Chapter 92: ּ ֶָ֢.CH91

کِسٹ نمبر 19

Woh deewaro ka sahara lete, ladkhadaahat par qaboo paate andar aaya. Tamam manazir gadd-madd hone lage. Saanse bhaari hone lagin. Uska dil, bas ab jaise band hone ko tha. Woh beqabu hoke farsh par jhuk gaya tha. Ye uske saath kya hua tha? Uski beti ke saath? Usse saans nahi aa rahi thi. Woh mar raha tha. Khatam ho raha tha. Uske andar sab ek dum khatam ho gaya har sakkat, himmat aur hosla. Har umeed, lagan aur yaqeen.

Pehla waar tha. Dusra waar… aur mobile ki ek simple si beep thi. Usne larazti ungliyo se lock khola. Dhadadhad tasveer khulti gayin Adeena aur Hammad Shirazi ki tasveer, Woh uske saath mall mein thi. Woh mehngi tareen dukaan shopping kar rahi thi. Restaurant mein thi, dance floor par uski baaho mein baahe daale khadi thi.

Park mein ghoom rahi thi. Nahi, muskura rahi thi.

Faris Wajdan andar tak fana ho gaya.

Uski shaadi shuda zindagi ko aag lagane wala, uski beti ko jaan se marne wala, dusra chehra… Hammad Shirazi ka tha.

Aankho mein wehsat bhara junoon liye, woh ishtial mein uthkar ghar se nikla tha.

Uska rukh Shirazi Enterprises ki taraf tha. Maloom na tha wahan is waqt kaun ho sakta tha, Azam ya Haroon. Woh dono mein se kisi se bhi mil sakta tha. Sadar darwaze se andar dakhil hote, reception par kisi ke mutawajjeh hone se pehle, shadeed gusse ke aalam mein seedhiya chadhta, usne metal plant stand se glass walls par pa dar pa kai waar kar ke sheeshe tod diye. Ek shor sa utha. Daayi taraf, baayi taraf guzarte log mutawajjeh hue. Khauf aur hairat bhari kefiyat alag se phaili.

Azam Shirazi lift se nikal kar apne admiyo ke humrah report sunte, baat karte aa rahe the.

Abhi abhi meeting khatam hui thi. Haroon Shirazi pehlu mein tha. Azam Shirazi aage the. Woh andar dakhil hote hi safed roshan tiles par qadam dharte, un par achanak hamla aawar hua tha. Security guards ek dum se aage hue the, usse peeche hatane lage the.

Azam Shirazi  ki aankho mein tajjub ke sath hi beyaqeeni ka t’assur thehar gaya.

"Main Hammad ke raste mein kabhi nahi aaya. Aapne Hammad ko mere raste mein kyun aane diya?" Woh bharpoor muzahamat ke sath apna aap chhudate hue Azam Shirazi par cheekhne laga tha. Haroon Shirazi sakte mein khada raha.

"Kitni baar maarenge aap mujhe? Aur kitni baar qatal karenge mera?"

Azam Shirazi ki phati hui nigahe uske chehre par jami thi. Unki samajh mein nahi aa raha tha, baat kya thi? Maajra kya tha? Maamla kya tha? Kyun woh is tarah paagal ho raha tha? Mathosh ho raha tha.

Security guards pakad kar, kheench kar usse qaboo karne lage. Woh paanch log the, woh ek tha. Woh apni tamam tar muzahimat ke sath datt gaya tha. Lahoo rang aankhe Azam Sherani aur unke bete par ja rahi thi.

Sirf ek ghusa, jo pait mein laga tha, ek zarb, jo sar par lagi thi. Woh usse qaboo kar ke neeche girate, farsh ke sath laga chuke the. Sar qaboo karte…

"Chhod do ise!" Azam Sherani ki awaaz garaj ban gayi thi. Guards ne chonkar unhein dekha. Yahan unhein khatra tha. Kaun jane woh toh jo unke sath kya kar sakta tha.

"Maine kaha, chhod do ise!" Abke dhaad kar bole. Rahdari mein door tak sannata phail gayi.

In ke hukm par usse azaad kar diya gaya.

Unke qadam be-sakhta uski taraf uthe, aur phir ruk gaye. Uska sar jhuka hua tha. Uski siskiya un par ek ra’sha sa taari kar gayi. Woh aahista se uth gaya. Ek zakhmi bhari hui nigah un par daalta, wohi se palat gaya.

Maheeb sanaaton ki goonj mein Azam aur Haroon Sherazi khade reh gaye the.

•••

Kisi bhatke hue musafir ki tarah, woh London ki galiyo mein yahan wahan bas aise hi phirta raha. Uska mobile musalsal bajta raha tha, messages aa rahe the. Woh ghar nahi gaya tha. Usne ab tak kisi se baat bhi nahi ki thi.

Tower Bridge ke paas ruk kar usne murda, veeran nigaho se neeche gehraaiyo tak dekha. Raat ki tareeki mein, thitharte hue sard mausam mein, bulandi se woh manzar khaasa hebat-naak lag raha tha. Usne gehri saans lekar railing par girift jama li thi.

Mobile phir se bajne laga tha. Ab ke usne mobile nikaal kar screen ko dekha. Jamila Dawood ki call thi. Woh aankho mein nami liye khada raha. Phir usne call receive kar li.

"Faris…" Unki awaaz mein ek tadap thi.

"Kahan ho tum? Phone kyun nahi utha rahe the? Tum theek ho?" Unki awaaz se lag raha tha, jaise woh roti rahi hoon.

Woh mobile kaan se lagaye apni jagah khada raha. Surkh padti aankhein phir se nam hone lagi.

"Kuch bolo beta. Mujhse baat karo," woh be-taab ho kar boli, Uske saath kya hua tha, unhe ilm ho chuka tha.

"Aap ko maloom hai mummy abortion kaise karwate hain?" Uski awaaz bhaari, gham-gheen thi.

Jamila dawood sun kar, lagta tha unka dil band ho jayega.

"Faris…" Unki awaaz kanpi.

"Last week main uski heart beat suni thi. Everything was normal…" Unka lehja kamzor aur awaaz bhaari ho rahi thi. Aankhe masal kar aansuo ka asar dabana chaha.

"Lekin… usne meri beti ke tukde kar diye… mummy… usne meri beti ko maar diya. Adina ne. Aapke bete ne. Aapke bete ne!" Woh aankho par haath rakhe, hichkiyo ke saath ro raha tha.

Jamila dawood ka dil phatne laga.

Woh Faris ki beti thi. Is liye us ke saath yeh sab hua.

Abortion... ek jeeta jagta wajood kis aziyat se guzra hoga, yeh soch kar Faris ka dil phir se katne laga.

"Main ne socha tha, main use protect karunga. Main kabhi bhi use koi takleef nahi hone dunga. I'll make sure uska baap uske saath zindagi ke har mod par maujood hoga. Main Haroon nahi hona chahta tha, lekin... main bhi wohi hoon. Main use nahi bacha saka. Main apni beti ko nahi bacha saka."

"Faris, beta!" Jamila Daud tadap kar bolti rahi.

"Beta, tum is waqt kahan ho? Mujhe batao, main Haider ko bhej rahi hoon. Please Faris"

Faris mobile ko ghurta raha, jo dead ho chuka tha. Woh doosri haath se apna sar pakad kar der tak betha raha. Adeena zubair aur Hammad Shirazi  ki tasaveer uski aankho ke samne lehra rahi thi. Uska wajood sulag utha. Uska zehan maazi ke aakhri 21 saalo ki aziyato ko bar bar dahrane laga.

Woh pehle hi bhatka hua tha, ab mazeed bhatak gaya. Raste ki pehchaan khatam ho gayi thi. Kuch samajh nahi aya, to woh ek kone mein deewar ke saath lag kar beth gaya.

Us ke ird gird logo ki aamad o raft mausam ki sakhti ki wajah se kam ho gayi thi. Rastay, galiyan, aur sadkein viran ho chuki thi. Hawaye ek dum se tez ho gayi, aur sard hawao ke jhatko ne uska wajood thithra diya.

Tez hawao ki zad mein dheere se ek shakhs saamnay aaya. Usne Faris ko baazu se pakad kar uthaya aur ek tang gali ke beech le gaya, jahan ek aag jal rahi thi. Beghar log wahan jama the, aur lohe ki tin mein lakdiya daal kar jagah jagah aag bhadkayi ja rahi thi. Sardi se bachne ka intezam kiya jaa raha tha.

Us shakhs ne Faris ko apni panah mein jagah di. Phir apne beg se ek purani, phati hui shawl nikal kar Faris ke kandho par dali. Usne ek chhoti si kettle mein pani dal kar aag par chadha chuka tha. Phir use garam kehwa bana kar wo plastic ka cup usay diya rha. Uska wajood bhukar se tap raha tha uski halat tang ho rahi the. Wo murda zinda sa apni halat se beniyaz betha hua tha.

"Isay pi lo, behtar mehsoos karoge," usne kaha.

Usne cup haath mein le kar ahistagi se nigaha uthayi thi, Manzar dhundla tha, lekin ab wazeh ho raha tha. Us shakhs ke double kapde pehan the, coat jagah jagah se phata hua tha, aur jeans ke payche udhay hue the. Purane joote, tasme ghutno ke gird kash kar bandhe hue the. Uski Bhuri daadhi thi, bhure baal kadre lambe ooni cap se jhak rahe the, dastano se ungliya jhak rahi thi,  Woh shakhs usay apne janib dekhta paa kar muskaraya tha.

"Home-less lagte to nahi, bahir kyun ho?" us shakhs ne kaha.

Woh is waqt is paher homeless hi tha, usay puri duniya khud par tang  hoti mehsoos ho rahi thi, woh nazre jhuka gaya,. Bhap udata cup, uski ungliyo me daba tha.

"Kuch kho diya hai kya?" Usay phir dekhte jachte apne mehsoos arb english lehze me poocha.

Usne mauf zehan ke saath uske sawal ko samajhne ki koshish ki. Us is  pal, apne aur samne bethe shakhs me koi fark nahi nazar aa raha tha. Magar fark tha zahiri nahi, batini bhi.

Us shakhs ki aankho mein zindagi thi. Hasas bhi tha, etmad  tha. Woh at pe bat muskara raha tha. Bazahir mein uske paas kuch bhi nahi tha, lekin itminaan esa ki, jaise sab kuch ho.

"Yani meri tarah," us shakhs ne kaha aur apne plastic cup se ek lambha ghont liya.

Faris ne us shakhs ki taraf dekha. Uska gham kisi ke bhi gham ke jaisa nahi ho sakta tha.

"Tum marne ke liye bahar ho. Hum zinda rehne ke liye bahar hain."

Apni baat keh kar dheere se hansa. Khali mug mein dobara qahwa undela aur aage ko ho kar Faris ki taraf dekha. Un ke maabain aag ke sholay bharak rahe thay.

"Allah kisi ki wasat aur bardasht se zyada us par bojh nahi daalta ladke." Ayat parh kar sunata, woh seedha ho baitha. Chand lamho tak woh Faris ko dekhta raha.

"Muslim ho?"

Us ne aahista se sar hilaya.

"Kya kho diya hai?"

Woh dobara poochhne laga. Itne arsay baad Faris ko pehli baar ehsaas hua ke jaise woh Dr. Mustafa ke samne baitha hai.

"Sab kuch."

Khamoshi ek baar phir chha gayi. Waqt sarakne laga. Aas paas baato ka shor madham hota gaya. Woh apni jagah ek hi position mein baitha tha. Us shakhs ki nigaahe us par jami hui thi, Woh ab Faris ko aankhein masalte, aansoo peete aur gehri saans le kar zapt pakarte dekh raha tha.

"Tumhein pata hai, ilm mohsin mein Allah Tabarak wa Ta’ala ne tamam Sahaba me se sirf Zaid bin Harsha ka hi naam kyun liya?"

Sard aur be-nam si khamoshi mein us shakhs ki awaaz kaafi dair baad goonji. Woh eent par sar rakhay, karwat ke bal leta tha. Sardi ki shiddat se thitharta aur kapkapa bhi raha tha. Nigahe Faris par hi jami hui theen. Woh ek lamha ke liye bhi us par se nazar nahi hata saka tha. Yun lagta tha woh lamha bhar ke liye gafil hoga aur yeh nojawan kuch kar lega.

"Aisi kitab jisme Anbiya aur Jaleel farishto ke naam liye gaye hain, usme sirf ek Sahabi Zaid bin Harsha ka naam hi kyun?"

Faris ki aankho mein ek veerani si jhalak rahi thi. Ek khaali-pan sa ang-ang mein utra hua tha. Woh is lamhe mein samajhna bhi chahta, to samajh nahi sakta tha. Janna bhi chah raha tha, to jaan nahi sakta tha. Woh shakhs uth kar baith gaya aur chand lakriyo ka aag mein izafa kar diya.

"Zaid bin Harsha Muhammad “ﷺ” ke bete ke tor par jaane jaate thay. Zaid bin Muhammad ye unki pehchan thi. Jab Quran mein munh bole beto ke taaruf ke hawale se aayat nazil hui, to un se yeh aazaz cheen liya gaya. Jo naam ke sath Muhammad lagta tha, yeh naam hata diya gaya. Yeh baat unhein shadeed gham se do-char kar gayi."

Door kahin dhund mein ek heela sa ubharta dikhai diya.

"Phir unki talaq bhi ho gayi thi. Us waqt woh bohot mushkil halat se guzar rahe thay. Allah Subhanahu Wa Ta’ala ne woh nemate jo unke paas thi, us waqt le lein. Magar inke badlay mein unhein yeh aazaz diya, unka naam apni aakhri azeem kitab mein shaamil kar diya. Nam le kar hawala diya. Qayamat tak padhi jane wali awabin ki tabin ki awliyah, salihin ki kitaab mein unka zikar hamesha, hamesha ke liye darj ho gaya."

Woh shakhs ab uski zakmi aur murda nigaaho mein koi ta’asur dekhna chahta tha. Jo jamood uske aasabi halaat par tha, usay todna chahta tha.

Faris sadme me tha us par koi zarb kam nahi kar rahi thi. Uske asaab naram nahi padh rahe the. Uski aziyat kam nahi ho rahi thi,  use uske wajood me apni zaat, apna chehra, apna gham nazar aane laga,

"Allah ne mujhe chor diya hai."

Uske lab hilay.

"Sirf wahi to nahi chorta."

Bahut Saal pehle Dr. Mustafa ne bhi yeh hi kaha tha,

"Aap nahi samajhte, main kin halaat se guzar raha hoon."

"Tum bhi nahi jaante, main kin halaat se guzar kar yahan pohcha hoon."

Woh muskaraaya tha. Faris gardan modh kar usay dekhne laga.

Newla pehle ek tha, ab do aur teen ho gaye. Sard tareek raat mein kisi ki talaash jaari thi.

"Is aayat se maine seekha hai; Zindagi mein jab bhi tum kuch aisa kho do, jise khone ka tasawwur bhi na kiya ho, to jaan lo ke tumhein Allah ki taraf se kuch aisa zaroor milne wala hai, jise pa lene ka tumne guman bhi nahi kiya hoga. Chhin jaye to sabr kar lo. Hum nahi jaante ke badle mein hamein kya milne wala hai aur ismein humare liye kya maslihat posheeda hai."

Rawani se baat karte huye ab woh Faris ki aankhon mein dekhne laga.

"Zaid bin haris◌ؓ se ek pehchaan le li gayi. Phir badle mein jo aazaz mila, is se andaza kar lo ke Allah kitna Kareem hai, uski ata kitni aala hai, uska ajar kitna azeem hai. Woh apne bando ke gham aur bojh se kabhi ghaafil nahi hota."

Qadmo ki aawaaz aur zyada kareeb se aane lagi. Faris ki nigah us shakhs par hi thahri rahi.

"Aap ne kya khoya?" Door kahin se ek gaadi guzar rahi thi.

"Ghar, watan, maa, baap, aulaad, khandaan, sab Hum Syria ke log. Humare hissay mein duniya ki saari aazmaish ek saath aayi hain."

Muskarahat mazeed gehri hui, magar sabzi mael aankho ki talkhi bhi barh gayi. Usne apni hathaili ko upar neeche chumatay aasman ki taraf dekha

"Allah Kareem."

Dayar-e-ghair mein, ek beghar ke roop mein, sakht kadak sardi mein woh khulay aasman ke tale baitha tha. Baat-baat par shukriya Allah ka hi ada kar raha tha. Uski muskarahat gehri thi, sukoon bhari. Uski aankhon se gham jhalak raha tha sabr bhara gham.

Uska khayal tha ke saari duniya usay tark kar chuki hai, magar uska Allah abhi bhi uske saath hai. Woh usay abhi bhi apni aankho mein liye hua hai.

Jaane aisa yaqeen, ehtmad, aur musbat soch woh shakhs kahan se laya tha. Apne paanch jawan bachon ko khone ke baad bhi woh bhatka nahi tha. Uski aulaad to abhi is duniya mein aayi bhi nahi thi. Abhi to usne dekha bhi nahi tha, chhua bhi nahi tha. Agar uska dil sirf tasawwur se phat raha hai, to woh sab kuch aankhon se dekh lene ke baad bhi itne sabr mein kaise baitha hua hai?

"Itna sab kuch kho dene ke baad aap ko kya mila?" Budha chand lamhon tak usay dekhta raha.

"Mujhe Allah mila hai," usne kaha.

"Pehle main ek Isaai tha, ab main ek Musalman hoon."

Faris ke mojood nigaho ne uske chehre par thaher kar uska haal dekha. Usne haath barha kar uske kandhe par thapthapaya, yun jaise tasalli di ho.

"Yeh waqt bhi guzar hi jayega."

Khamoshi ek baar phir chha gayi. Kaafi der tak Faris usay dekhta raha. Phir uske labon mein halka sa junbish hui.

"Main aap jaisa nahi hoon. Main yeh nahi soch sakta ke mujhe mere guman se barh kar kuch milega. Main yeh soch raha hoon ke mazeed mujh se kya chheen liya jayega."

Uski aankhein muqammal tor par nam ho chuki theen. Woh mayoosi ki at'haah gehraiyon mein utar chuka tha.

"Tum shaitaan ko khud par haawi hone de rahe ho."

"Yeh shaitaan nahi hai, yeh main hoon. Yeh main ho chuka hoon."

Boore ne ta’asuf bhari nigahon se usay dekha.

"Aazmaish momin ke liye aati hai, shaitaan banane ke liye nahi."

Faris Wajdan ke andar aur bahar ek dum se khamoshi chha gayi.

"Ek din tumhein andaza ho ga, main kitna durust tha aur tum kitne ghalat the. Us waqt jab tumhein tumhare hissay ka inaam milega."

"Mere hisse mein aisa kuch nahi ho ga."

"Burai ka socho ge to bura ho ga. Maine acha socha tha, mere saath acha bhi nahi hua."

"Isay kehte hain qismat, naseeb, aur aazmaish."

Faris khamoshi se usay dekh raha tha.

"Aaj na sahi, lekin kabhi to tum samajh hi jao ge."

Apni baat khatam kar ke woh eent par sar rakh kar sone ke liye let gaya.

Woh raat Faris Wajdan ne khulay aasman tale guzari. Ma siwaye uske, wahan sab hi sukoon se baithe the, letay the, ya pade the. Subah woh neem tareeki mein hi uth kar jaane hi wala tha, jab deewar ke saath tarteeb se rakhi chhoti-chhoti paintings uski tawajjo ka markaz ban gayi.

Budha wahin pehlu mein soya hua tha. Ujalay mein ab woh wazeh nazar aaya. Uske brushes aur rangon se thela bhara hua tha. Uski daarhi qadre lambi thi, aankhein andar ko dhansi hui, aur kapray bhi kaafi purans the. Magar talent kamaal ka tha.

Usne chhoti-chhoti paintings par khattati aur qudrati manzar ki jhalak banai thi.

"Kharidna chaho ge?"

Woh uth kar baith gaya aur qeemat bhi batane laga. Faris wahin khara khara apni jeebo mein haath dal kar talaash karne laga. Jeebe khali theen. Wallet ghar reh gaya tha.

Usne apni nafees ghari utaar kar uske saamne rakh teen paintings uthaye waha se chala gaya unme se ek chhoti si painting, usri Yusra ki thi, jo khizan aur bahar ka manzar dikhati thi, aik shami ghaza ki painting.

❏❏❏