Hath mein mobile liye woh hospital ke waiting room mein baithi thi. Message type karte hue us ne apne barabar mein hi khali jagah par aik nojawan khatoon ko baithne ki jagah di to us ne muskurate hue shukriya ada kiya.
Woh kaafi dair se bag kandhe se lagaye kisi ke intezaar mein wahan khadi thi.
"Pehla baby hai aap ka?" Us ne poocha to Jannat muskurayi.
"Nahi, doosra hai."
"Masha Allah." Us ka jawab us ki aankho mein ajeeb tarah ka hazan aur nami le aaya tha.
"Aur aap ke kitne bachay hai?" Ab baat shuru ho hi gayi thi to us ne khush gawar lehje mein poocha.
Woh lamhe bhar ke liye kisi dard ki aziyat mein aayi thi.
"Meri aulad nahi hai, main yaha meri chhoti behn ke sath aayi hoon."
Jannat ne is aik hi lamhe mein us ke etmaad ko bikharte muskurahat ko simat'te aur hazan ki daldal mein tarte hue dekha. Yoon laga jaise woh us ka hi huzn ho. Kisi aur ki aankho mein thehra hua nazar aa gaya ho.
"Shadi ko kitne saal hue hain?" Us ne poocha.
"Barah saal." Aankho ki nami barh gayi thi.
"Dua kijiye ga mere liye Allah mujhe bhi de."
Jannat ne aahistagi se us ka haath pakda. Zabt pakadti us ki muthi sakhti se band ho chuki thi. Pata nahi wo kin halat se guzar rahi thi ke chehra surkh padne laga tha aur aankhe tar ho rahi thi.
"Main paanch saalo tak be aulaad rahi." Jannat ne kaha to us ne besakhta us ki taraf dekha. "Paanch saalo tak jo zehni torture main ne saha hai, shayad main usay lafzo mein bayan na kar saku."
"Phir meri talaaq ho gayi..."
Siyahi mail gehri aankhe Jannat kamal ke chehre par jamkar reh gayi thi.
"Phir meri doosri shaadi huyi. Me apni zindagi ko le kar itni mayoos thi ke mujhe lagta tha, kabhi kuch theek ho ga hi nahi. Main be aulaad rahungi aur sab aise hi khatam ho jaye ga. Main ne duaen karna bhi chhod di thi."
"Phir meri saas ne mujhe duaon ki taraf mutawajja kiya. Aur unhi duaon ke zariye maine apne andar umeed jagayi aur Allah ki taqdeer ke aage sar jhuka diya. Aur shukar ada kiya ke woh jis haal mein bhi rakhe, alhamdulillah" iski awaaz mazboot thi. Lehje mein thehrav sa tha.
"Main ne kabhi tawajjo hi nahi di ke jin banjh soorat ka zikar Qur'an mein kiya gaya, woh dono hi ambiya ki biwiya thi. Aur dono ko hi sahib e aulad kar diya gaya tha. Dono ke batan se nabiyo ne janm liya. Main ne kabhi is bare mein nahi socha ke Maryam alayhissalam ke hujre mein jo be mausami phalo ka zikr hua, to kyun hua? Phalo ko dekh kar Zakariya alayhissalam ne umeed pakdi li, ayat ko parh kar, main kabhi kyun nahi pakad saki?"
"Zakariya alayhissalam ko Laga tha ke woh ab badi umar ke hain aur unki zaujah banjh hai. Unhone yeh baat Allah se kahi, aur Allah ka jawab woh sirf unke liye nahi tha. Woh har is aurat aur mard ke liye tha jo aulaad ki neâmat se mehroom hai..." Usne ruk kar uski aankhon mein dekha. Zabt pakadte lab kapkapaa uthay thay.
"Duaen radd nahi hoti. Kabhi nahi hoti. Allah plan karta hai, usne hame kab kis waqt kya dena hai, aur kis tarah dena hai..."
"Is liye main aap se bhi yeh kehungi, na umeed mat ho. Sabr karein aur dua aur azmaish. Guzarne ki himmat mange. Is duniya ne to phir bhi khatam ho jana hai. Lekin yeh jo azmaish ke dauran hamare aamaal honge, hamari ibadat, hamara yakeen, hamara imaan aur Allah par aitbar aur dua mein, yeh aakhirat tak jayegi. Yahi aakhirat mein kaam aayengi."
Ruk kar uski aankho mein dekha.
"Har insaan ke test ka dauraniya mukhtalif hai. Mera imtihan panch saalo tak raha. Aur Allah ne phir mujhe diya. Woh aapko bhi dega." Usne phir uski muthi aahistagi se kholi.
"Isay khula rakhe, band na hone dein. Jo aap apni aulaad par kharch karti, usey yateemon, miskeeno par kharch karein. Jaise Zakariya alayhissalam ne Maryam alayhissalam ki kafaalat ki thi, usi tarah aap bhi kisi ki kafaalat kar lein. Allah ki raah mein jitna ho sakein. Aur duaen jaari rakhe, Duae taqdeer se ladhti hain aur sadqa musibat, pareshaniyo ko talta hai."
Woh saans rok kar usay sun rahi thi.
"Meri dua hai Allah aap ko bohut naik, saalih aulaad se nawaze... Ameen!" Grift barhakar boli to usne tashakkur bhari nigah se dekha, apne aansu saaf kar liye.
Uska mobile bajne laga to uthakar dekha, Faris ki call aa rahi thi.
"Main chalti hoon," keh kar muskurate hue uthne lagi to usne haath pakad kar rok liya.
"Tumahara naam kya hai?"
"Jannat Kamal!" Jawab de kar woh muskurate hue jaane ke liye mud gayi thi.
Waiting room mein baithi khatoon ne aankho mein nami liye usay door tak jaate hue dekha tha.
â¢â¢â¢
Woh business trip se wapas lauta to ehsasat be-had mukhtalif the. Guzishta raat phone par milne wali khabar ne usay mazeed wahan thehrne nahi diya tha. Woh jald hi wapas aa gaya tha. Ghar mein dakhil hua to khamoshi ka raz tha. Kisi ko uski aamad ki khabar nahi thi.
Sidhiya chad kar apne bedroom ka rukh kiya. Darwaza aahistagi se khol diya.
Nim taareeki mein Jannat usay bed par dairaz dikhayi di. Be awaaz qadamo ke saath usne baby cart ka rukh kiya. Gulabi makhmali kambal mein lipta hua nanha wujood gehri neend mein tha.
Woh apni jagah munjamid sa khada reh gaya tha. Usne ek baar phir mehsoos kiya jaise uska wujood tukdo me baá¹ gaya ho. Awaaz dhadkano ki thi jo samaat mein thehr gayi thi. Ehsasat ajeeb hone lagay the.
Usne himmat pakadte hue jhakar be-had ehtiyaat se usay uthaa liya tha. Nigahe uske pyare se chehre par jami reh gayi.
Usay yun laga jaise woh wohi ho. Woh usay ata kar di gayi ho.
Aahat par Jannat ki aankh khul gayi. Kohni ke bal ooper hui aur Faris par nazar padte hi thehr gayi.
Nim tareeki mein woh usay dekh sakti thi. Woh apni beti ko seene se lagaye khada tha. Woh uska matha, uske gaal choom raha tha. Uski aankhe tar thi. Woh be-had ehtiyaat se uth kar beth gayi thi. Lihaf hataa kar uske paas aa gayi.
Usne Faris ke bazoo par haath rakha. To usne gardan modh kar Jannat ko dekha. Woh maut ki sarhado ko choo kar patti thi. Uski rangat zard aur aankhon ke halqe gehre lag rahe the lekin momi chehre par ilahi si khushi nazar aa rahi thi. Woh apni beti ki paidaish par yahan nahi tha, usay soch kar dukh hua. Usay yahan hona chahiye tha.
"Hum tumhara intezaar kar rahe the," woh boli to muskurahat liyon par aa gayi. Woh apni beti ko baahon mein liye uske paas hi baith gaya tha.
Jannat ka dahina haath uske haath mein tha. Woh dono hi ab usay dekh rahe the. Woh mundi mundi aankhe khole hui thi. Labo ko jumbish dete dekhne ki koshish kar rahi thi. Muthhiya bhinchi hui thi. Gulabi libaas uski apni rangat se match kar raha tha.
Woh anguthe se uske gaal ko chhoote hue ab usse baat kar raha tha.
"Zayn ka naam maine rakha tha, iska naam tum rakhoge" woh kandhe se gaal mish kiye bohot narmi se boli.
"Kya rakhna chahiye?"
"Jo tum apni pehli beti ka rakhna chahte the." Aahistagi se kehte hue usne Faris ke bazoo par apni grip mazboot kar li thi.
"Main uska naam jannat rakhna chahta tha."
Lamha bhar ke liye Jannat Kamal ki dhadkanein tham gayi thi. Aankho mein mohabbat ki narmi liye usne Faris ko dekha. Woh uska naam tha. Chhota sa ek lafz. Jo uski pehchan ban gaya tha. Aur woh usay kabhi bhi bhool nahi saka tha.
"Maa aur beti ka ek sa naam."
"Bilkul! Kya khayal hai?" Faris ne poocha to woh muskurayi.
"Mujhe zayn ka naam phir Faris rakhna chahiye tha."
Woh hans diya.
"To ab tay karo." Usne kapda jara sa neeche karte hue apni beti ki naak ko chhua.
"Jannat, janna, aur is se juda hua ek aur naam Jinaan!"
Woh naam Jannat Kamal ko bohot pyara laga.
"Jinaan alhad"
Aur iski pyari si pari ka naam is raat mile ho gaya. Safar ki thakan ke bawajood is raat Faris Wajdan raat gaye tak apni beti ko god mein liye baitha raha tha. Woh uske wujood se gayi thi to zindagi ka ehsaas ho raha tha. Aur woh dard jo dil mein tha, uski chubhan halki ho rahi thi.
â¢â¢â¢
Wajdan House ke lawn mein dhoop utri hui thi. Khali canvas ke samne brush haath mein liye Jameela Dawood wahi baithi thi. Rayyan apni gaind se khel raha tha. Daudte bhagte, cheekhte huye Zayn iskka bhar poor saath de raha tha. Upari manzil ki deewar gir khidkiyon se bahar ka manzar dekhte hue Jannat ne kagzat se bhara hua "usri yusra" ka folder daraz mein rakh diya tha. Sirf ek safha tha jo uske haath mein dhara reh gaya tha.
Talash ka safar mukammal ho gaya tha. Jis jawab ki talash thi woh use mil chuka tha. Usne baby cart par jhakar apni nanhi si gudiya ko baho mein uthaa liya. Safed frock mein malboos Jinaan apne haath pair chala rahi thi.
Ehtiyaat se sidhiya utar kar woh bahar aa gayi thi.
Jameela Dawood ne use apni jaan aate hue dekha to brush rakh diya. Lawn cheez par unke paas baithte hue unhone Jinaan ko pukara to woh muskurayi. Rayyan bhaga chala aaya tha. Unki behna abhi jagi thi. To Jannat ke ghuthno par haath rakhe, ooper ho kar uske gaal par pyaar kiya. Zayn ko filhaal bosa lena nahi aata tha. Usne bhi apne bhai ki dekha dekhi apne lab Jinaan ke gulabi gaalo par rakh kar hata liye. Mrs. Shirazi haans padhi.
Jannat ne usri yusra ke kagazat unke samne mez par rakh diye.
"Mujhe lagta hai shayad main kisi muddat tak jawab tak pahunch gayi hoon."
Usne kaha to Mrs. Shirazi ki aankho mein ishtiyaq ki ek lehje bhari muskurate hue unhone ek nazar safhat par daali.
"Main tumse sunna chahti hoon."
Ek baar pehle unhone iska research work padha tha. Uski ghair maujoodgi mein padha tha. Ab wo usse sunna chahti thi, gehri saans le kar gaal par phisalte lat ko kaan ke peeche kar diya tha. Dhoop mein uski ujlat rangat chamak rahi thi. Usne pehla safha khol diya.
"Aayat hai: Inna ma'al 'usri yusraa. Inna ma'al 'usri yusraa. Usne ek lamha ruk kar kaha,
"Al-'usr" ism ma'rifah hai, aur "yusr" ism nakrah. Al-'usr ke aaghaz mein alif laam hai, jo isse "muqayyad" kar deta hai, yaani ek hadd mein qaid kar deta hai. Jabke "yusr" alif laam ke bagair mutlaq hai.."
"Mutlaq woh alfaaz hote hain jo har lehaz se ghair muqayyad, ghair mashroot, ghair mu'ayyan ya ghair mahdood hote hain. Aasan alfaz mein yun kehna behtar hoga, jo mukammal ya azaad ho."
Jameela Dawood ne asbat mein sir ko jambish di to usne baat jaari rakhi.
"Al-'usr muqayyad hai. Muqayyad yani baandha hua. Ek had mein rakha hua. Aur yusra azaad aur muqammal..."
Lawn ki sarsabz ghaas par se lehra kar uthti hui hawae darakhto ki shaakho se guzr gayi thi. Neele aasman ki bulandiyon par kahi kahin safedi phailne lagi thi.
"Ayat ne al-usar ko alif laam se khaas (ma'rifah) kar diya aur yusr ko bina alif laam ke aam kar diya.."
Usne ahistagi se safa palat diya.
"Lekin yahan al-âusar ke muqable mein yusr nahi yusra hai. Alif ke sath. Alif yusr ki tazeem ke liye hai. Yusra isme takbeer hai. Isme takbeer nishandahi karti hai har us shay ki jo azim hai..."
Uski awaaz mazboot aur lehja thehra hua tha. Woh aankho mein chak liye, bohot shauq aur excitement ke saath unhe bata rahi thi.
"To is hisaab se ayat ka matlab hua, 'Beshak har mushkil ke saath azeem asaani hai."
Jameela Dawood shakk bhari nigahon se use dekh rahi thi. Jannat Kamal apne sawaal ki teh tak pahunch gayi thi. Usne apne halat ko samajh kar jawab ikhtiza kar liya tha. Talak ko samajh liya tha. Yusra ko pa liya tha.
"Har woh takleef, aziyat, azmaish ya ibtila jise hum guzar rahe hote hain ya jis mein hum rote tadhpte guzar hai, uske saath hamare liye ek bohot badi asaani hai, jo inaam humein milega woh hamari soch se barh kar hoga. Jo usar ki tarah sirf yusr nahi hoga, woh yusra hoga. Yani woh azeem hoga..."
Rayyan ki gaind bohot door ja giri thi. Zayn ne bhaagte hue pehle pahunchne ki koshish ki thi. Kiyari mein chand aik phoolo ki pankhudiya toot kar neeche aa gayi thi.
Hawaon ne rukh badal liya.
"Ayat ya to takeed ke liye dohrayi jati hain ya taheed yani khauf ke liye ya phir tazeem ke liye. Yani Allah ke us kalam ki gehraai ya azmat bayan karne ke liye, aur kya aap yakeen karengi ke is aik jaisi dohrayi jaane wali ayat mein mujhe aik mukammal tor par mukhtalif matlab nazar aaya hai..." Usne aik lamha ka tawaquf kar ke unki aankho mein bohot umeed aur yakeen se dekha tha. Jinaan ab uski choodiyo par hath rakh rahi thi.
"Main ne seekha hai, usar kabhi bhi tanha nahi aata. Woh aap ki zindagi mein jab bhi, jis bhi soorat mein aata hai, yusra ko saath le kar aata hai. Yusra yani aik bohot badi asaani. Main ne yeh bhi seekha hai ke chunke aap usar se guzar rahe hote hain, is liye aap us se waqif hote hain lekin yusra aik aisi cheez hai jo nigahk se ojhal rehti hai. Baz aukat hum usay samajh nahi sakte. Pehchaan nahi paate tabhi to kaha gaya hai saath hai taakw hum yakeen qaim rakhe ke "woh" hai. Main ne is ayat se yeh bhi seekha hai ke yusra do tarike ke hote hain. Aik, yusra woh hai jo aapko sabr ke badle mehnat ke badlay mustaqbil mein mil jata hai. (Woh mehnat jis ka zikar Surah ki agli ayato mein bhi hai) doosra, yusra hai jise sakht mushkil halat se guzar kar aap usse pa chuke hote hain aur usse jee bhi rahe hote hain par aap ko uska ilm nahi hota."
Woh bohot gehraai mein baat kar rahi thi. Jo unhone bhi nahi socha tha. Jannat Kamal woh bhi soch rahi thi.
"Misaal ke taur par aik nojawan aik sheher se doosre sheher ja raha hai. Raaste mein gaari kharaab ho jaati hai. Ab chunke amd or raft bhi kam hai to use koi sawari nahi milti. Woh pareshan ho jaata hai kyun ke usay job interview ke liye muqarra waqt par pohanchna tha.."
"Woh udaas ho kar rone lagta hai, is liye ke beemar maa ko akela ghar chhod kar aaya hai. Use gham hai ke woh us nokri ko bhi haasil nahi kar sakega. Woh ruk gaya, phansa gaya, rota raha. Is baat se qata'i be khabar ke agar woh is sadak par gaari chalta rehta to aage kisi truck se takra kar uski gaari tabah ho jaati aur woh ain moqa par dum tor deta..."
"Gaari ka kharaab hona usar hai..."
"Job interview ka chhoot jana bhi âUsar hai..."
"Magar is usar ke badle jo yusra usay mila hai, kya woh azeem nahi? Is usar ki ba nisbat jisse wo guzar raha hai, aur jiska usay ilm bhi nahi.."
Jameela Dawood ki nigahen uske chehre par jam kar reh gayi thi.
"Har gham, har dukh, har dard, har pareshani aur mushkil ka tanasuf yusra ke saath is tarah hota hai. Yusra hamesha usar se bara hota hai."
Us ne ruk kar chand lamho ka tawquf kiya tha.
Jameela Dawood be had khamoshi aur sukoon se usay sun rahi thi. Unke chehre par itma'inan nazar aa raha tha. Unke zakhmo par phir se marham lag raha tha.
"Main ne yusra par ghour is liye bhi kiya. Kyunki aap ne mujhe Surah At-Talaq ka hawala diya tha. Usri yusra aik jagah 'maa' aur doosri jagah par 'baap' ke saath hai. Aik usar aisa hai jiska yusra us ke sath hi hota hai, jura hua. Aur doosra yusra asar ki ghatai se guzarne ke baad ataa kar diya jata hai."
Khali canvas par kai manazir ubharne lagay the. Unki nigahen uske chehre par jam kar reh gayi thi.
"Aur beshak tamam ilm Allah ka hi hai. Allah hi hai jo behtar janta hai."
Apni baat khatam kar ke ab woh islah ke liye muntazir unhein dekhne lagi thi. Apna nuqta-e-nazar usne wazeh kar diya, apni tehqiq aur mehnat dikhadi thi.
"MashaAllah " unki aankhein num thi. Muhabbat se uski mehnat aur lagan ko saraha. Dua bhi di. Phir unhone safhat uthaa liye. Palat kar dekhne lagi thi. Parhne lagi thi. Us ne highlighter pen se kai nishan laga rakhe thay. Kai lafzo ke anginat ma'ani ki list bana rakhi thi. Sirf 'usri yusra' ko samajhne ke liye usay Quran ki un tamam ayato ki depth ko dekhna pada tha jin mein yeh lafz istemal hua tha. Nakrah aur ma'arifah ki pehchaan deni padi thi. Siyaaq-o-Sabaq par ghour karna pada tha. Kai jagaho par 'usar' alif ke sath Yusra lafz ke saathhua tha aur kai jagaho par yera sirf usar ...
"Kya talash ka yeh safar yahin khatam hua?"
"Nahi," Jinaan ne uske baalo mein haath uljha liye the, Chhudate huye unhein dekha.
"Khatam nahi hua. Abhi is par mazeed research karongi. Main apni zindagi ke waqt halat ke tanazur mein aur mazeed dekhne aur samajhne ki koshish karongi." Ruk kar muskurayi. "Aur main to ab yeh bhi soch rahi hoon Surat al nasrah ka aaghaz, aik sawaal se hi kyun kiya gaya..."
Jameela Dawood muskurakar reh gayi thi.
"Ab main uska jawab dhudugi."
"Mumma" Rayyan bhaga hua uske paas aaya tha.
Jameela Dawood ki nigahe khali canvas par thehr gayi thi.
Zehen mein ab aik naya manzar tha. Aik naya mafhoom liye hue. Naye rango mein ghira hua. Nayi umeedo se saza hua
"Beshak har mushkil ke saath azeem asaani hai."
Unhone brush uthaa liya.
Bairooni darwaze khul gaye the, Farjs ki gaari andar daakhil ho rahi thi. Apni gaind ko chhod chhaad diya, Rayyan zayn apne papa ki taraf bhagay the. Jinaan ko seene se lagaye Jannat bhi apni jagah se uth gayi thi.
Unhone apne bete ko dekha jis ke labo pad zindagi se bhar poor muskurahat thi. Safed makhmali libas mein malboos Jannat Kamal hanste hue kuch keh rahi thi.
Faris ne Jinaan ko uthaa liya tha jo baap ko dekhte hi Jannat ki girift se nikalne ki koshish kar rahi thi.
"Papa!" Woh pyari si awaaz Rayyan Shirazi ki thi. Us ke siyah baal peshaani par bikhre ja rahe the, Woh aik hi lamhe mein apne papa ko subah se ab tak ki tamam baate bata dena chahta tha. Us ka chehra khila hua tha. Us ki aankhe roshan ho rahi thin.
Unhone apni aankho se zindagi se bharpoor is manzar ko dekha. Un kadi azmaisho ko socha, mushkilat se ghare waqto ko khoja. Woh aansuo se bhare lamhe, woh duao se ghire huye Sazde aur tadhap liye huye nidaye...
"Aur yusra to aise hai jaise aik tang aur taareek surang ke aakhir par phaila hua wasee' sabza zaar."
Suraj asman par tha aur kirne par.
"Yusra aise hai jaise aik chhote se sote se phootta pani ka chashma.."
Unhone colour paint haath mein liya, brush uthaa liya.
"Usar marz hai to yusra aik azeem shifa!"
"Usar zakhm hai to yusra aik azeem marham..."
"Usra sabr hai to yusra aik azeem ajar..."
"Usra aansu hai to yusra aik azeem farah..."
"Usar mehrumi hai to yusra Allah ki azeem ata!"
Safed canvas par rang bikharne lage thay. Aik naya manzar tehleeq ke marahil se guzarne laga tha.
Woh aaghaz tha jise woh dekh rahi thi. Woh ibtida thi jise woh sun rahi thi.
Naam Allah ka thaâ¦
Sirf uska hi thaâ¦
Wahi Mujib...
wohi Khaliq ...
wohi Raziq aur wohi Malik hai.
Jis ne ahata kar rakha apni makhlook ka. Un ki duao aur aamal ka. Unke yaqeen aur imaan ka.
"Be shak har mushkil ke saath azeem asaani hai."
Hawae taiz chalne lagi thi. Aasman par badal phel rahe the, Dharti par amalatas ke darakhto se Sunehri baarish hone lagi thi.
Safhe palat diye gaye the, Aur qalam uthaa liya gaya tha. Aik nai hiqayat ke liye jo waqt ke kisi aur daire par ubharne wali thi.
â¢ï¼´ï¼¨ï¼¥ ＥＮＤâ¢