Chapter 113: ּ ֶָ֢.CH112

"Faris, woh jara Zayn ko pakdo, jaldi se pakdo..." Baithe baithe chhekhi. Wo kapre badal kar dressing room se nikla tha, tas'suf se usay dekh kar reh gaya.

Bahar ja kar apne wali-ehad ko pakar kar le aaya. Wo uske bhi qaboo mein nahi aa raha tha. Jab se usne chalna shuru kiya tha, tab se kuch yeh hi haalat the.

Jannat, Rayyan ke kapre badal kar mudi to Faris ne usay uske hawale kiya. Wo aik dam se chheekhe laga. Chahta tha ke usay farsh par chor diya jaye aur wo jis tarah marzi chahe, cheezo ko chhekhe, chillaye, bhage. Raat bhar so kar subah tak full battery charge thi uski.

"Main to bohot decent bacchi thi. Bilkul shor nahi karti thi." Faris ne aaine ke samne apne aur chhote Rayyan ke baal banate hue uski naqal utari.

"To yeh kaise tay hua ke tum bachpan mein aise nahi the?"

"Main qatan aisa nahi tha."

Wo burbura kar reh gayi.

Jaldi se apni tayari mukammal kar ke Rayyan ko saath le kar bahar aaya to Mrs. Shirazi dining table par uska intezaar kar rahi thi.

"Good morning mummy!" Faris ne Mrs. Shirazi ko ja kar kaha.

Jannat Zayn ke kapre badal kar kuch hi dair mein aa gayi thi. Usay kursi par belt mein jakar kar bithaya. Ab wo haath utha utha kar "Papa" kiye ja raha tha.

Jannat ne gehri saans lekar usay dekha magar Faris usay apni god mein utha chuka tha. Haatho mein bread ka chhota sa tukda pakra diya.

Lekin usay ab wo woh cheeze bhi khani thi jo baaqi sab kha rahe the.

"Zayn ye lo.."  aise moko par Rayyan apne haatho se usay khilane ki koshish karta tha. Ab bhi yahi kar raha tha.

"Tum office ke liye late ho jaoge." Jannat ne Zayn ko Faris se le liya. Usay cirilek khilane lagayi. Nashte ki

mez par kaafi raunaq lagi hoti thi. Jameela Dawood muskurate hue Rayyan ki baate sunti rehti. Nashte ke baad wo usay bahar office karne ke liye gayi. Aur wapis aane par wo usay darwaze par muntazir nazar aaye.

Kapde badal kar usne kuch waqt bachon ke saath guzara, phir Jameela Dawood ke studio mein chala gaya. Jannat bhi wahan thi.

Barabar wala kamra unka play room tha. Rayyan zayn ko saath liye andar khel raha tha. Uske khilone ki almari ka darwaza khula hua tha. Zayn ne aik aik kar ke saare khilone nikaal diye. Khud andar ghus gaya. Phir darwaze ko aage piche karte hue Rayyan se chhupta hue khilkhilane laga. Rayyan ko bhi maza aane laga. Wo almari ka darwaza khol leta, phir band kar deta. Zayn ko lagta wo ghaib ho gaya hai. Phir usay lagta wo nazar aa raha hai. Usse khushi hui thi. Wo hasne lagta. Inhi sharaarto mein darwaza itni zor se band hua ke phir khula hi nahi. Ab Zayn sahab andar the aur Rayyan bahar...

"Aiyan!" (Rayyan) Zayn ne uth kar apne dono hath almari ke pate par rakh kar bajaye, Rayyan ne bahar se kholne ki koshish ki, nahi khula, phir handle par grip jama kar kheencha.

Zayn bade aaram se baith gaya. (Bara bhai hai na bahar!)

Aur bahar Rayyan Shirazi ka chehra surkh par gaya. Aankhe bharne lagay. Dheemi dheemi siskiyo ke saath Zayn ko awaaz di ke darwaza to khul hi nahi raha tha. Aur samne studio room mein Jameela Dawood ke paas baithi Jannat kamal unse baat karte hue ek dum se chup ho gayi thi.

"Yeh sirf mujhe ajeeb lag raha hai ya tumhein bhi?" Us ne Faris se poocha to usne mobile se sar uthaya.

Zayn aur Rayyan apne pehle room mein aur itni khamoshi?

Dono hi ek dam se bokhla kar uth gaye the. Play room mein dakhil huye to Rayyan siskia bharte hue nazar aaya.

"Zayn kahan hai, Rayyan?"

"Zayn andar?" Uski aankho mein ek duam se khauf aur dehshat utar aayi thi. Aur wo pata nahi kyun cheekh kar rone laga tha.

Jannat ne ghabra kar foran se almari kholi to band aankho ke saath Zayn saqit nazar aaya. Kahi usay kuch ho na gaya ho. Pareshani ke aalam mein uthakar seene se lagaya to maloom hua ke wo neend mein tha.

"Allah!" Usne sukoon bhari saans lete hue Rayyan ki taraf dekha, jo hichkiyo ke sath rote huye piche hat gaya tha. Faris usay uthane ki koshish kar raha tha aur wo uski girift mein aana nahi chaah raha tha.

"Kya hua?"

Jameela Dawood bhi pareshani ke aalam mein wahi aa gayi thi.

Jannat ne bed par Zayn ko lita kar mobile nikala. Unke kamre mein guzishta 20 minute ki video nikali. Itne aaram se khelte kudte shararti Zayn ne almari ka rukh kar liya tha. Aur bechara Rayyan kitni der tak apni taraf se almari ka darwaza kholne mein laga raha tha, aur phir wo rone laga tha aur abhi tak bhi ro raha tha.

Woh teen saal ka tha, itni samajh usmein bhi thi ke kuch ghalat hua hai.

"Rayyan," Jameela Dawood ne mutfakkar lehje mein usay pukara.

Faris ne usay bed par samne bitha liya tha.

"Kya hua, batao kya hua? Kyun ro rahe ho?"

Uski hichkiya bandhi hui thi. Wo ab Jannat aur Faris dono ko dekh raha tha. Jannat ne phir usay seene se laga liya.

"Papa! Aap maate? (Marte) Aap mujhe maate?" Us ki siskiyo ki zad mein poocha gaya sawal Faris ke andar sannata phaila gaya.

"Main kyun maarunga?"

Uska chehra haatho mein le kar aansu saaf kiye.

"Mona pa pa ne Mona ko maara, zor se maara."

Mona unke padosi Akram sahab ki nawasi thi. Bohat shararti thi. Do roz qabl hi Zaid ke saath Rayyan bhi unke ghar gaya tha. Zara se sawal jawab kiye to maloom hua ke Mona ne apne chhote bhai ko seedhiyo se dhakka de kar gira diya tha. Aur uski harkaton se aajiz uske papa ne Rayyan ke samne hi usay thappad maar diya tha. Yeh baat uske zehan mein baith gayi. Zayn almari mein band hua to usay laga papa bhi usay munh par marenge.

Faris ne be ikhtiyar saans bhar kar apne bhatije ko dekha. Jannat ne kursi kheench kar milte hue juice mein straw daal kar diya to wo Sambhal kar ghoont lene laga. Phir usse bahut pyar se samjhaya gaya ke mama papa usay kabhi bhi nahi maarenge. Aur yeh ke Mona ke papa alag hain, uske papa alag hain. Aur Rayyan to Mona jaisa shararti bhi nahi hai. Wo to kitna pyara hai. Shor karta hai na shararate, Aur apne bhai ka bohot khayal rakhta hai.

Iss tarah pyaar aur narmi se, chhote chhote lafzo mein samjhane par wo kuch had tak sambhal gaya aur so gaya.

•••

Rayyan ka kindergarten mein dakhila hua to ibtedai kuch din tak usne bahut tang kiya. Wo ek liye ke liye bhi apne mama papa se door nahi reh sakta tha. Lekin jab Faris ne kindergarten se pick kar ke apne office le jana shuru kiya to wo sambhal gaya. Ab wo kindergarten is liye jata tha kyun ke usay phir papa ke saath office jana hota tha.

Is din apne play room me se apna nanha sa bag utha laya. Samajhdari se zip khol kar apni coloring book nikali. Phir rang bhi samne rakh liye. Zayn uske paas aa gaya.

Wo chahta tha ke Rayyan uske saath khele. Magar Rayyan ab school-going bacha tha. Usay giraffe mein rang bharne ka pehla homework mila tha. Woh kaam bahut zaroori tha. Wo kaise khel sakta tha?

Zayn uski notebook par let gaya.

Wo ek dam se sar uthaa kar chikha, phir apni notebook kheench chahi to safha phat gaya. Aur phir "papa" ke wo zaar-o-qatar rote hue Faris ki study mein gaya. Notebook haath mein thi. Safha phata hua tha. Gham se nidhal...

Faris apni legal team se mazrat karte hue usay uthaye bahar aaya.

Usne rote huye zayn ki poori karastani sunayi. Apni notebook dikhayi. Uske aansu saaf karte, dilasa dete wo wapas unke kamre mein aaya to zayn sahab naraz the.

Faris ne usko neeche utar kar khilono ki almari kholi, phir bed ke paas aa khada hua, jhuk kar, farsh ke sath lag kar dekha to wo bigre tewaro ke saath khafa khafa sa deewar ki taraf rukh kiye leta tha.

"Zayn bahar aao."

Khamoshi...

"Zayn"

lehja zara sa sakht...

Magar phir bhi khamoshi.

"Main teen take ginuga. Agar tum bahir na aaye to punishment milegi."

Aankhein ragarte, sakte Rayyan ne zara sa ghabra kar Faris ko dekha. Uska nanha sa dil dhadak gaya ke Zayn ko punishment milegi. Apna gussa aur narazgi bhool gaya.

Bed ke paas ghutne tika kar, farsh se gaal mis kar ke, haath phela kar usay pukara.

"Zayn bai! (Bhai), bahar aao!" Usay pyar se aur bado ke andaz mein pukara.

Phir khud bhi farsh ke saath lag kar bed ke neeche chala gaya.

Faris ne gehri saans le kar peshaani masli.

Har doosre din usay inki narazgi aur mohabbat ka amali muzahira dekhne ko milta tha.

"Zayn!"

Faris ne apna hath barha kar, uska pair pakad kar kheencha to wo shor karne laga. Wo rona chahta tha magar jis tarah Faris ne usay kheench kar bahar nikala, usay bohot maza aaya.

Faris ne bazuo se pakad kar masnui khafji se jhinjhoda to khilkhila utha. Lekin saz usay bahar haal jhelni pari. Phir usne Jannat ke paas ja kar shikayat lagayi,

apni dado ko, Zaufshan ke saath apni dil-azeez "Ashka" ko bhi.

"Papa" naam le kar phir kuch ishare karta aur gair-mafhoom ki awaaze aur alfaz mein batata.

Wo theek se bol nahi sakta tha magar sab ko samajh aa raha tha ke wo kehna kya chahta hai.

"Ainda mere bete ko kuch kaha to achha nahi hoga!" Jameela Dawood ne usay seene se laga kar Faris ko khafgi bhare andaz mein data to wo muskurate huye sar jhuka gaya.

•••

G

ehri tareeki mein flashlight ki tej roshni aadhi khulti band hoti aankho par pari to kuch aziyat se mich kar usne apna sar jhuka liya tha. Wo jis kursi par baitha tha, uske peeche hath sakhti se bandhe hue the.

Frankfurt ki taweel o kamat imarat zair-e-tameer imarat ki koi chhati ya satvi manzil hogi. Daye taraf pillers se aage tareek sheher ke daman mein falakboj imarato par jalti bujhti aur thehri hui kayi roshniya aur rang the, nuqto ki soorat.

Peshani se gaal tak behte hue khoon ki dhar collar par rang chod rahi thi.

Siyah faam ne do teen baar flash light chamka kar band kar di. Iklota bulb jo sar par tha, roshan ho gaya. Wo teen log the, in mein ek siyah faam tha, hatta katta sa. Aur baaqi do ladke the.

Usne bari bari teeno ki shakal dekhi. Do ka chehra bilkul soojha hua tha, teesre wale ki kuch bachat ho gayi thi. Wo bas langda kar chal raha tha.

Teeno bilkul alert aur mohabbat ho kar usay ghere khade the. Ek ne to baqaida gun bhi taan rakhi thi.

"Kya hai yaar? Mil baith kar aaram se masla hal kar lete hain." Lehja dostana tha. Mojooda surat-e-haal ka na to tassurat izharat par tha, na hi chehre par.

Yaka yak phone baj utha. Call receive kar ke kisi ko Raahim Afaq ki khabar pahuchayi gayi. Doosri taraf se unhe, ek hukm diya gaya. Siyah faam ne ek nazar usay dekha, phir baaqi do saathiyo ko.

Baat khatam kar ke usne apne do saathiyo ki sargoshi mein kuch kaha. Ek ko wahan rakha aur baaqi do baahar pehre ka soch rahe the.

"To kis ke hukum par kaam kar rahe ho? Hanery ke? Faisal? Ya phir Sulaiman ke?"

Teeno ne sawal suna, jawab na diya. Wo samajh gaya, uske saath baat cheet se unhe roka gaya hai. Wo ab unke chehre ke ta'ssurat parh raha tha.

"Faisal ka kaam lagta hai mujhe. Yaqeenan usne hire kiya hoga tum logo ko."

Apni taraf se andaza laga kar mutmayin andaz mein sar ko dayein bayein jhumbish di.

"Kya Faisal ne tum teenon ko bataya hai wo kis ke liye kaam karta hai? Ya usne mujhe pakadne ka kyun kaha hai?"

"Apna muh bandh rakho warna goli se tumhara bheja uda doonga."

Karahat lehje mein dhamki de kar siyah faam ne taar ke paas ruk kar neeche sheher ki sarak par door tak kisi gaadi ke nishan dhoondhna ki koshish ki.

"Uda dena goli bhi chala lena. Lekin pehle apni fikr karo. Yahan se aaj tum teen bhi zinda bach ke nikalne wale nahi ho." Be-parwa lehje mein keh kar usne apna sar jhatka.

"Tum hamari giraft se bach kar nahi nikal sakte." Siyah faam ki ghurrahat uske qareeb se goonji thi.

"Kisne kaha, main nikalna chahta hoon? Mujhe waise bhi parwah nahi ke tum log mujhe Henry ke hawale karte ho ya Faisal ke." Teeno ne na-samajhi ke aalam mein ek doosre ki shakal dekhi thi.

"Ye to tay hai ke wo meri jaan nahi lenge, lekin tumhare saath jo sulook karenge, uski fikar ho rahi hai mujhe." Uski muskurahat ek dam se gehri ho gayi thi. Aankho ka tassur ajeeb si pur-asraariyat mein dhal gaya.

"Kehna kya chah rahe ho tum?"

Jisne pistol tani thi, sawal bhi usne kiya. Wo bhool gaya tha ke kuch der pehle tak phone par usay Raahim Afaq se koi baat na karne ka huqm diya gaya tha.

"Yahi ke mujhe pakad kar tum teenon ne apni zindagi khatre mein daal di hai." Baat wazeh na thi, samajh se bahar ho gayi.

"Tumhein hum bewakoof lagte hain?" Usne poore yaqeen ke sath sar ko asbat me jhumbish di.

Is se pehle ke siyah faam gusse mein usay ek aur mukka raseed karta, wo ek dum se cheekh utha.

"Ruko, Ruko, ek second, meri baat to sun lo!"

Siyah faam ne ruk kar usay girebaan se daboch liya tha. Usne bhi suspence ki inteha karte hue fara-far bolna shuru kar diya:

Woh Raahim afaq. Ek hacker tha. Usay Faisal ke boss ne 6 mah pehle apne ghar ka security system design karne ke liye hire kiya tha. Library mein ek khufiya darwaza tha jo kisi kitaab ko harkat dene par khulta tha, aur wo kitaab paas ke bedroom mein rakhi thi. Uske aali shan ghar ke darmiyan ek bagh tha, us bagh mein beri ka darakht ke neeche char laashe dafan thi. Ek uski mashooqa thi, doosra uska qareebi dost tha, aur baaqiya do lasho ka usay koi ilm nahi tha.

Phir usne bataya ke wo kitna majboor aur gareeb tha, uski maa bimar thi, aur ilaj ke liye paise chahiye the. Aur usay na chahte yeh kaam karna pada.

Usne itni tafseel di ke kaise wo is ghar mein gaya, kaise deal hui, aur kaise haqeeqat khulne par usay jaan se maarna chahta tha. Kahani sunane ka andaz itna asar-kun tha ke woh saans roke sunte gaye.

Usne password se lekar safe, khufia darwaza aur chhupe hue kisi tehkhaane tak ki maloomat unhein bata di. Kuch aise raazo se parda uthaya jo aankhon mein dehshat bhar gaye, aur kuch aise karnamo ka izhaar kiya jo khatre se khaali nahi the.

Aur wo teeno apne client ki har maloomat se be-khabar, usay sadme se take jaa rahe thay.

Kya? Wo itne khatarnaak aadmi ke liye kaam kar rahe hai? Samaat par yaqeen na aaya. Ke jis ne hire kiya tha, khasa maqbool aadmi lagta tha.

"In sab baato ka hum se kya lena dena?" Akadpan se Kharahat lehje mein sawal uchala gaya. Ke unhe bas ek naujawan ko pakad kar kisike hawale karna tha aur apni matlooba raqm hasil karni thi. Baat khatam!

"Kyunke yeh raaz ab mujhe tak hai, isliye woh mere peechhe hai. Jab unhe pata chalega ke tum logo ko bhi maine sab kuch bata diya hai, to woh tumhein bhi zinda nahi chhodenge." Woh hansa tha, aur un teenon ke pairo tale zameen nikal gayi thi. Itni tawajjo se sari baatein sunne par unhone khud ko lanat malamat ki.

"Kya bakwas hai yeh?"

"Koi bakwas nahi. Bas aane do unhe. Yahan ek nahi, chaar-chaar laashe girengi."

Usne sar par bomb phodkar muskuraya, jaise fikar sire se naa thi.

Achanak peeche kahi gaadi ke tyre chirchir aaye. Siyah faam ne jhuk kar dekha to van se kuch suited buited log nikalte nazar aaye. Tadaad mein woh 6 the.

Siyah faam ke dil mein pehli baar haqeeqi khauf paida hua. Kaam chhota sa lagta tha usay  Raahim afaq ko zinda salamat hawale karna aur apni rakam lena tha aur phir apne do saathiyo ke sath chlte banna tha. Lekin jo khaufnaak naqsa Raahim afaq ne kecha tha usay madde nazar rakhte huye ab usay ye sab mushkil lagne laga tha. Na usne apne kabhi khoon se range the na wo yaha kisi aur ko rangne de sakta tha.

"Bro mene pehle bhi bola tha yeh kaam hamare bas ka nahi hai." Surkh jacket wala ladka ghabra gaya. Woh chand maheene pehle tak ek boxing club se jude hue the, magar kisi chhoti si badmazgi ke baad club ne unhe nikal diya tha. Tab unhone faisla kiya ke paisa kama kar apna club kholenge. Paisa aik din me nahi kmaya jaa sakta tha. Wo part-time jobs karte karte woh is Faisal ke hatte chad gaye. Jisey kuch boxer ki talash thi.

Kaam asaan tha ke kisi ladke ke pakad kar unke hawale karna tha aur badle me wo unhe maqool raqm adaa kar rahe the. Lekin ab jab kaam ho chuka tha, toh unhe apni zindagi khatre mein padhti aane lagi.

"Aane do unhe, bilkul aane do unhe," Raahim Afaq gunguna raha tha.

"Tum ne humein kuch nahi bataya..." Tees hazar doller ki raqm aankho me lehrayi to ghurraya.

"Sab kuch bata diya hai, aur unke samne bhi bataunga, bar-bar dohraunga."

"Woh upar aa rahe hain!"

Teesre ne mathosh ho kar ittela di.

Isse pehle ke koi aur baat hoti, siyah faam ne ishtial (ghusse) mein pistol ka butt uske ke sar par de maara. Sadid dard se Raahim ka sar ghoom kar reh gaya.

"Kholdo usay."

Niche sidhiyo par ujlat me kadm uthate bhari jhuto ki awaaz wajeha hone lagi thi. Wo jo badi mushkil se usey pakad kar waha laye the. uske hath kholte, collar se pakad kar doosre darwaze ki taraf dhakel kar. Bahar ko bhage, ujalat me emergency ahini sidhiya utarte huye

Wo berooni deewar ke sath lag kar ahini rods par grift jamaye imarat se nichli manzil ka rukh karte kuch der ke loye ojhal hua, uska sarapa phir dusri manzil par namudar hua. Deewar phalang kar kuch hi der me khidki se bahar tha.

Samne imarat ki manzil se kisi ne doorbeen ke zariye uski sari karwahi ka malhata karte huye , bheenche huye labo me zumbish huyi thi.

"Un gadho ko kaha bhi tha, usse baat na karna."

Un teen logo ko pichhli sadak se jate hue dekha ja sakta tha.

Aur mall ki taraf logo ke hajoom mein gum hote huye, Raahim afaq dayi janib ek dukan ka darwaza kholkar andar chala gaya. Kuch hi der me woh samne ke darwaze se bahar tha.

Ab na woh jacket wo thi, na huliya, aur na hi woh chaal.

Woh ek adher umar ka, beemar aur zaheef sa boodha tha, jo kapkapate huye, kanshta hua, sust royi se kadam utha raha tha.

"Kaha gaya?"

"Tum is taraf dekho, main us taraf jata hoon, aur tum waha samne."

Hukam milte hi woh log apna rasta banate huye nikal gaye.

Hat ke neeche sar jhuka hua tha, Raahim Afaq ke labo par muskarahat saj gayi thi. Aur aankho ki chamak khatarnak hadd tak bhadh gayi thi.

Woh budha, zaheef beemar aur khansta hua, rahdari se nikal kar jaa chuka tha.

❏❏❏