Chapter 91: ּ ֶָ֢.CH90

•••

Sara din apne aap mein salgte uljhte rehne ke baad us ne mobile uthakar Jameela Dawood ko call kar di thi.

"Faris, aap ka kya lagta hai?"

Mukhtasar salaam dua ke turant baad us ne sawaal kiya tha. Jameela Dawood takhir se apni jagah khadi reh gayi.

"Aap ne mere dad se kaha tha ke aap uski rishtedaar hain. Faris ab keh raha hai ke aap uski rishtedaar nahi hain..."

Is se pehle ke woh baat jari rakhti, Faris ne usse phone le liya tha.

"Yeh kya badtameezi hai Faris! Woh cheekh parhi. Hello..."

Jameela Dawood phone kaan se lagaaye, ek dum se pareshan ho gayin. Us ne mobile kuch thusse se bed par pheenk diya tha.

"Kya karne ki koshish kar rahi ho tum?" Aankho mein khoon utar aaya tha.

"Jo sawaal tum nahi sunna chahti thi, wohi sawaal Jameela aunty se kar rahi hoon..."

*Unhein is sab mein mat ghasito!.."

"Kyun na ghasitu? Haan? Mera rishta unho ne manga tha dad se yeh bata kar ke woh tumhari rishtedaar hain. Yeh kisi rishtedari hai? Dhoka hua hai mere saath."

"Kaisa aur kahan ka dhoka?" Woh cheekh utha.

"Tum mujhse shaadi karna chahti thi. Tumhein is baat koi farq nahi padta tha ke main apne parents se rabte mein hoon. Tum ne mujhse kaha tha main tumhare dad se khud rishtay ki baat kar sakta hoon. Us waqt mere khandan, family, maa baap, rishtedar tumhein kisi ke baare mein kuch bhi jaanne ka shauq nahi tha. Par ab achanak tumhara haq ban gaya hai iss tarah ke sawaalat karna?"

Woh apni jagah saakt khadi thi.

"Shadi ka faisla mera tha. Is baat ka taana de rahe ho tum mujhe?"

Woh usay dekh kar reh gaya. Us ne kya kaha tha? Woh kya samajh rahi thi?

"Sach kehte hain, aurat mohabbat ka itiraaf kar ke khud ko mard ki nazro me gira deti hai..." Woh jhatkay se palat kar apne kamre mein band ho gayi. Woh kitni der tak us band darwazay ko dekhta raha, phir us ne Jameela Dawood ko phone kiya.

"Mummy kya aap Adina ka number block kar sakti hain?"

Woh pehle se pareshan ho rahi thi. Uske is mutalbe par aur zyada ho gayi. Shadi hall mein mulaqat ke baad se unhein shak tha koi na koi baat zaroor hai lekin Faris ne unhein mutmain kar diya tha.

"Main sab theek karne ki koshish kar raha hoon. Jab tak woh samajh nahi jaati, tab tak.." us ne ruk kar aankhon ko mila. Woh nahi chahta tha ke Adina Zubair ki Jameela Dawood se dobara kabhi mulaqat bhi ho.

"Kya baat zyada barh gayi hai?"

"Woh jaan-na chahti hai mere parents kaun hain?" Unhein shock laga. Yeh behas unke darmiyan pehle kabhi nahi aayi thi. Ek dum se aisa kya hua tha ke woh un baaton ko ahmiyat de rahi thi jin baato par us ne kabhi sawaal bhi nahi uthaya tha.

"Shadi ke Dedh saal baad woh mujh se mere maa baap ka pooch rahi hai..." Uski awaz me karb tehra tha, kitni dair woh kuch der tak kuch keh nahi saki.

"Tumne kya socha hai?" Woh janti thi un baaton ka asar us ki shaadi shuda zindagi par par raha tha.

"Kuch bhi nahi!" Woh kuch be-basi se goya hua.

"Kehne ko kuch hai bhi nahi! Apna khayal rakhiye ga. Jald raabta karunga." Us ne baat khatam kar di.

Woh wash basin ke samne khud ko aayine mein dekhte hue kitni der tak khada raha.

"Khud ko sahi ma'ino mein mar kar dikha sakta hoon main!"

Thanday paani se baar baar chehra dhoota raha.

"Main pichle pandrah saalo se chup hoon. Mazeed chup reh sakta hoon...." Lab bheench kar basin par giraft jamaata sar jhuka gaya.

"Isay jaane do...." Azam Shirazi ki awaaz gonj ban gayi. Woh ab aayine mein khud ko dekh raha tha. Shikast wazeh thi. Azadi ka ek jhoota gumaan tha jiske peeche woh chalta raha tha. Haqiqat woh nahi thi jo woh samajhta raha tha. Apne andar ke shor ko sunte us ne sar jhuka liya. Pidiya kabhi nahi kehi thi. Woh aaj bhi, kuch faislo aur waadon ki giraft mein, Azam Shirazi ka hi qaidī tha. Bas inkishaaf der se hua tha. Bohat zyada der se hua tha.

Adina zubair ki shikayatein barhti ja rahi thi. Ikhtilafat barhte ja rahe the. Use Faris ki har baat par aitraaz hone laga tha. Chhoti chhoti baaton par woh ghar ka mahaul jahannum banane lagi thi. Mushtal ho kar tod phod karne lagi thi. Us ke sawaal zyada ho gaye the. Bahas zyada ho gayi thi. Shukook o shubaat bhi. Aur aksar usse jawab nahi deta tha. Khayaal hota tha woh chup rahega toh baat aage nahi badhegi. Woh ladh jhagad kar apni bharas nikaal kar chup ho jaayegi. Woh chup zaroor ho jaati thi lekin agle din phir se shuru ho jaati.

Faris samajh nahi paa raha tha is tarah use kya ho gaya tha. Kyun woh itni badgumaan aur rude ho rahi thi. Kyun woh is rishte ki parwah nahi kar rahi thi. Jitni shiddat se chahti rahi thi, ab utni hi shiddat se nafrat karne gayi thi. Use Faris mein aib nazar aane lage the. Uski zaat se ikhtilaf hone laga tha. Woh apne kisi bhi masle ko hal nahi kar pa raha tha. Aksar aisa hone laga woh bataye baghair hi taiyar ho kar chali jaati. Raat takheer se ghar aati. Mobile off rakhti. Messages nazar andaz kar deti. Woh tahmmahul se aitraaz uthata toh aapay se baahar ho jaati.

"Hamari shaadi hui hai. Is ka matlab yeh nahi hai ke hum aik doosre ko qaid kar ke rakhe ge."

Badmazgi zyada na ho, us ne rok tok tark kar di lekin zyada der tak aisa na kar saka ke wardrobe se kapde nikalte uske hath me aisa perfume aa gaya jiski kimat uski ek mah ki tankhwah ke barabar thi. woh is qadar qeemti cheez dekh kar lamhe bhar ke liye sakte mein aagaya tha. Lounge mein ja kar perfume dikhakar poochha toh woh Ek dum se garbara gayi.

"Friend ne gift kiya hai."

"Itna mehenga gift?"

"Jo cheez tum afford nahi kar sakte us ka matlab yeh nahi hai ke mere circle ke log bhi nahi kar sakte..." Use ghussa aa gaya.

"Tumhein nahi lena chahiye tha." Faris ki bardasht ab khatam ho rahi thi. Woh zabt kar ke muri.

"Kyun nahi lena chahiye? Meri dost hai, mera tohfa hai. Tum is tarah ki baat mujh se kaise keh sakte ho?"

"Adina, kya ho gaya hai tumhe?"

"Wah, ab main buri ho gayi hoon? Mujh kuch ho raha hai? Tum ne khud ko dekha hai? Ek ek cheez ke liye tarsa kar rakha hua hai mujhe, mere paas bohat acche aur well off families ke rishte aa rahe the."

"Main ne sab ko tumhari khaatir inkaar kar diya aur tum tum ne mujhe aaj tak diya hi kya hai? Is darbay numa flat main rakh kar tum samajh rahe ho tum ne mera har haq ada kar diya?"

Woh ghusse aur ishtial mein bolti ja rahi thi. Woh usay dekhta ja raha tha. Usay sunta ja raha tha. Us ka aik aik lafz us ke aasab par bhaari par raha tha. Usay apne haws mfluj hotay hue mehsoos ho rahe thay.

"Kya yeh wohi Adina thi?" Us ne mazeed koi baat, koi behas na ki. Usi waqt ghar se chala gaya. Sham das bajay wapas aaya toh woh ghar mein nahi thi. Uska mobile bhi off tha. Lounge ki tareeki mein beta usko intezaar karta raha. Takreeban aik bajay woh wapas aayi thi. Haath barhakar lights on karti bed room mein chali gayi. Jaise woh usay nazar hi na aayi ho.

"Kahan thi tum?"

Wardrobe se kapde nikaalte woh us ki taraf murri.

"Kahi bhi ho sakti hoon. Tumhein is se kya matlab?"

"Shohar hoon main tumhara..."

Us ne ghusse se kapde neeche patakh diye.

"Haan to shoher ho, kya chahte ho is ghar mein qaid ho kar rahoon? Na friends se miloon, na kahin ghoomne phirne jau?"

"Raat ke dhai baj rahe hain Adina!"

"Bhale se chaar bhi bach rahe ho, Jab main tumse kuch nahi poochti to tum kyun mere peeche par jaate ho?" Aankhon mein aankhain daal kar shadeed ghusse se boli.

Woh lab bheenche khada reh gaya.

Usay weekend par check-up ke liye jana tha. Woh nahi gayi. Usay doctor ne jo goliyaan prescribe ki thi, us ne lena chhod diya. Usay apni sehat ki ab koi fikr nahi thi. Woh apni par kisi ke ab mutalliq mukammal la-parwahi ho gayi thi.

"Yeh sab kab tak chalega!" Woh aik bar phir uske saamne khada tha. Woh suni an-suni kiye apne nakhun file karti rahi.

"Kya tumhein nahi lagta yeh mahaul hamare bachay ke liye theek nahi hai?"

Uski harkat tham gayi. Sar uthakar Faris ko dekha.

"Ab achanak tumhein apne bachay ki bhi fikr hone lag gayi hai..." Uska lehja istihzaayi tha.

"Mein kabhi apne bachhe aur tumse be-parwahi nahi hua.."

"Nahi. Shayad mujhe tumhein yaad dilana chahiye ke pregnancy news ke baad tumhara rawaiya kaisa tha..." Faris lab bheenche usay dekhta raha. Woh jab bhi maamla hal karne ki koshish karta tha, woh is tarah uske aasab par chot karti thi.

"Main is baat ki wazahat de chuka hoon tumhein...."

"Wazahat?" Woh hansi. "Main hi bewakoof thi ke tumhari is wazahat ko samajh nahi paayi.."

"Adina..."

"Mere samne yeh natak band kar do ab tum!" Palat kar boli. "Main andhi nahi hoon. Sab dekhti hoon aur samajhti bhi hoon." Woh pau patkti kamre mein band ho gayi. Faris lounge mein tanha khada reh gaya.

Ab woh dhadlay se mehroomiyon ka zikar karne lag gayi thi. Class ka farq batane lag gayi thi. Usay unka flat ab chhota lagne laga tha. Usay apne khareede gaye kapdon se masla hone laga tha. Usay uski tankhwah kam lagne lagi thi.

Usay uska saath bojh lagne laga tha. Woh tahmmahul aur bardasht se is rishtay ko nibhane ki usay apne tor par samjhane ki har mumkin koshish kar raha tha. Magar kuch bhi theek nahi ho raha tha.

Woh usay check-up ke liye hospital le kar gaya aur us din us par inkishaaf hua ke woh aik beti ka baap banne wala hai. Woh khabar azdaawaji zindagi ke tang halaat mein thandi hawa ka jhonka sabit hui. Woh muskuraya to yun jaise kaafi arse baad muskuraya ho.

Aik tabdeeli usay is lamhay mein bohat achanak apne andar mehsoos hui thi. Aik nai zindagi aur zindagi mein hi aik naye badlao ke liye. Us ne un halaat mein bhi bohot se plan soche, kai khawab dekhey, woh apne baap se mukhtalif aik acha baap banna chahta tha.

Woh apne aur Adina ke maabain in ikhtilaafat ko bhi mitana chahta tha. Us ne aik bar phir usse baat ki thi. Woh ab jitna khush aur mutmain tha, Adina ke liye wo sab utna hi bhaari aur be-sukooni ki alamat ho raha tha. Woh ab apne bachay ke liye bhi excited nahi thi. Jo bhi shopping thi, woh khud hi kar raha tha. Bachhi ke liye kapde, joote, nanhe frock woh sab khud khareed raha tha. Mrs. Shirazi ko ilm hua to unhon ne America se hi us ke liye layette set ( bacche ke kapde, ashya) bheja. Adina ke tasuraat ajeeb se hotay. Usay bachhe ki shopping dekh kar khushi nahi hoti thi. Woh is ke saath ab bahar kahin jana bhi nahi chahti thi.

Us raat woh mall akele hi gaya tha. Usay apni zaroorat ki kuch ashya khareedni thi, magar woh ghoomte phirte bachon ki shop mein ja khara hua tha. Nigahe mukhtalif khilone se hotay hue aik kitchen set par thahra gaya. Goke abhi bohot waqt tha. Duniya mein aane ke baad us khilone tak pohanchne, usay samajhne, us ke saath khelne mein bhi kai saal pade the, magar us ne woh set le liya tha. Waqt se pehle woh bohot se kaam abhi se karna chahta tha. Woh ehsaas aur chaht ko, is intezaar aur mohabbat ko shiddat se mehsoos karna chahta tha.

Khud ko us andekhe wujood se jor lena chahta tha. Usay apne dil mein kisi bhi qisam ki sakhti nahi chahiye thi. Jo wujood is duniya mein, us ki wajah se aane wala tha. Us ki zindagi mein koi kami beshi, takleef, dukh, mehroomi... kuch bhi nahi chahiye tha.

Aik taraf woh tha. Us ki soch, us ke khawab, us ke tasuraat thay. Doosri taraf Adina Zubair thi jis ne us raat bohat hi achanak hi talaq ka mutalba rakh diya tha. Woh sadme se gung usay dekh kar reh gaya.

"Tumhein andaza bhi hai tum kya keh rahi ho?" Be-yaqeeni se usay dekhte, us ke lab hile thay.

Sadma gehra tha. Chot gehri thi.

"Haan! Achhe se andaza hai. Shayad tum ne theek se suna nahi, mujhe talaq chahiye!" Woh us ki aankho mein baroodat se dekhte hue, dat kar khari ho gayi thi. Shadi ka mutalba bhi us ka tha. Alag hone ka mutalba bhi wohi kar rahi thi.

"Adina." Us ka naam labo mein thehra reh gaya. Woh itni badi baat itni aasan se kaise keh sakti thi.

"Tum se shadi mera bohat ghalat faisla tha. Insaan ki sirf shakl o soorat matter nahi karti. Aur bhi bohot kuch dekhna padta hai. Mujhe Arooba ne samjhaya tha. Main hi bewakoof thi jo nahi samajh payi. Main ne ghalat faisla kiya,.." woh mushtahal ho kar keh rahi thi. Apne faisle par pachhta rahi thi.

"Hum aik baccha expect kar rahe hain Adina" usey ehsaas dilana chaha thi. Lehze se karb jhalak raha tha.

"Main apni poori zindagi aik bachay ke liye daww par nahi laga sakti..." Be-shumaar aziyato ko aankho mein liye woh apni jagah tham gaya. Jis ne saari zindagi saath guzarne ka wada kiya tha, woh usay beech raste mein chhod kar alag hona chahti thi.

Shadi, zindagi, beti, talaaq... us ka sar phatne laga, us ke hawas muthal honay lage.

"Mujhe talaq chahiye, Faris!" sakht lehje mein phir se kaha. Usay yeh lafz jaise abhi ke abhi sunna tha. Usay yeh rishta abhi ke abhi khatam karna tha.

"Main chahunga ke delivery tak hum is par koi baat na karain," us ne tahammul se kaha.

"Main itna intezaar nahi kar sakti." Woh hazaar tukdo mein munqasim hota usay dekh kar reh gaya. Ghalti kis se aur kahaan hui thi? Usey andaza nahi tha ke uski aulaad ke hisay mein bhi Aarzoo Jahangir jaisi Maa aane wali thi. Usey shiddato se chahne wali woh ladki uski aulaad ke liye itni be-hiss, itni be-rahm ho jaane wali thi...

"Apne bachhe ke liye yeh karna padega..."

"Jab alehdgi ka faisla ho hi chuka hai to ab humein yeh bachhe rakhne ki kya zarurat hai?' Woh badtameezi se chhikhi. '

"Abhi bhi zyada waqt nahi guzra. Hum yeh sab khatam kar sakte hain..."

"ADINA!" Uski awaaz ghusse se phat gayi thi. Woh aik dua se chup ho gayi. Faris ne ungli utha kar usay warn kiya tha, woh uske bachhe ke mutaaliq koi baat na kare.

"Tumhein talaaq chahiye toh ho jayegi," us ne bhaari saanson ke saath sakht lehje mein kaha.

"Delivery ke baad humare raste alag ho jayenge..."

"Jab hum ne saath nahi rehna to is bachhe ko duniya mein lane ki kya zarurat hai?" Woh ghusse se cheekh parhi.

"Yeh meri aulaad hai!" Mushtail a'asaab ke saath woh phat parha.

"Meri beti hai. Sirf chaar mahine maang raha hoon tum se. Jahan Dedh saal guzar diye, wahan yeh chand mahine bhi guzaar do. Kya chala jayega?"

Woh zabt kiye, lab bhinche, uski aankho mein dekh rahi thi.

"Yani tum chahte ho mein mazeed is jahannum mein rahu!"

"Mere is jahannum mein rehne ka faisla hamesha tumhara tha. Mere saath khaak hone ki talab tum ne ki thi. Mere saath poori zindagi guzarne ka wada tum ne kiya tha..."

Woh aik dum se la jawab ho gayi thi.

"Mai tumhare saath koi wada na kar ke bhi is rishte mein aakhri hadd tak mukhlis raha hoon. Mujhe ab sirf apni beti se gharz hai. Main is par koi samjhota nahi kar sakta..." Us ke iraaday wazeh the.

Woh is tarah se rishta khatam nahi kar raha tha jis tarah se woh chahti thi. Woh aulaad ki kisi zanjeer mein bandhna nahi chahti thi. Woh Faris Wajdan ke saath mazeed koi rishta, koi talluq nahi rakhna chahti thi. Usay kal se pehle, aaj hi talaq chahiye thi.

"Lekin main aisa nahi chahti!"

"Meri beti ki zindagi aur maut ka faisla tum nahi karogi!" Uski aankho mein lahoo tehta hua tha. Us ke tasuraat sakht pathar pehle ho rahe thay. Adina zabt kiye khari rahi.

Woh usay chhod kar usi waqt bahar chala gaya. Khuli fiza mein gehri saanse lete apne a'asaab par chhaye is bojhal pan ko kam karne ki koshish karta raha. Wapas aaya to woh uske samne khari thi.

"Mujhe is ghar mein ab nahi rehna!"

Woh khamosh raha. Saari raat us ne aankho mein guzaar di.

Kaafi der baad us ne begonia house janay ka faisla kar liya.

Adina chhe maah ki hamila thi. Woh mazeed kuch mah sukoon se guzaarna chahta tha. Jab tak unki aulaad na ho jaye. Usay yeh faisla dil par pathar rakh kar karna pada tha. Kam az kam ghar ke mamle mein to woh behas nahi karegi.

Sirf chaar mahine ki baat thi. Woh usay Begonia House mein laya to woh aisa shandar ghar dekh kar hairaan reh gayi. Kimti furniture, sofas, parday, qaleen, ooperi manzil ke kamre...

"Yeh ghar kis ka hai?"

"Tumhein is baat se sarokar nahi hona chahiye.." us ne sanjeedgi se jawab diya aur seediya chadhta ooper chala gaya tha. Woh aankho mein ek ghusse ka tassur liye usay jaata dekhte rahi.

Raat ka jaane konsa pehar tha ke uski aankh khul gayi thi. Faris kuch der pehle hi uth kar bahar gaya tha. Woh baday se bedroom mein aik tairani nazar daurati khidki mein aakhri hui.

Bahar lawn ke us paar Faris ke samne ek taweel qamaat shakhs khada tha. Siyah gaadi bhi nazar aa rahi thi. Woh pehle bhi chand dafa aa chuka tha. Faris ne yeh hi bataya tha woh office kaam se aaya hai. Uska center hai. Jis tarah kuch adab se aur jhuk kar mohtaat ho kar do Faris se baat kar raha tha, usay woh kisi tor par uska colleague nahi laga. Uski aankhon mein soch ki parchhaiya lehrane lagin. Sar jhatak kar wapis palat gayi. Aur neeche jebo mein haath daal kar Faris Haider ke samne khada tha.

"Sirf teen mahine ke liye yahaan hoon. Tumhare sahab ko kiraya mil jayega!"

"Aap ka ghar hai. Aap jitna arsa chahen rahen..."

Faris chehre ka rukh moore kahin aur dekhne laga. Aankhe raat jage ki gawahi de rahi thin. Rangat zard...

"Kya aap theek hain?"

"Kyon aaye ho?" Us ne sard lehjay mein poocha.

"Jameela madam ne kuch samaan bheja tha, aap ke liye, darasal baby ke liye!" Keh kar muskuraya,

Faris ke tasuraat sanjeedgi sa rahe. Labo par khamoshi thahri rahi. Samam rakh kar Haider ja chuka to dudh muskuraya. Woh Lounge ke sofas par he so gaya. Subah bina nashte ke office chala gaya. Ghar wapas aaya to Adina Zubair uska rasta rok kar khadi ho gayi.

"Tumhara Shirazi khandan ke saath kya talluq hai?"

"Koi talluq nahi!" Us ne sakht khudre lehje mein jawab de kar usay raste se hata diya tha.

Kapre badal kar mujhe aaya to us ne mobile par tasweere nikaal kar rakh dee. Azam Shirazi ne kisi taqreeb mein shirkat ki thi. Us ke peeche jo suited bond guard tha woh Haider tha. Wohi Haider jo aksar usse milne aata rehta tha.

"Tumhara colleague? Haan? Mazeed kitne jhoot bologe tum mujh se?"

Lab bhinch kar us ne mobile band kar diya. Us ne tashee se Faris ka rukh apni taraf kiya.

"Tum chahti kya ho?" Bawajood koshish ke bhi woh apne lehje ko narm nahi rakh saka tha.

"Sach jaana chahti hoon..."

"Kaisa sach?"

"Jo tum chhupa rahe ho. Ek aam se flat se, yahaan le aaye. Tum ne yeh afford kaise kar liya? Aur phir aise zahir karte ho jaise Shirazi khandaan ke saath tumhara koi talluq nahi. Tum to Jameela aunty se koi madad bhi nahi chahtay thay. Aur phir main dekhti hoon ke Azam Shirazi ka guard yahaan aata hai? Kyun aata hai?"

Koi bhi jawab diye baghair woh ghar se chala gaya. Chhutti ka woh din us ne ghar se bahar guzara. Wapsi par Mrs. Grande ke paas kuch der tak baitha raha. Mrs. Anderson se to roz mulaqat ho jati thi lekin Mrs. Grande chund dafa bimaar reh chuki thi is liye woh zyada ghar se bahar nahi nikalti thi. Woh bistar par leti usey dekhte reh gayi. Unhein woh khasa pareshan laga. Halanke muskara kar baat kar raha tha.

"Tumhari biwi kaisi hai?"

"Theek hai?"

"Baby ka naam socha hai?"

"Haan"

"Kya socha hai?" Woh ishtihaq se poochne lagi.

"Janna.." Woh ab unhein matlab bata raha tha. Woh khush hui thi.

"Tum apni beti ko yahan to laoge na?" Unhone bohot maan se poochha. Us ne sar hila diya.

"Mujhe khushi hai tum wapas aa gaye. Ab kahi mat jana!" Woh un ke paas baitha raha. Ghar pohncha to adina kuch hisse se lounge mein nehti phir rahi thi. Aaj subah se woh ghar se ghaib thi. Kuch der pehle hi loati thi.

"Tum kon ho? Tumhare parents kon hai?" Woh aik baar phir uske samne khadi thi.

"Mera nahi khayal ab humare darmiyan aise kisi bhi guftagu ka jawaj banta hai!" Us ka lehja ajnabi liye hue tha.

"Bilkul banta hai kyun ke main ab bhi tumhari biwi hoon. Aur tumhare baare mein jan’ne ka poora haq rakhti hoon."

Woh zabt kiye khada raha.

"Jawab do mujhe!" Us ki aankhein surkh ho rahi thin.

"Koun ho tum?" Ab us ki zaat ko sawali nishan bana rahi thi.

Us ke kirdar par aa rahi thi. Aise us ka birth certificate chahiye tha. Maa baap ka naam chahiye tha. Ab woh is baare mein sab kuch jaana chahti thi. Woh yun zahir kar rahi thi jaise Faris ne usay dhoka diya tha. Woh uski zaat ko, uske wujood ko, uske kirdar ko mashkooq bana rahi thi.

"Maine aik aise insan se shadi ki jise apne parents ka bhi ilm nahi."

"Don't you dare, Adina!" Us ne shadeed ghusse ke alam mein usey mazeed kuch bhi kehne se roka.

"To phir batao kis khandan ki jaiz ya phir na jaiz aulaad ho tum?" Aur agle hi pal Faris Wajdan ne us ke gaal par thappad maar diya tha. Us ka sabr, uski bardasht, uska hosla bas yahi tak tha.

Woh gaal par haath rakhay, mutawajeh nigaho se usay dekh kar reh gayi.

"Not another word!" Woh khoon hoti aankhon se usay dekhte ghuraaya.

"Meri zaat par sawal uthaya to jaan nikal luga main tumhari!" Kanpatti ki ragain ubhar aayi thi. Aankhon se sholay jhalak rahe the.

Gaal par haath rakhe adina phatti phatti nigahon se usay dekh rahi thi. Woh darwaza khol kar zor se band karte bahar nikal gaya.

Woh saari raat us ne bahar guzar di. Subah ke waqt wapis aaya to poore ghar mein har aik shay tod phod ka shikar thi. Us ne sirf usay nahi toda tha. Baby cart ko bhi khilone ko bhi, bache ke liye khareedi jaane wali har ek shay ko barbaad kar diya tha. Woh pagal ho gayi thi.

Do peher tak us ne intezaar kiya woh wapas nahi aayi thi. Shaam tak us ne Arooba ko call ki thi. Phir us ki dosto se rabta kiya tha. Kisi ko bhi us ke baare mein ilm nahi tha.

Ghusse mein jo hua, woh nahi hona chahiye tha ghar apni beti ki thi. Us ne har jaga usay dhoonda jahan woh ho sakti thi. Magar woh nahi aayi thi, woh nahi rehna chahti to na rahe. Usay azaadi chahiye to woh usay azaad kar de ga. Woh apni beti ko paas rakhe ga aur usay chhod de ga. Is rishte ko mazeed ghaseetney ki, azmaane ki is mein himmat nahi rahi thi. Woh ab sab khatam karna chahta tha. Poora aik hafta uski talash mein us ne jis aziyat mein guzara, yeh sirf wohi jaanta tha. Mangal ke din usay mail moosool hui.

Lifafa chaak karte, kaghazat ko khol kar padhte us ke pero tale se zameen nikal gayi thi. Ek mein abortion report thi. Doosre mein talaq ke papers thay. Woh toofano ki zadd mein, sakte aur sadar mein khada reh gaya tha. Aankh ki aankh mein us ke wujood ke parkhichhe udd gaye thay.

Bees saal pehle aik aurat ne us ki paidaish ke paanch saal baad usay maar diya tha. Bees saal baad aik aurat ne us ke bache ko paidaish se pehle maar diya tha.

Woh deewaar ka sahara lete, larkharahat par qaboo paate andar aaya. Tamaam manazir gadmad hone lage.

---- •♡• ----