Chapter 12: •CHAPTER-11•

"𝑺𝒂𝒅𝒊𝒚𝒂𝒂 𝒃𝒆𝒆𝒕 𝒋𝒂𝒕𝒊 𝒉𝒂𝒊𝒏 𝒌𝒉𝒂𝒚𝒂𝒍𝒐𝒏 𝒔𝒆 𝒏𝒊𝒌𝒂𝒍𝒏𝒆 𝒎𝒂𝒊𝒏, 𝒎𝒂𝒈𝒂𝒓 𝒋𝒂𝒃 𝒚𝒂𝒂𝒅 𝒂𝒂𝒕𝒊 𝒉𝒂𝒊 𝒕𝒐 𝒂𝒂𝒏𝒌𝒉𝒆𝒏 𝒃𝒉𝒆𝒆𝒈 𝒋𝒂𝒕𝒊 𝒉𝒂𝒊𝒏"

₊˚𓂃•♡• ⊹𓂅

woh naam jisey woh labon par laane se ghabrati thi, jab samaat mein para tha to kitni wehshat hui thi usey, aur yahi wehshat aaj phir uski neend haram karne mein kamyaab hogayi thi. awwal to usey neend aa hi nahi rahi thi aur jab aayi thi to haqeeqat ne khawab ka roop dhaar kar usey foran se jaga diya tha.

Pasine se bhige wujood ke sath woh sar thame se kitni hi der tak baithi rahi thi. aisa nahi tha ke woh khawabo se peecha chhurane mein kamyaab ho gayi thi magar jab se usne faris ke mamlaat mein dilchaspi lena shuru ki thi, tab se khawab kisi had tak kam ho gaye the.

magar aaj phir hatheli ki pusht se ansoo saaf karte hue usne be sakhta sir utha kar faris ko dekha tha. sad shukar ke woh gehri neend mein tha, sad shukar ke woh uski wajah se be aaraam nahi huwa tha. gehri saans le kar khud ko compose kar ke woh neechay aagai thi.

pooray ghar mein khamoshi ka raaj tha. lights on kar ke woh namaz wale kamre mein daakhil hui thi.

Shardr roshiniyon mein kamrah khamoshi mein dooba tha. aawaz uske phoolay saans ki thi ya uski dharkan ki jo usey kaan mein gunjti hui mehsoos ho rahi thi. din bhar khud ko mazboot zahir kar ke tanhai mein woh har naqaab chehray se utaar diya karti thi .

jo waqt us aayat ke sath guzarta tha, woh haqikat me usey andar aur bahar se aik hi kar deta tha.

woh ab zehen ko maazi se bhataknay ke liye apna focus is aayat par jama rahi thi aur ghhor kar rahi thi un salawon par jo uske andar sir utha rahay they.

pichle aik mah se woh apne andar barhatay hue is shore se peecha chhurane ke liye yahi kar rahi thi. pehle woh naseeb, qismat, zindagi, musaaib, azmaish aur mehroomion ki bhool bhulyo mein ghum raha karti thi. ab sukoon ki talaash mein, woh khud ko in nishanion ke supurd karne lagi thi jo kuch der ke liye hi sahi, usey dukh or

alaam ka dosra rukh dikhaane lagte thay. woh raaz jo huroof mein chhupa tha, woh abhi us par ayaam nahi huwa tha. woh maani jo samandar ki terhan gehray thay, un mein woh ghark nah hui thi.

sab kuch muhim tha ghair wazeh chhupa huwa magar is raat aik sawal is par ayaam huwa tha.

baghair jawab ke bhi woh din ke ujalay ki terhan yun wazeh huwa tha ke kitni hi der tak woh apni jagah baithi reh gayi thi.

'sawal tumhe is aayat tak laaye ga jannat! sawal hi tumhe is ke ma-ani samjhaye ga'

alif par nazar jamaye woh apni jagah se uth khari hui thi.

'Azmaish ki wadiyo me bhatkte har insan ko is ayat par ghor karna chahiye, har mareez ko, har sakin ko, har alir ko, har Aseem ko'

Mrs shirazi ki awaz ise palat kar aane lagi. Is ayat ka sirf wo matlab nahi hai jo ham yaksar padhte hai, ya samjhte hai. Iska aik aur matlb iske huroof me kahi chhupa hai. Aur wo huroof par nazar jamaye khadi thi.

'BESHAK HAR MUSHKIL KE SATH ASANI HAI'

•••

kamray ki deewar geer khirkion par se parday hata kar is ne mrs. shirazi ko dekha jo samne hi wheel chair par birajman koi kitaab haath mein liye baithi theen. Sar uthaye ab woh jannat ko dekhne lagi jo single sofa par un ke samnay baith gayi thi.

"Mein ne kal bohat socha us baray mein woh cup mein chai undhelne lagi.  aur kal raat hi mere zehen mein khayaal aaya. halaanke mein ne is aayat ko baar ha suna hai. baar ha parha hai aur is ke zariye apne naatva dil ko baar ha tasalii bhi di hai, magar mein kal pehli baar is par heran hui hoon." Usne  chai ka cup mrs. Shirazi ko paish kiya tha .

woh bohat tawajah aur yaksoi se sunte hue is ki aankhon mein dekh rahi theen. jannat kahan tak pahonch gayi hai. shayad woh bhi jana chahti theen.

"aayat mein mushkil ke liye lafz usar [اُسار] istemaal huwa hai. jis ka matlab hai aik mushkil.... is hisaab se dekha jaye to aasani ke liye bhi yaha lafz yusar [يسر ] istemaal hona chahiye tha. magar Allah ne lafz Yusra [یوسرا ] istemaal kiya hai, alif ke sath!"

ab woh apne cup mein chaye nikaal rahi thi.

pehlay mujhe laga ke shayad یسرا (Yusra ) usar ki hi jama ho ga, magar jab mein ne is ke jama mufferedaat waghera dekhe to maloom huwa ke yeh woh bhi nahi hai. ‫usar aik aasani, yusri do aasaniya aysar do se zayed aasaniyan. .. to phir yushra kya hai?" Us ne sir utha kar mrs shirazi ko dekha.

"yeh mera pehla sawal hai. agli baar mein is sawal ka jawab dun gi aap ko" ab ke woh bhi muskarayi. mrs. Shirazi ne mohabbat se uske gaal par haath rakha.

"mujhe laga shayad tum kaafi waqt logi"

"Mujhe bhi yahi laga tha. magar kal raat jab mein baar baar usey parh rahi thi, baar baar use khoj rahi thi to is waqt ehsas huwa, ayaat ke mafhuum bhi jaisay parton mein chhupay hotay hain. gehra matlab samajhney ke liye geherai mein utarna parta hai. aap ne theek kaha tha, tadabbur panay ke liye ayaat ko un ka waqt dena parta hai"

"mujhe yaqeen hai tum uska jawab bhi pa  logi..!"

"haan, mein aisa zaroor karlugi, magar aap se aik shart par hi share karoon gi .

"Aur woh shart kya hai?" unhon ne dilchaspi se poocha. kuch soch kar, is ne mrs Sharazy ki taraf dekha. nichala lab danoton taley ragadte hue, gehra saans le kar khud ko jaisay anay walay lamhay ke liye tayyar kya. kuch himmat mujtma ki.

"mein aap ke potay se milna chahti hoon"  Usne itna achanak kaha ke mrs. Shirazi apni jagah sakit baithi reh gayi. unhon ne jannat ko be yakeeni se dekha .

"mein ne ghalti se aap ki aur faris ki guftgu sun li thi"  jhuki nigahon se usne apne jurm ka aitraaf kya .

"mein muntazir rahi ke shayad aap khud is silsilay mein mujh se baat karen gi magar,,,," mrs Sharazy khamosh ho gayeen.

"mein aap ke potay se milna chahti hoon, auntie mein aap ke liye...!" unhon ne sratha kar jin nigahon se jannat ko dekha, woh chup hogayi. kitna dard tha un aankhon mein.

"Faris ko bura lagey ga, woh tum se bhi naraaz ho jaye ga" aur jannat unhen bta nah saki ke faris to roz awwal se khafa hai.

"Mein usey khabar nahi honay dun gi." Usne yaqeen dehani karai.

"usey phir bhi khabar ho jaye gi woh yeh baat bardasht nahi kar paye ga ke is ki biwi Hamad ke betay se miley."

"aisa kuch nahi hoga, aap fikar nah karen, mein sab sambhaal lon gi, aap mujhe address bitayen mein khud...!"

"nahi jannat mere bachay nahi. unhon ne usay toak diya,

"Jane do usey" woh jaisay is topic par mazeed koi baat nahi karna chahti theen. koi wazahat nahi dena chahti theen. kuch batana bhi nahi chahti theen .

aik hekiyaat un ki bhi to thi. faris ki bhi us ke bhai aur bachay ki bhi.

"Auntie pleaseee"

"Faris ko bohat bura lagey ga, tumhe apne shohar ke ehsasat ka khayaal hona chahiye." jannat inhen hamdardi se dekh kar reh gayi.

(Aakhir koi insaan apne yateem bhateejay ke liye itna sangdil kaisay ho sakta hai?)

"Nahi, woh sangdil nahi hai. usay sangdil mat kaho" mrs Sharazy ne jaise uski soch parh li thi. jannat herat se inhen dekh kar reh gayi.

"Bohat hassas tha woh jab pathar huwa to poori terhan se huwa. be hiss sun-hwa to har kisi ke liye huwa. usay ilzaam mat do jannat mein bhi nahi deti."

unhon ne chehray ka rukh mourr liya tha. jannat apni jagah sunn baithi reh gayi thi.

•••

"Mein billi palne ka soch rahi hu"

Cufflinks utar kar dressing table par rakhte huye Faris Wajdan ne use sard nazro se dekha. wo abhi-abhi jaroori meeting attend karke ghar pahucha tha. Aur hamesha ki tarah Jannat kamal uske sar par sawar ho chuki thi.

"Koi jarurat nahi hai!" Jannat ne dekha uski nam aankhe betahasha surkh ho rahi thi.

"Tumhari zaroorat ki nahi, apni zaroorat ki baat kar rahi hoon."

"is ghar mein koi janwar nahi aa sakta."

Faris ka lehja hatmi tha. inkaar pathar par lakeer jaisa. roz hi woh koi na

koi farmaaish karti thi. roz hi woh be rehmi se radd kar deta tha.

"kyun nahi aa sakta?" woh behas ke mood mein aagai.

"kyun ke mein nahi chahta."

"Aur tum kyun nahi chahtay?"

"Mein jawab daine ka paband nahi."

"Mein jawab daine ka paband nahi." jannat ne hubahu uske andaaz mein naqal utari. faris wajdan ne ruk kar use kadhe tewaro se ghura. yeh larki ab apni had se badh rahi thi.

"Saari pabandiyan to sirf mere liye hi hain na?" ruk kar usne tasuf se sir hilaya.

"mujhe lagta tha tum mere liye hi be reham ho, yaha to bechare janwar bhi tumhari nafrat se mehfooz nahi hain!"

woh zabt kiye khamosh raha. jannat ko yeh khamoshi nahi chahiye thi.

"To ab mein yeh samjhun ke tum bhi un das percent logon mein shaamil ho jinhein billiyan achi nahi lgtin"  is ne baat barhai .

"haan hoon koi aitraaz?" woh jhnjhlaht ka shikaar sun-hwa tha .

"ba khuda! koi Allah ki itni pyari takhleeq ko na pasand kaisay kar sakta hai? yaqeenan tum ne billiyon ko haath bhi nahi lagaya ho ga unhen qareeb se dekha bhi nahi hoga?"

woh wordrobe se kapray nikale wash room mein ghus gaya tha. jannat darwazay ke paas aakar khadi hogayi thi.

"Tum billiyon ke sath thod sa waqt guzaar kar to dekho, bohat acha mehsoos karo ge"

andar shirt utarte hue faris wajdan zair lab barbaraya.

"haan! bohat acha mehsoos karoon ga." andaaz mein jhunjhalat numaya thi .

"Mein janti hoon tumhe mere ehsasat ki koi qader nahi hai. lekin billi wali baat par mujhe tumhara aitraaz kuch theek nahi lag raha, theek hai! yeh ghar tumhara hai. lekin mein bhi to tumhari biwi hi hon. kaghazi hi sahi, itna to haq

rakhti hi hoon ke.." woh ruk gayi.

"Tum sun bhi rahe ho mein kya keh rahi hoon? darwaaza khul gaya tha .

Siyah jeans par siyah shirt mein malbos woh bahar agaya. wardrobe khole usne safaid rang ka jumper nikala.

"Mein keh rahi hoon ke, aik choti si billi..!"

"Yeh kya billi billi laga rakhi hai tum ne? jab mana kar diya hai ke nahi aa sakti to nahi aa sakti! aur yeh tumhara ghar nahi hai jahan tum apni marzi chala sako"

Bigde tewaro ke sath usey daant kar woh kamray se nikal gaya tha. jannat zabt kiye khari reh gayi. phir dimagh ne thoka diya to tan fun karti is ke peechay bahar aagai.

"Jab mein tumhari biwi hoon hi nahi, to yeh shohar wala roab kyun dikhata ho mujhe?" seedhiyan utar te faris wajdan ke qadmon ki harkat thami. ruk kar sar utha kar is ne ghusili nazron se jannat kamaal ko dekha.

"Mera matlab hai...!" Uske karre tewaro se kuch khaif ho kar is ne foran baat sambhali.

"Maheman hoon mein chand dinon ki is wajah se hi lehaaz kar liya kro!"

lehjey mein mithaas bhar kar, usne palken jhhapkayi.

"mere nana ke ghar mein mere paas teen billiyan theen. bohat waqt guzaraa hai mein ne un ke sath. yaqeen karo shor nahi karti hain, gand bhi nahi machati. pyar deti bhi hain, layte bhi hain. bohat acha waqt guzarta hai un ke sath."

"Tum billiyo ke sath waqt guzarti ho?" Faris ki aawaz mein ab ke halka sa sadma tha.

"Nahiii guzara to nahi hai." Usne safai se jhoot bola.

"Lekin ab guzaarna chahti hoon, Mrs. Yazdani ki persion cat ke chhootey chhootey bacchey"

"BAS!"  faris ne haath utha kar usay rok diya.

"Aaj ke baad tum mrs. Yazdani ke ghar nahi jao gi."

jannat ka mun sadme se khula .

"Magar kyun?" woh ahtja ja chillayi.

"MEIN NE KAHA NAHI JAO GI TO BAS NAHI JAO GI" Uska lehja kaafi se ziyada sakht huwa tha.

"Tum to aise react kar rahe ho, jaise mein billi tumahre sir par laa bithaungi. itna bara ghar hai tumhara, aur dil ba khuda! tumhara dil choonti jitna bhi nahi hai."

"Mein bata raha hoon, agar tum ne ghar mein pet lane ki koshish ki to mujh se bura koi nahi ho ga."

"Tum se bura waise koi ho bhi nahi sakta." uske muh se nikal gaya .

qadam uthatay faris wajdan ne lab bhinch kar usay dekha. woh railling par jhuki hui thi.

"Mein billi ka naam farisha rakhon gi"

"Faris ki mo'annas farisha hui na ya Faresa?"

Uski aankhon mein shararat thi, labon par muskurahat goya azaim wazeh thay, woh faris ke hukum ko kisi khatir mein nahi laa rahi thi. woh ruk gaya. gehri saans le kar jaise apne mushtael asaab par qaboo panay ki koshish ki. jannat taizi se seedhiyan utar kar uske paas aagai.

"Mein jaan gayi hoon, tum aisay nahi manu ge. ab mein auntie se hi baat karoon gi."

Itra kar kehte woh seedhiyan utrne hi lagi thi ke faris ne usey baazu se pakar kar aik jhatkay se roka. Uska poora wujood hil kar reh gaya.

"KYA CHAHTI HO TUM?" daant pees kar khatarnaak tewaro ke sath, zara sa usks taraf jhuka.

"Billi ke alawa!"

jannat ke labon par fatihana muskurahat bikhar gayi.

"Ahmm!"  Use khalaa mein yun nigah dorhayi jaisay kuch soch rahi ho.

"Mujhe kya chahiye? mujhe kya chahiye.."

shahadat ki ungli thorhee par mutharrak thi.

"oh haan! mein chahti hoon aaj tum mujhe dinner par le jao. khud se le jao! mujhe auntie se na kehna pare."

chand lamho tak usey ghoorte rehne ke baad woh usey jhatkay se chhore kar sidiyan utar gaya.

"To kya mein isey haan samjhu?" woh aqab mein chillayi.

"Aaj ki raat mein 9 bajey tayyar rahoon gi , fariss!"

Aur faris ujlat mein qadam utha taa saddar darwaaza uboor kar gaya tha.

---- •♡• ----

Thanks for reading!! 🫰🏻

Do vote & comment

A huge thanks for those who vote & comment!! 💝