â¢â¢â¢
siyah rang ka halke kaam wala frock us par kaafi jach raha tha. shehad balon ko jude ki shakal diye, light sa makeup kiye, woh khush gawaar tasurat ke sath faris wajdan ke samne italian restaurants mein mojood thi. Khana serve kiya ja chuka tha.
black two piece suit mein malboos woh pathirelay tasurat ke sath hamesha ki tarah khamosh betha tha. jannat khana maze le le kar kha bhi rahi thi aur baatein bhi kar rahi thi.
"Auntie ne honeymoon ki baat ki thi tum ne kaha tha tum socho ge, kuch plan karo ge, ab jab tak mein yahan hoon, jab tak kuch plan karo yaar, thora mein bhi enjoy krlon gi, outing ho jaye gi meri bhi"
faris ka sar dukhne laga. Wo adhey ghante se woh uski baatein sun raha tha. majaal hai jo woh aik lamhay ke liye bhi khamosh hui ho. kuch soch kar jannat ne bag se mobile nikaal kar, faris ke samnay screen lehrai.
"Guess karo, mein ne tumhara contact number kis naam se save kiya hai?"
band muthi par thorhee jaye woh sard nazron se usey daikhta raha. doosre haath ki ungaliyan maiz par mutharrak theen. goya woh muntazir tha ke kab mohtarma khana khatam karen aur woh wapsi ki raah le.
"Tum ne ghalat guess Kiya." khud hi jawab de kar jannat ne screen par contact list khol kar samne ki. be shumaar neelay pehlay dilon ke darmiyan likha tha.
"My kaghazi husband"
woh hans di. faris lab bhinch kar reh gaya.
"Tum ne kisi naam se save Kiya hai mera number?" ab woh is se pooch rahi thi .
"Mein fazool logon ke number save nahi karta." woh seedha ho betha.
"Mein to karti hoon!"
jabray bheenchey woh khirki se bahar dekhne laga. aasman par baadal phail rahe they.
"Har jagah se mujhe block kiya huwa hai tum ne, number dene ka faida?" Tissue paper se haath saaf karte hue woh bas chand lamhoon ke liye khamosh hui thi, phir boli.
"Dosti karo ge mujh se? bohat achi larki hoon mein, aakhri dam tak sath nibhaun gi." faris ne aik lehze ke liye usey dekha phir maiz par kohniyan jamate hue agay huwa.
"Aur ye dosti ki offer tum kitney logon ko kar chuki ho?" jannat ke labon se muskurahat uran chhu ho gayi.
"aisay hi khayaal aaya to socha poochh lon" uski kefiyat se Mahzooz hotay hue is ne apni baat jari rakhi.
"Kahin tumahre ex husband ne isi wajah se to tumhe divorce nahi de di?"
"Tum ab apni had cross kar rahe ho faris!" Jannat ka chehra jazbaat ki shiddat se surkh ho chuka tha.
"had cross nahi kar raha, tumhe had mein laane ki koshish kar raha hoon." kaat daar lehjey mein kehte hue usne jannat ki taraf dekha .
"Talaq usne di thi ya tum ne li thi?"
jannat ko yun mehsoos huwa jaise uski gardan par paon rakh kar musla ja raha ho. faris ka har sawal aisa hi tha. aziat ki do dahari talwar ki tarah.
"Tumhari badi 6 bahene hain. un mein se koi aik bhi tumhari shadi mein shareek nahi hui. jahan tak mujhe ilm hai, khasa bara khandan hai tumhara magar koi aik rishta daar bhi tumhari shadi par nahi tha masiwaye sayra auntie ke."
muthiyaan bheenchey, lab baaham paiviest kiye woh zabt ke karre marahil se guzar rahi thi. itnay achay mood ke sath use dinner par laa kar woh is terhan ki baatein kere ga, agar usay ilm hota to yaqeenan woh nah aati.
"Mere kirdaar par mat aao faris! mein tumhe warn kar rahi hoon." Usne usey baz rakhnay ki koshish ki thi.
"Warna kya karo gi?" labon par istihiziya muskaan liye usne bhanwain uchakka kar usay lalkara.
gussa gham be basi jannat ne halaq mein ubhartay aanso-on ke phandey ko baa-mushkil neechay utaara. Bahar halki halki boonda Bandi shuru ho chuki thi.
"Tumhari maloomat nikalwana mere baen haath ka khail hai, lekin mein tum mein itni si bhi dilchaspi nahi rakhta ke apne admion ko tumahray hawalay se order deta phiru! lekin jis roz aisa karoon ga us roz tum kisi ko muh dikhaane ke qabil nahi rahogi. is liye aakhri warning de raha hoon mein tumhe, mere ghar mein rehna hai to apni hudood mein raho! yeh aakhri warning hai."
waiter ko bulaa kar payment adaa kar ke woh jane ke liye uth gaya tha aur jannat kamaal apni jagah baithi reh gayi thi. gaal par phisalti lat ko kaan ke peechay urrat tey hue is ne ansoo peenay ki nakaam koshish ki thi.
woh faris ke sath aayi thi, magar woh faris ke sath wapas nahi gayi thi. woh restaurants mein apni jagah bilkul khamosh baithi baar baar tissue se aankhe ponchh rahi thi. peshani par bikhar te balon ko samaitt rahi thi. khushk labon ko kaat-ti aur khirki se bahar shiddat se barasti barish ko yun dekh rahi thi jaisay woh yaha aayi hi is liye thi. tan tanha isi barish ko enjoy karne, jo uspar ab wehshat si taari kar rahi thi.
Bil akhir apna hand bag kandhay par daaltay hue woh zabt kar ke uth gayi thi. seedhiyan utar kar is ne main road ki janib qadam barha diye. parking area ki taraf usne jane ki koi koshish nahi ki thi ke woh janti thi faris ab tak ja chuka ho ga.
agar nah bhi gaya hota to woh tab bhi uske sath jane ke liye fial-waqt amaada nahi thi. koi aap ke mushkil se theek hote zakhamo ko aik hi lamhay mein udhair kar rakh day to aap yahi karte hain. woh bhi yahi kar rahi thi .
rona bhi bohat aa raha tha aur woh rona bhi nahi chahti thi. ghar jane ki bhi jaldi thi aur ghar pohanchna bhi nahi chahti thi. woh foot path par qadam uthai agay bherne lagi. mobile bag mein tha. woh driver ko call kar sakti thi magar driver bhi to faris ka tha.awaz zara taiz hui to us ne bhi raftaar barha li.
'Allah tumhe is ki tumhe woh saza dega jannat jo tum taa Umar yaad rakhogi!'
sadak kinare, uske qareeb hi faris ki gaadi ruk gayi thi. woh jhuke sir ke sath khamoshi se qadam uthaati rahi. beech rastay mein jab faris ne usay baazu se pakar kar roka to use darashti se apna aap chhoraya tha.
"Adhe ghante se gaadi mein tumhara intezaar kar raha hoon, aur tum!
Uska Para charha huwa tha. gussa, narazgi, khafgi sab bhula kar jannat sadgi se faris wajdan ko dekh kar reh gayi.
'adhay ghantay se woh is ka intzaar kar raha tha. adhay ghantay se...! yeh moujza kab, kaisay kyun kar numa huwa?'
"Mein ne soch liya tha ke ab tum se Talaq le kar yaha se chali jaoon gi..!"
kharray kharray barray aaraam se is ne haath ki pusht se ansoo saaf kiye.
"lekin ab iradah multawi kar diya hai. tum intzaar kar rahay thay mera. yeh aik khush aaind baat hai. Siddiqui uncle ne kaha tha tum intzaar kisi ka nahi karte."
aik istehqaq se is ne gaari ka darwaaza khoola. aik ada se baith bhi gayi. faris ki saari dhamkian dhari ki dhari reh gayeen. woh hakka bakka apni jagah khara reh gaya .
"kya huwa? ghar nahi jana kya?" ab ke gaari ka sheesha neechay kar ke jannat ne apna sir bahar nikala. lab bhinch kar is ne jannat ko dekha .
"Tumhari wajah se jitne ansoo mere zaya hue hain, un ke badlay aik ice cream to laazmi banti hai.!" woh keh rahi thi. khud par zabt ke pehray bithatay hue woh gaadii mein baith gaya. darwaaza qadray zor se band huwa. apna bag khangaltey hue jannat ne yak dam hi zich ho kar usay dekha.
"baqsh do in darwazo ko! Allah ke liye!"
"Tum apna mun band rakho."
"haan to mein ne kuch kaha? auntie hi kehti hain tum be jaan cheezon ka bohat khayaal rakhtay ho. aik kharaash tak nahi aane dete apni gaadi ko; magar yeh darwaaza kya soutela hai?"
woh lab bheench gaari drive karne laga. jannat bhi khamoshi se bahar dekhatii rahi thi.
â¢â¢â¢
subah ke saat bajey uski aankh apne mobile ki aawaz par khuli thi jo glass table par para musalsal baj raha tha. uth kar baithtay hue is ne aik tayranh nigah kamray mein dorhayi. faris abhi tak so raha tha. ghaliban aaj uska off tha. Usne neendwar aankhon se screen par jagmug karte number ko dekha. phir call receive karli.
"salam alaikum jannat! kaisi ho?"
"Walaikum salam khaala!" Uljhe bikhare balon ko samaitt kar woh uth baithi. aawaz neend se bhaari thi.
"Mein theek hoon. aap kaisi hain? sofay ki pusht se kamar tika kar usne angrai li.
"Tumhari aawaz ko kya huwa hai, tabiyat theek hai tumhari?"
"Tabiyat ko kuch nahi huwa, abhi so kar uthi hoon."
"Mein aisey hi pareshan hogayi." Saira khaala ko tasalii si hui.
"Ghar mein sab theek hai na? faris kaisa hai?"
"achha hai !" " kan akhion se faris ko dekhte hue usne kaha.
"Kheriyat hai khaala? itni subah subah call Kiya aapne?" faris ne takiya apne muh par rakh liya. woh uth kar balcony mein aagai.
"Agle haftay sidra ki shadi hai jannat! kya tum bhool gayeen?" unhon ne yaad dilaya, Jannat munjamad hui. khushk lyon ko tar karte hue is ne halaq mein ubharti gilty ko baa-mushkil neechay utaara.
"Mera khayaal tha tum aik do haftay pehle hi aajao gi magar yahan to mujhe hi tumhe yaad dilana par raha hai."
"Mujhe yaad tha khaala!" Daena hath railling par thehar gaya. Uske vahm o gumaan mein bhi nahi tha khaala use sidra ki shadi par invite karen gi. aur sirf invite hi nahi karen gi, balki yeh umeed bhi rakhen gi ke woh shirkat bhi kere gi.
"To phir kab aa rahi ho tum?"
Jawaban woh kuch keh nah saki saira khala ke bohat ahsaan they us par aur ab jab un ki ekloti beti ki khushi ka mauqa tha to....
"Wahan to woh sab bhi to hon ge khaala" uska rukh ab glass door ki taraf tha. woh andar nahi dekh sakti thi magar andar jo mojood tha woh usey hi dekh raha tha.
be qarari se nichala lab danoton taley dabay, muztarib nigahon se yahan wahan dekhte, baen haath se sweeter ke button ko chairtay woh is lamhay bohat pareshan lag rahi thi.
"bilaa shuba honge magar use tumhe kya lena dena? tum apne shohar ke sath apni cousin ki shadi attend karne aa rahi ho. akeli nahi ho ke koi" kash woh syra khaala ko btaskti ke woh ab bhi akeli hi hai. woh un sab ka saamna aaj bhi nahi kar sakti.
"mere liye yeh bohat mushkil hai."
"Tum aana nahi chahati? Saira khaala ke lehjey mein ab khafgi thi.
"Aana chahti hon khaala magar aap to janti hain sab.." usne muthiyaan bhinch kar jaise apni kefiyat par qaboo pane ki koshish ki thi.
"Meri ekloti beti ki shadi mein shirkat nahi karo gi tum?" saira khaala ghamghin ho gayeen.
"jannat! woh tumhari shadi mein tumhara saya bani rahi tumhara har kaam usne kya, aur jab is ki baari aayi hai to tum tum muh mourr rahi ho?"
jannat ki aankhon ki nami kuch aur gehri hui itni gehri ke har manzar dhundlaa gaya.
"Mein mein aon gi. mein faris se baat kar ke aap ko batati hoon" usne baat semathnay ki koshish ki.
"Theek hai..!" chand lamhoon ki khamoshi ke baad unhon ne phone band kar diya.
jannat kitni hi der tak wahan khadi rahi. palke jhapka kar kar aanso-on ka har assar mitate hue, jab kamray mein daakhil hui to faris ko dekh kar ruk gayi. Trouser ki pockets mein haath daaley, neend se baydaari ke marahil tay kar chuki aankhon ke sath woh usey hi dekh raha tha magar jis cheez ne jannat ko chonka ya tha woh is ke labon par dahine gaal ki janib uthi hui muskurahat thi. (Smirk)
aur uski yeh muskurahat jitni bhi khubsoorat thi, jannat kamaal ko ghabrahat mein mubtala kar gayi. aik uchhkti nigah us par daale woh kamre se nikal gaya tha.
Uski tanzia nigahain aur muskurahat ka kya matlab? Tarah tarah ke sar uthatay andeshon ko jutlatay hue woh khaala ke baray mein sochnay lagi.
woh shadi mein shareek bhi nahi hona chahti thi aur khaala ko naraaz bhi nahi karna chahti thi. be qarari se ungelian Mamodte hue woh tehalne lagi. kya kere woh ab?
is aik masle ka aik hal tha magar woh hal faris ko challenge karne ke mutradif tha. guzashta shab hone wali talkh kalami ke baad is ne faisla kya tha woh is ke mamlaat mein mudakhlat nahi kere gi. magar ab Uski dhamkian aur chubte sawalo ko woh bholi nahi thi magar phir!
â¢â¢â¢
woh pandrah dinon ke liye karobari doray par London ja raha tha. kuch zaroori meetings attend karni theen aur apni company ki London branch ke mamlaat ko bhi dekhna tha. ticket confirm hui to is ne jane se do roz pehle raat ke khanay par mrs. Shirazi ko apne schedule se aagah kiya.
"Akele kyun ja rahay ho, jannat ko bhi sath le jao." unhon ne itna achanak kaha ke faris ne yak dam sar utha kar jannat ko dekha. woh atraaf se yaksar be niaz plate mein chaawlon si khailnay lagi.
"Yeh kya kere gi mummy?
"Iski bhi outing ho jaye gi, kaam mein tum itne masroof ho ke honeymoon bhi plan nahi kar sakay, kyun jannat! theek keh rahi hoon na mein?"
"jee, jee bilkul theek keh rahi hain aap." Usme foran takid ki. faris usey dekh kar reh gaya. guzashta shab wazeh warning ke bawajood is larki mein itni himmat thi ke woh aik baar phir uski maa ke zariye apna matlab nikalwa rahi thi. faris ki aankhon mein khoon utar aaya.
"mummy! mein waha bhi masroof hoon ga. fursat se phir kabhi programme banalen ge." Usne mrs. Shirazi ko qaail karna chaha. sath hi is ne jannat kamaal ko khatarnaak tewaro ke sath ghora tha. aankhon mein Ghaiz o gazabb ki lehar thi. dhamki bhi thi.mere khayaal se woh is ke tasurat se khaif ho kar bol pari.
"mere khayaal se faris theek keh raha hai auntie!"
"khaak theek keh raha hai" mrs Shirazi khafgi se boli.
"Tum isey nahi janti mein janti hoon, kaam ka bahana yeh baar baar karega, aur har baar hilay behano se talta rahega. ab ke unhon ne apne bete ko khasay karre tewaron se ghoora tha.
"Jannat tumahre sath London ja rahi hai aur yeh mera aakhri faisla hai."
"Aap ko yaha akela chhorh kar kaise jaye auntie?"
faris ke tasurat ab is ki reerh ki haddi mein sansnahat dora rahay thay. aaj is ki kher nahi!
"Nokaro ki fouj ke sath mein akeli nahi hoon" unhon ne jaisay hatmi faisla sunaya.
"jannat! apni tayari karo, aur tum.." unhon ne faris ki taraf dekha.
"jannat ki ticket book karwao." lehja tahak mana tha. faris ne nahi asbat mein sir hilaya nahi nafi mein. chand niwale kha kar aur uth kar chala gaya.
Us raat jannat kaafi takheer se kamray mein aayi thi yeh soch kar ke ab tak woh so chuka ho ga magar na sirf woh jaag balkay aatish fisha bana is ke intezaar mein tehel bhi raha tha. ab ke woh sahih maeno mein khaif hui thi.
"woh m-mein ne nahi kaha. auntie ne khud hi..."
"Jhoot mat balo!" Faris ne darshti se uski baat kaat di.
"Tumaray in ochhe hathkando se acchi tarah waqif hu me! pichhle do mah se tum yahi to kar rahi ho."
jannat chup hogayi.
"mein ne tumhe warn kya tha mujh se faaslay par raho.." woh zeher fan lehjey mein bola.
"woh aakhri warning thi jannat kamaal! aakhri warning!"
halaq mein ubharti gilty ko neechay utaartay hue jannat ne jaisay khud ko paish anay wali har situation ke liye tayyar kar liya. ziyada se ziyada kya kere ga woh? gussa dikhayega, jhagda kere ga, kamray se nikaal dega? Talaq woh de nahi sakta, ghar se woh nikaal nahi sakta.
Uske bhagtay dorrtay zehen ko us lamhay jhatka laga jab faris ne is ke samnay apne manager ko phone kar ke apni ticket cancel karwane ka kaha. doosri taraf se ghaliban wajah poochi gayi thi, daleele bhi di gayi theen, kyunkay jis kaam ke liye woh London ja raha tha, woh kaam be had ahem tha.
"Meri wife ki cousin ki shadi hai. hamein woh shadi attend karni hai." jannat ki aankhon mein dekhte hue usne jaisay dhamake kiya tha. woh apni jagah sakit khari reh gayi thi.
"To miss jannat! umeed hai tumahare sath tumhari tarah khail kar mujhe maza aaye ga. woh talkhi se muskuraya tha. aur jannat kamaal agle kayi lamhoon tak palken tak nahi jhapka saki thi.
---- â¢â¡â¢ ----