Chapter 96: ּ ֶָ֢.CH95

•••

Haider qanooni mamlaat dekh raha tha. Qatal ki tahqiqat jaari thi, saboot itne thos the ke Junaid Lashari ko foran mulk chhorne ka faisla karna pada. Magar usay airport par hi giraftaar kar liya gaya. Tahqiqat naye sare se shuru hui. Adalat mein case chala aur is arse mein jitna pro-pagandaa uske khilaf ho sakta tha kiya gaya.

Muqabala do khandaano ke beech tha. Aur mamla bhi chhota nahi tha. Usne aakhri had tak larnay ka faisla kar liya. Sade aath mah tak woh jang jaari rahi. Usne koi asar ya dabaao nahi liya. Kisi dhamki ko khatir mein na laya.

Bil aakhir Junaid Lashari ko umar qaid ki saza suna di gayi.

Us raat jab woh ghar aaya to Jameela Dawood ko baithe hue paaya. Usne kabhi bhi unhein is qadar toota hua nahi dekha tha. Unki rangat zard thi. Woh bimaar rehne lagi thi.

"Bhai tha mera,.." woh unke samne baitha to woh rote hue bole, "Mujh se sab maangta to de dete, kam az kam mera ghar to na udaarta. Usne aansoo saaf karte unka sir apne kandhay se laga liya.

"Meri shaadi ek business tha unke liye. Nafe ka sauda. Behen ki zindagi par karobar ho raha tha. Unka dil gham se phata ja raha tha."

"Mummy...,"

"Lashari khandan tak mera paigham pohcha do. Mere liye woh sab mar chuke hain. Ab koi mere peeche na aaye. Sun rahe ho, Faaris?" Woh haziyaani andaaz mein cheekhi the.

"Haan! Main kisi ko nahi aane doonga. Aap please, aap sambhaalein khud ko mummy.." Woh unhein sahaara de kar uthaye hue unke kamre tak le gaya. Unki haalat theek nahi thi. Woh nafsiyati tor par be-had disturbed ho chuki thi. Doctor ne jo adwayat di thi, unke sahaare chand ghanton ki neend le kar uth jaati.

Pore ghar mein ghabraayi hui si bolai bolai phir rahi thi. Hammad ke kamre mein. Hammad ki cheezon se lipti hui paayi jaati. Woh unke paas ghanto baitha rehta, chup chaap. Dam saadhay. Unhein sunta rehta. Hammad ki bate. Usne unhein kabhi na to toka.

Azam Shirazi bimaar ho kar bistar se lag gaye the. Wujood ko janbish denay se qaasir. Aawaz khatam. Ab woh koi baat nahi kar sakte the. Nigaah mein muntazar si. dard mein doobi, aziyat se pur uske chehre par jami rehti thi. Woh unka har kaam khud kar raha tha. Unki dekhbhaal kisi mulaazim ke zimme nahi thi. Woh khaana uske haath se khaate the. Woh paani uske haatho se peete the. Taqat khatam hote hote bas aankhon tak reh gayi thi. Aankhein jo mehz aanso se dhandla jaati thi. Unki nigaahen uske chehre par jhuki rehti thi.

Unhone itne pyaare chehre ko itni nafrat se kyun dekha?

Ab woh uske gaal par haath rakhna chahte the. Rakh nahi sakte the. Maatha choomna chahte the aur choom nahi sakte the. Maafi maangne ki khwahish thi aur maang nahi sakte the. Is raat bhi woh unke kamre mein tha. Woh unke paas hi baitha hua tha.

"Main hamesha se aapko tanha dekhna chahta tha. Main jaan chahta tha aap toot jaayein. Aap akelay rah jaye. Aap ke paas koi rishta baaqi na rahe." Uski awaaz ek dam se kamzor pad gayi.

"Lekin Baba,.." usne pehli baar aapko is rishtay se pukara jo unka tha.

"Mujhe aapko is tarah se dekh kar khushi nahi hoti." Azam Shirazi ka dil ruk sa gaya.

"Aap pehle jaise kyun nahi ho jaate? Aap pehle ki tarah..." Woh ek dam se chup ho gaya.

"Aap pehle jaise kyun nahi ho jaate Baba?" Unki aankhon mein dekhte hue woh masoom bachhe ki tarah rote hue keh raha tha. Woh unhein is haalat mein dekh kar sab se zyada takleef usay thi. Sab se zyada gham mein woh tha. Jis insaan ko usne hamesha chattano ki tarah mazboot dekha tha. Usay reza reza dekhna bardasht se baahir ho raha tha. Is raat kis qadar koshish se unhone apni ungliyo ko janbash di thi.

Usne unka haath thaam liya. Woh haath oopar tak bilkharta, kapkapata uske gaal tak aaya. Unki khwahish ka idrak karte hi, usne woh haath apne gaal par thehraye rakha. Unki aankhein phir se bhari. Kapkpate hontho  par kuch lafz thehr gaye. Shayad unhone uska naam liya tha. Shayad woh kuch kehna chahte the.

"Baba!" Jaise woh jaan gaya ho, woh usse kya sunna chahte the.

"Main aap se naraaz nahi hoon. Main ne aapko maaf kar diya. Mere baap ne mujhe khud chhoda tha. Unhone mujhe aap ke hawale kiya. Yeh sirf aapka faisla nahi tha. Yeh unki khwahish thi." Azam Shirazi ki siskiyan bandh gayi.

"Aap chahtay to mujhe maar sakte thay. Zinda rakha aap ne."

Azam Shirazi ka wujood bejaan honay laga.

"Aap chahte to mujhe anpadh jahil rakh sakte thay. Nahi rakha. Mujhe sirf dikhawe ka murda nahi kiya. Chhupa kar mehfooz bhi rakha. Yeh ehsanat hain aap ke. Aap ne mere saath kuch bura nahi kiya. Mujhe aap se koi gila nahi hai."

Unke andar ki cheekhe andar hi reh gayin. Gumaan mein bhi nahi tha ke woh unke muzalim ko aisa rang dega. Unki takleef kam karne ke liye, unka bojh halka karne ke liye, unki asani ke liye, woh aise ehsan karega. Kaash taqat laut aaye, woh uske mounh par haath rakh dein. Haath jod kar minnat karein ke woh is tarah na kahen. Woh chheekhe. Woh chillaye. Woh apni takleefon ka ilzaam unke sar daalein. Unhein kabhi maaf na karein, magar Faris Wajdan ne maaf kar diya tha.

Is lamhe Azam Shirazi ka shiddat se dil chaha waqt palat jaye. Woh lamha phir se mayassar ho jab Haroon Shirazi nanhay Faris ki ungli thaam kar Shirazi Mansion mein dakhil ho raha tha. Woh lamha jab sehmi huwi nigahon mein unka aks ubhra tha. Mazi samat kar haal ka hissa ban jaye. Mouqa phir mouqa phir se mile. Woh bachcha unke samne ho aur woh usay qubool kar lein.

Apni ana, zid aur hatt dharmi ko fana kar dein. Waqt palat kar peeche jaye aur Faris ka bistar unke kamre mein ho. Uske naam ke sath Haroon Shirazi lagta ho. Woh unke hamrah ghore par sawar hota ho. Aur apne bhai ka haath thaam ke sabzah zaar mein ghoomta ho. Khelta ho aur khoob hanshta ho. Faris Wijdan Shirazi Mansion mein upar neeche har jagah bhagta phirta ho. Kahin koi had, lakeer ya deewar na ho. Na woh boarding school mein jaye. Na woh raato mein be qaboo ho kar cheekhta ho. Waqt mouqa de ke woh sirf usko khas kar lein. Aur poori duniya unke liye aam ho jaye. Na badnami ka dar ho na logo ka khauf.

Woh uske liye datt jayein. Ladd jayein.

Bas ek mouqa mile aur Faris ka har dard chhun lein. Uski yaad-dasht se apni tamam ter talkh baatein nikaal dein. Apna gussa, apni nafrat, apna takabbur, har manfi jazba, ehsaas mita dein.

Bas ek mouqa. Sirf ek mouqa ke woh is mohabbat ko pehchaan lein jo unke andar roz e awwal se thi. Woh mohabbat jo aksar raaton mein bechain kar deti thi. Woh phone jo woh aksar uske hostel mein karte thay. Woh mulaqat jo har weekend par hoti thi. Woh goli jo unhone uske samne aakar usse bachate hue khai thi. Unhon ne samjha tha mehz jazbaat hain, zimmedari ke. Wada ki rahi thi jo kadmon ko jakar rakhtee hai. Samjhe bina ehsaasat ko mubhin karte rahe. Apni ana ki khatir faaslay barhate rahe. Uska wujood muskh kar ke. Uski zaat ko mitate rahe.

Kitne dukh the jo unhon ne usay diye. Kitna karab tha jo unhon ne uski aankho mein thehraa diya.

Kaash woh aankhein band kar ke khole aur woh manzar saamne ho. Paanch saala Faris ungli pakad kar qadam rakh raha ho. Unke bulaane par unse haath mila kar unke ghale lag raha ho. Kaisa khawab naak sa manzar tha. Aankhon mein thehraa hua. Unki siskiyo mein doobta hua.

"Mujhe aap se koi gila nahi." Woh bachcha unse keh raha tha.

Is raat woh aakhri alfaaz thay jo unhone sune. Is raat woh aakhri baar roye. Woh aakhri raat thi jo Faris Wajdan ne apne bimaar nayiif dada ke kamre mein unke pehlu mein so kar guzar di. Woh pehli aur aakhri raat. Zindagi mein wahi thehr gayi ke agle din ka sooraj jab tuloo hua to woh is duniya se rukhsat ho chuke thay.

Apne baap aur bhai ki maut par na rona wala Faris Wajdan is din apne dada ki maut par apne chehre par haath rakh ke bohot shiddat se roya tha.

Us ne haqeeqtan mein ab jaise koi rishta kho diya. Unki qabr mein uske andar ka koi hissa bhi dafn ho gaya.

Woh teen qabre. Woh teen hisso mein bata hua. Raat gayi tak wahan baitha raha tha.

──── ୨୧ ────

𝙰𝚓𝚎𝚎𝚋 𝚛𝚞𝚝 𝚑𝚊𝚒

𝙺𝚒𝚜𝚒 𝚗𝚎 𝚑𝚞𝚖 𝚔𝚘 𝚐𝚊𝚠𝚊 𝚍𝚒𝚢𝚊 𝚑𝚊𝚒

𝙺𝚒𝚜𝚎 𝚙𝚞𝚔𝚊𝚛𝚊𝚒𝚗 𝚐𝚎? 𝚜𝚊𝚔𝚑𝚝 𝚠𝚊𝚚𝚝𝚘 𝚔𝚒 𝚣𝚎𝚍 𝚖𝚎𝚒𝚗 𝚊𝚊𝚔𝚊𝚛

𝙺𝚎 𝚓𝚒𝚜 𝚔𝚒 𝚜𝚊𝚗𝚐𝚊𝚝 𝚜𝚑𝚒𝚔𝚊𝚜𝚝𝚐𝚒 𝙼𝚎𝚒𝚗 𝚋𝚑𝚒, 𝚙𝚑𝚒𝚛 𝚜𝚎 𝚞𝚝𝚑𝚗𝚎 𝚔𝚊 𝚝𝚑𝚒 𝚜𝚊𝚑𝚊𝚛𝚊

𝚄𝚜 𝚗𝚎 𝚑𝚞𝚖 𝚔𝚘 𝚐𝚒𝚛𝚊 𝚍𝚒𝚢𝚊 𝚑𝚊𝚒

𝙹𝚘 𝚐𝚑𝚊𝚖 𝚔𝚎 𝚍𝚊𝚛𝚒𝚢𝚊 𝚖𝚎𝚒𝚗 𝚝𝚑𝚊 𝚑𝚞𝚖𝚊𝚛𝚊 𝚜𝚞𝚔𝚘𝚘𝚗 𝚔𝚒𝚗𝚊𝚛𝚊...

𝚄𝚜𝚒 𝚗𝚎 𝚑𝚞𝚖 𝚔𝚘 𝚋𝚊𝚑𝚊 𝚍𝚒𝚢𝚊 𝚑𝚊𝚒

𝙹𝚘 𝚊𝚙𝚗𝚎 𝚠𝚊𝚍𝚘 𝚖𝚎𝚒𝚗 𝚜𝚊𝚊𝚛𝚒 𝚍𝚞𝚗𝚒𝚢𝚊 𝚜𝚎 𝚖𝚘'𝚝𝚊𝚋𝚊𝚛 𝚝𝚑𝚊,

𝙷𝚊𝚖𝚊𝚛𝚊 𝚞𝚖𝚛𝚘 𝚜𝚎 𝚑𝚞𝚖𝚜𝚊𝚏𝚊𝚛 𝚝𝚑𝚊..  𝚄𝚜 𝚗𝚎 𝚛𝚊𝚗𝚓-𝚎-𝚠𝚊𝚍𝚊 𝚍𝚒𝚢𝚊 𝚑𝚊𝚒..  𝙺𝚒𝚜𝚒 𝚗𝚎 𝚑𝚞𝚖 𝚔𝚘 𝚐𝚊𝚠𝚊 𝚍𝚒𝚢𝚊 𝚑𝚊𝚒..

𝙰𝚓𝚎𝚎𝚋 𝚛𝚞𝚝 𝚑𝚊𝚒?

﹌﹌﹌﹌﹌

Hospital ke safed corridor ki khamoshi mein Mudhat ki awaaz gonj rahi thi. Jannat ki nigahe uske chehre par thehri hui thi. Woh usse sun rahi thi. Sawal mukhtasar sa tha aur jawab bohot taweel ho gaya tha.

Shuru aakhir tak. Woh jo kuch bhi janti thi usne Jannat Kamal ko sab bata diya tha. Woh uski aaya reh chuki thi. Uske dukh, takleef aur aazmaisho se waqif thi. Achhi tarah se janti thi woh aisa kyun tha. Apne baap, dada aur bhai ke liye uska dil itna khaali. Itna veeran kyun tha. Apni maa se bepanah mohabbat karne wala Faris apne bhatije se itna door kyun tha.

Uski nafrat kabhi bhi bila sabab nahi rahi thi. Uska gussa kabhi bhi bilawajah nahi raha tha. Woh apne mazi se kabhi bhi nahi nikal saka tha. Woh apne gham aur aziyato ko kisi tor bhi bhula nahi saka tha.

Uska dil toota tha. Maan bharosa. Use mohabbat ke naam par toda gaya tha. Use rishte mein uljha kar maara gaya tha. Use apno ki sakhti bachpan se jheelni pari thi.

Uske barabar mein baithi Mudhat Agha ab khamosh ho gayi thi. Jannat aankho mein dukh aur gham ka taasur liye baithi reh gayi. Usne shawl ko kheench liya.

Jis aurat ki woh shakl tak nahi dekhna chahta tha, us aurat ka woh naam leti rahi. Baat baat par uska hawala deti rahi. Use apne aur Faris ke beech laati rahi.

Usne saare ilzaam uske sar daal diye. Use be-hiss, zalim aur jaane kya kuch samajh liya.

Usse Faris par bharosa karna chahiye tha. Usne roka tha to ruk jaana chahiye tha. Usko samajhna chahiye tha.

"Maine usay bohot dukh diye hain. Bohot bura kiya hai." Woh ro padi.

"Aap ko kuchh ilm nahi tha."

"Phir bhi mujhe us par bharosa karna chahiye tha. Usne mujhe roka tha. Mujhe uski baat nahi maan ni... Main... main usse chhup kar rayyan se milne gayi. Main..." Usne be-ikhteyar apni peshaani par haath rakha.

"Mujhe pata hi nahi ke yeh sab... yeh sab us ke liye kitna mushkil raha hoga. Maine kabhi samjha hi nahi ke..."

"Jab woh aunty ki har baat maan leta hai toh phir yahan is mamle mein itni sakhti kyun hai? Aur aunty, woh usse force kyun nahi kar pati?"

"Aap la-ilm thee... Aap ki ghalti nahi hai."

"Meri ghalti hai." Sar utha Kar bheegi aankho se kaha.

"Maine us ke sab zakhm udhed diye. Meri wajah se aunty is haal ko pohnch gayi. Meri wajah se. Shayad main... Shayad main waqai manhoos hoon. Mere wajood se bas dukh aur gham hi mil sakte hain."

"Jannat bibi, Aisa nahi hai..." Mudhat ne narmi se kaha.

"Aisa hi hai. Main uska samna kaise kar paoon gi. Main usse koi baat, humare darmiyan ab kuch bhi theek nahi ho paayega. Main yeh sab kaise?" Woh sisak padhi.

Mudhat ne narmi se uske haath par haath rakha.

"Aap please sambhale khud ko."

"Main bas... main sirf aunty ke liye wahan gayi thi. Main sirf un ke liye Rayyan ko wapas laana chahti thi. Main ne unse waada kiya tha. Main unka yeh waada poora karna chahti thi. Mujhe nahi pata tha un ki khwahish ke saath Faris ka gham joda hai. Mujhe nahi pata tha..."

"Kasoor aap ka nahi hai. Kasoor Faris ka, ya kisi aur ka bhi nahi hai. Bas haalaat aise ho gaye. Aur halat par to insaan ka ikhtiyar nahi hota." Mudhat ne samjhaya.

"Agar aunty ko kuch hua to woh mujhe kabhi bhi..."

"Nahi." Mudhat ne tokk diya.

"Begum sahiba kehti thi aise haalaat mein sirf dua aur bas dua. Aur koi soch-khayal nahi."

Usne gehri saans le kar peshaani par haath rakh liya. Ek baar phir Faris ko call ki thi. Uska mobile abhi tak off tha. Anginat khauf aur wahmo mein ghira hua dil shiddat se dhadak raha tha. Ek anjaani si kaifiyat rag-o-pai mein saraiyat kar chuki thi. Uske liye intezaar, aur mazeed intezaar bohot mushkil ho raha tha.

•••

Sadak par guzarte car trollers ka shor aik dum se taiz hua tha. Faris Wajdan ne Rayyan Shirazi ki cheekhe suni thi. Uske qadam jakde gaye the. Woh apni gaadi ke samne ruk gaya. Usne raat ki tareeki mein ajeeb si wahshat bikhri dekhi. Woh panjo ke bal jhuka, ghutne zameen par tikaye apna sar hatheliyo mein gira liya.

Kitna mushkil imtihan tha us ka. Kitni badi aazmaish chun li gayi thi us ke liye.

Rayyan Shirazi bokhalaya hua sa, khaif, shiddat se rota hua, kar lata hua, haath uthaye yahaan wahan dekhte chhote chhote qadam uthane laga tha. Us ke liye woh mahaul, andhera aur tanhai be-intaaha wahshat ki alamat thi.

Is lamhe usay nazar aanay wala woh wahid insaan Faris hi tha. Woh uljhan kar gira, phir ro kar cheekhte hue apne ghuto par haath rakhte, us wahid insaan ko mutajeh karne ki koshish kar raha tha. Jiska dil us ke liye patthar ho chuka tha. Woh insaan jise apna har gham, apni har takleef yaad aa rahi thi. Jiska wajood larajh raha tha, jiske siskian bandh gayi thin. Jiska chehra tar hone laga tha.

Uske ehsaasat aur nafrato se qateeb be-naaz woh rote cheekhe apni jagah, apna rasta banta, uske ghuton se ooper uske bazuo ke neeche ghus kar seene se lipat gaya. Shirt daboch li. Munh chhupa liya. Woh is lamhe bas yehi kar sakta tha. Uske nanhe se zehan mein bas yehi aik khayal aasakta tha. Woh bas aise mehfooz reh sakta hai.

Faris ka larazta wajood saqit ho gaya. Uske andar aik dum se sunayi phail gayi. Num aankhein pathra si gayi. Aisi jurat usne kabhi nahi ki thi. Aisa hosla usmein kabhi nahi aaya tha. Jis se bachna chahiye tha, woh usi mein panaah dhoond raha tha. Jis se darna chahiye tha, woh usmein sukoon dekh raha tha.

Usne kisi kadar aur kuwwat se usay khud se alag karne ki koshish ki thi. Usay pakad kar khud se alag kiya. Woh ludhak kar peeche hua aur phir rote hue sar uthaya. Pehle baayen taraf dekha, phir daayen taraf. Phir uske andar ka toofan tham gaya. Aag bujh gayi. Sakta taari ho gaya. Woh pehla samna tha jo Faris Wajdan ka apne aap se hua tha. Woh pehli mulaqat thi jo is lamhe, is waqt Faris Wajdan ki apne kisi roop se hui thi.

Woh jiski shakl tak nahi dekhna chahta tha. Woh Adina Zubair ka beta tha, na Hammad Shirazi ka. Woh bas dhed saal ka ek Faris tha. Jiski peshaani par ek zakhm tha. Jiski gardan par bhi ek lakeer si thi. Neel jaisi mubhim hoti hui. Jiski thodi par bhi halki si chot nazar aa rahi thi. Aur jo shiddat se rota chinta ja raha tha. Woh ek aisa Faris tha jiska baap haqeeqatan mar chuka tha aur jiski maa usay waqai chhod chuki thi.

Kahin koi deal nahi hui thi. Woh ek aisa Faris tha jiski zindagi mein Azam Shirazi uski paidaish ke saath hi daakhil ho chuka tha. Jo uske masoom chehre par uski Maa ko khoj raha tha. Aur uski khoobsurat aankho mein uske baap ko dekh raha tha.

Tasveer wohi thi. Manzar bhi. Bas kirdaar badal gaye the. Hakayat phir se likhi ja rahi thi ke Azam Shirazi ki jagah Faris Wajdan aa gaya tha. Faris Wajdan ki jagah Rayyan Shirazi ne le li thi.

Qalam uthaa liye gaye -

Shafe phailaa diye gaye -

Imtihan shuru ho gaya -

Faris Wajdan ka imtihan -

Uski sakit nigahe Rayyan Shirazi ke chehre par thehri reh gayi, phir se ghutne ke bal rengta hua aage hua, uske ghutno par haath rakhe. Uske andar chhupne ki koshish karne laga.

Woh Faris...

Ek aur Faris...

Usne sar gira liya tha...

Usne shikast tasleem kar li....

Rayyan Shirazi ab uski giraft mein tha. Uske seene se laga hua, shiddat se rota, bilkita hua.

Dara hua. Sehma hua. Andhere simatne lage. Hawae ruk kar phir se chalne lagi. Patto ki sargoshiya buland ho gayi. Zameen ne wusat pakad li.

Woh usay giraft mein liye uth kar gaadi mein baith gaya. Woh hanuz uski shirt daboche apne doosre haath ko band rakhe apna moun uske seene mein hi diye hua tha. Uska rona abhi tak band nahi hua tha. Uska nanha dil bohot shiddat se dhadak raha tha. Faris Wajdan ka kapkapata haath uski pusht par aa thehra.

Uski kapkapahat kuch madhm parhi. Magar uski hichkiya band na hui. Uska rona kam na hua. Usne haath badha kar gaadi ki lights on kar di taake roshni mein uska khauf kam ho. Chehra laal ho raha tha. Aankhein phati hui. Aisi dehshat thi unmein jaise usne pa nahi kiya dekh liya ho.

Tissue se uski naak moun saaf kiya. Pani ki bottle uske labon se lagayi. Kuch pani gir raha tha. Kuch uske halaq mein jari tha. Magar uski piyas khatam nahi ho rahi thi. Woh usay chup kaise karwaye?

Usne phir us bag ko khola jismein uska samaan tha. Usmein feeder tha. Usne feeder ka dhakkan hata kar uske labo se lagaya. Bhook ki shiddat se nidhal woh doodh peene laga. Hichkiya khatam ho gayi. Sirf sukoon ka gumaan hone laga.

Woh kuch sambhal gaya to usne usay passenger seat par bithana chaaha aur woh chup hote hote ek baar phir se machal kar shiddat se rone laga. Woh kisi soorat bhi usse alag hone ko tayar nahi tha. Majbooran ek bazu mein usay liye usne doosre haath se steering wheel sambhal liya. Gaadi start ho gayi.

Safar shuru ho gaya. Rayyan ki nigahen ab jalti bujhti motiyo par thi. Car screen par ubharte lafzon par thi. Wrist watch ke chamkte dial par thi.

Chalti hui gaadi mein khamoshi aur sannate mein neend ghalib aane lagi. Uski gardan bazu par dhalak gayi. Rayyan Shirazi apne nanhe haath se uski shirt hanuz daboch raha tha.

Yeh giraft khauf se bachne ke liye thi. Yeh giraft tahaffuz aur aman ke liye thi. Aisi mazboot giraft jise duniya ki koi bhi taqat ab chhudha nahi sakti thi.

---- •♡• ----

Hey! Reader In the real novel there are 4 chapters left, and in the Roman Urdu edit version there are 16 chapters left.

Hopefully you liked it, and sorry if you see any grammatical mistakes in there; I'm not a professional :) so ignore the lil mistakes.

Love you cuties 𖹭

Take care of yourself 𖹭