hai?" nisha ne khade khade elaan kya. larkiyon ki gardanein ghumi sab ne sar se paiir is ka jaiza liya, kuch nervous ho kar jannat ne apna haath churra liya.
"Faris ki biwi.. jannat !"
wahan aik dam sannata chhaa gaya. jo jaha khari thi, wahi khadi reh gayi. un sab ke cheharon par aik se tasurat thay. rashk aur hasad ke miley julay tasurat. woh sab ki sab elite class se talluq rakhti theen. un ka libaas, zebaish, atwaar sab mukhtalif tha. jannat ko yakdam apna aap ajeeb laga. woh in mein miss fit thi .
"ohh to yeh hai woh.." samaat se khnkti hui khoob soorat aawaz takrayi. jannat ne be sakhta sir uthaya. wo is ke daye taraf bilkul samnay sofay par taang par taang jamaye baithi thi .
surkh rang ka Maxie numa sleevless libaas soonahre brown baal halka sa curl liye atraaf mein bikhare, damkti hui si rangat, neeli kach si aankhe, wo munasib sarapa wo itni khoob soorat or stylish thi ke ik lamhe ke liye jannat bhi is ke chehray par se nigah nah hata saki. woh uth khari hui tamaskhur urati nigahon se jannat ka jaiza layte agay barhi.
"To is paindoo se shadi ki hai faris wajdan ne!" lafz paindoo ne un modern larkiyon ko bara Mahzooz kiya. muskurahat sab ke honton par ring gayi.
"aur wo larkiyon ko to aisay reject karta tha jaisay koi hoor biyah laaye ga." dabey dabey qehqahey char so goonj utthay. goya is tabsaray ko bhi khoob enjoy kiya gaya .
jannat ki aankhon mein iztiraab aa thera rangat surkh par gayi. woh nervous thi. ghabrahat ka shikaar bhi ho gayi. faris ke hawalay se aaj pehli baar uska aetmaad mutazalzal huwa tha. woh sir utha kar jawab dainay ke bajaye, apne aap mein hi simat gayi thi. kandhay par is ka haath jo na tha. uska sath jo na tha. nah mohabbat hamrah thi, nah izzat ka ehsas tha, aetmaad aata bhi to kaisay woh muqaabla karti bhi to kaisay?
"Finally! tumhe bhi dekh liya.." sej sej qadam uthaati woh uske samnay aa khadi hui.
"waisay abhi bhi ye samajh me nahi aa raha ke faris wajdan ko tum mein kya nazar aaya? tum bta do gi to hamein aasani hogi.."
aik baar phir sab hanse thay. is par is ke libaas par, is ki shakal o soorat par. . .
"Wohi jo usey tum sab mein nazar nahi aaya..!!"
sab ki hasi tham gayi. do tak aur khailay lehjey mein jawab day kar woh isi waqt un ke chungal se nikal kar bahar aagai thi. Us din ke baad se usne Aima zahir ke sath koi bhi function attend karne se to toba kar li thi.
woh faris ki wajah se nazron mein nahi rehna chahti thi. Judge nahi hona chahti thi. nah apni shakal or soorat ke aitbaar se, nah class aur libaas ke hisaab se .
â¢â¢â¢
"Tum aakhir itne jatan kis liye kar rahi ho?" woh office table par coffee ka mug rakh kar palat rahi thi jab faris ne laptop ki screen se nigah hata kar kaha tha.
woh ruk kar, kuch herat se usay dekhnay lagi thi. woh khud se mukhatib ho jaye, aisa Shaz o nadir hi hota tha aur in daidh mah mein to shayad do teen baar hi huwa hoga.
"is rishte ko qaim rakhnay ke liye!" usne bilaa kisi tamheed ke, bilaa kisi confusion ya ghabrahat ke faris ki aankhon mein dekhte hue kaha tha .
"kis rishte ko qaim karne ke liye? jisey mein siray se tasleem hi nahi karta?"
"Tasleem nah karte to nikah bhi nah karte." ab ke woh muskarayi. woh bhi muskuraya. ba khuda is ki muskurahat agar tanzia nah hoti to kitni khoob soorat hoti.
"Tasleem karna kuch aur hai nikah karna kuch aur..."
"khuda ki muqarar karda hudood ki darja bandi karne walay tum kon hotay ho?" woh sawalia nishaan ban gayi. Kis cheez ne usay itna nidar aur bahadur bana diya tha? faris bhi sochta ho ga, kis cheez ne usay itna qowi kar diya hai. woh bhi socha karti thi .
"Tum is ghar mein meri maa ki wajah se ho!" faris ne yaad dilaya tha .
"Ghalat! mein is ghar mein tumhari wajah se hon. mera nikah tum se huwa hai!"
faris ki aankhon mein sholo ki lapak dekh kar usay andaza huwa woh is ke kharab mood ka trigger daba chuki hai.
"Mummy ko bahu chahiye thi. woh apni marzi aur pasand se tumhe yahan le bhi ayi..!" aik lehje ko ruk kar is ke ne sir uthaya.
"mujhe life partner chahiye hota to mein kam az kam tumhara intikhab nahi karta.!"
"kyun? mujh mein kya kami hai? " usne sawalia abrow uthai.
"mein jawab dane ka paband nahi..!" laptop band kar ke woh fursat se uske taraf mutwajjah huwa tha.
"Jab tumhe achi tarah andaza ho chuka hai ke mein is rishte mein serious nahi hu, aur nahi kabhi ho sakta hon to phir yeh sab kis liye?"
"kon bewaqoof tumhe pattiya parha raha hai ke tum is tarah mere agey peechay phiro gi to mujhe tumhari aadat ho jaye gi, uske baad mein is rishte ko khatam karne ka yeh fuzool sa idea apne zehen se nikaal dun ga aur hum dono hansi khushi rehne lag jayen ge."
woh uski zaat ki dhajiyan bekhair kar tamaskhur urati nigahon se ab usay dekh raha tha aur jannat labon par halka sa tabassum liye baa-mushkil hi apne jazbaat par qaboo rakh payi thi.
"waisay tumhari yeh adae tumahray pehlay shohar pe kaam nahi ayi? mera matlab hai tum uske sath paanch saal rahi ho. paanch saal ka arsa koi mazaaq nahi hai. is ke bawajood tumhe Talaq hui?"
Rooh pehlay se ghayal thi. wujood ke parche ab uray thay. woh heran thi. woh is ke samnay ab tak kaisay khari thi. apne qadmon par is istehqaq ke sath kaisay dati hui thi. kaisay sun rahi thi woh uske zeher mein bichey un lafzon ko jo andar hi andar se use chhalni karte jarahay thay.
"Tumhari aik mushkil aasaan kar deta hoon.." maiz par kohniyan jama kar woh agay huwa.
"Jis din mein tumhe is ghar se bahar ka rasta dikhao ga, us din tumahray bank account mein itni raqam hogi ke tum aglay das pandrah saloon tak ghar mein baith kar bhi urrao gi to khatam nahi hogi. so yeh sochna chhorh do ke Talaq ke baad tumhara kya banay ga! Itni doulat miley gi to tum bhool jao gi Burhan kon tha aur faris kon hai.."
lafz thay ya barchhi usay kaat kar guzar gaye thay. Us ke lab kap kapa utthay thay, ankhen be ikhtiyar num ho gayeen, magar is ne faris se mazeed kuch na kaha tha. be had khamoshi se jane ke liye uth gayi thi.
aik afsurda si muskurahat faris wajdan ke labon par aa kar thehr gayi. yeh ehsas hi tasalii bakhash tha ke jo larki is ka sukoon barbaad karne ki koshish kar rahi thi, woh usay be sukoon karne mein kamyaab ho gaya hai.
magar yeh sukoon bhi is ki khushion ki terhan waqti hi tha ke aglay roz jab woh jogging ke liye apne guard ki mayt mein ghar se nikla tha to hashash bashaash chehray ke sath woh bhi is ke peechay peechay aa rahi thi. faris ne murr kar usay tab dekha jab guard ne tawajah is ki taraf dilwai thi .
"Sir aap ki Mrs.!" siyah trousers par safaid cotton ki kameez par gulaabii rang ka lamba sa sweeter Zaib tan kiye, galey mein dupattay ko mufler ki tarah bal de kar daaley, balon ki onche ponytail banaye woh chamkti hui roshan aankhon ke sath uske paas aakar muskarayi.
"Good morning!"
"What nonsense!" usne dubi aawaz mein jhada.
"heran kar diya na mein ne tumhe? kehte hain insaan naraaz bhi sirf un se hota hai jin se koi talluq ho, bhala mein kyun tumhari baton ko mind karne lagi?"
woh lab bhinch sakhti se uski taraf daikhta raha. guzashta shab ki talkh kalami ke baad bhi is larki mein itni sakt thi ke woh aglay roz hi yunhi usse mukhatib hogi jaisay kuch huwa hi nahi. woh to yeh tawaqqa kiye hue tha ke aglay chand dinon tak to woh baat bhi nahi kere gi aur yahan.
"Nafrat bhi aik talluq hota hai. nazar andaaz karne ke liye kisi ko mehsoos karna zaroori hai. mein heran hon tum pichlle daidh mah se mujhe nazar andaaz kar rahay ho! yani tum pichlle daidh mah se mujhe mehsoos kar rahay ho."
"kisi roz tumhe tumhari ye khush fehmiya le doobein gi" usne daant pees kar kaha.
"Mein bahut achchhi tairak hu Faris!"
"Behtareen tairaak bhi shark ki khuraak ban jaya karte hain."
"shayad is liye ke woh Bar waqt saahil par nahi pahonch paate!"
"Tum pahonch jao gi saahil par?"
"Saahil par hi to khadii hu!"
maathey par teori charhaye wo jogging track par taiz taiz qadam uthany laga.
"kya tumhe is baat ki fikar hai, kahin mujhe meri khush-fehmiya na le dube?" woh bhi is ke peechay anay lagi.
"Tumhari fikar aur mujhe hogi?" sawalia abr utha kar is ne jin nigahon se jannat ko dekha, woh kudh kar reh gayi.
"Waisay self respect kya apne x husband ke ghar baich khayi hai tum ne?" faris ke qadmon ke sath qadam milati, apna tanaffus qaboo mein karti jannat ke qadmon ki harkat madham par gayi na chahtay hue bhi woh ruk gayi thi. woh bhi ruk gaya tha. mehez aik lamhay ke liye.
"Tumhe ajeeb nahi lagta? mujhe bohat ajeeb lagta hai. is tarah apni self respect ki bhaint charha kar, meri tawajah haasil karne ke liye mere agay peechay phirna."
tamaskhur urata huwa naram lehja tha uska magar jannat ke gaal par jaisay kisi ne tamancha dey mara tha. woh behal kar reh gayi thi.
---- â¢â¡â¢ ----
Thanks for reading..
Do vote & share !
A big thanks to those who voted and added to their reading list..ð·