Chapter 97: ּ ֶָ֢.CH96

کیسٹ نمبر ۲۰

Wo rahdari mein thi. ICU ke samne hi khadi thi. Mobile haath mein tha. Teen ghante ho chuke the Faris ko hospital se gaye hue. Aur abhi tak woh wapas nahi aaya tha. Abhi tak uski koi call bhi receive nahi hui thi. Mobile band tha. Koi paighaam, khairiyat ki koi khabar, usse kuch bhi moosool nahi ho raha tha.

Jannat ke haath pair thande par rahe the. Fikr, khauf aur andesho mein ghira dil bohot shiddat se dhadak raha tha. Usse apni saansein rukti hui mehsoos ho rahi thi. Uski pareshaani badhne lagi thi. Woh is haalat, is situation mein aakhir ja kahan sakta hai? Rahdari se nikal kar usne lift ka rukh kiya tha. Ground floor par pohanchte hi woh bahar chali gayi thi.

Uski rangat safed par rahi thi. Haath kapkapa rahe the. Halaq khushk ho raha tha. Talashi nazarain idhar udhar bhatak rahi thi. Magar usse Faris kahin bhi nazar nahi aa raha tha.

"Tum kahan ho Faris, please please wapas aa jao."

Uska rukh parking area ki taraf tha. Ujlat mein qadam uthate ab woh uski gaadi ko dhoondh rahi thi.

"…agar tum chahti ho, hamare darmiyan sab theek rahe, toh aindah is maamle mein nahi pado gi tum."

Woh manzar, woh awaaz, woh kefiyat ek baar phir haavi hui thi.

"Tumhe meri feelings ka khayal nahi hai, me tumhe kis baat se rok raha hoon isse tumhe koi farq nahi padhta.."

"Jannat biwi?" Mudhat pareshani ke aalam me uske peeche lapki thi.

Usne muntashir zehan ke saath har taraf dekha. Thakaan se jism ka jor jor dukh raha tha. Gham aur pachtawey mein rooh alag tarap rahi thi. Usse yeh ghalti kyun kar baithi? Usne itne bade imtihan mein kyun daal diya unhein? Ehsaas kyun na kiya?

Zehen ke pardo mein guzrey waqt ke kai manzar phir se ubharne lage. Woh nafratein jo behnon ne dikhai. Woh rawaiya jo khandan ne apnaya. Woh sazaye jo uske liye chun li gayin.

Ek baar phir koi hisaab shuru hone wala tha. Iski ghaltio ka khamiyaza ab koi aur bhugatne wala tha.

Uske qadam ek lamhe ke liye tham gaye the. Bhatakti hui nighaye jis gaadi par thehri thi, woh Faris ki hi thi.

Woh driving seat par tha.

Ujlat mein qadam uthate usne Faris ki taraf ka darwaza khol diya tha. Agle hi pal uska wujood saakht ho gaya tha.

Woh akela nahi tha. Uske daaye baazu mein Rayyan Shirazi tha. Neend se bedar. Aankhein khole. Uske seene par sar rakhe, shirt ko pakde, saja hua sa.

Jannat shock mein khadi reh gayi. Aankhon par yaqeen nahi aaya tha.

Faris ba mushkil se saans leta apni jagah baitha hua tha. Woh uske chehre ko safed padta dekh sakti thi. Usne kis qadar koshish se haath badha kar Rayyan ko lena chaha magar Rayyan ne ek dum se rote hue apna haath wapas kheench liya. Seene mein muh diye rote laga. Jannat ne use Faris se le liya, jise Midhat ne sambhal liya.

"Faris!" Darwaze par haath rakhe, woh tar hotey chehre ke saath Faris ki taraf jhuki thi.

Usne aahistagi se Jannat ki taraf dekha. Uski surkh padti aankhon mein Jannat ne apna aap doobta hua mehsoos kiya. Jo himmat thi baat karne ki, woh khatam hoti lag rahi thi. Jo hausla tha, baat karne ka woh mittne laga. Jis tarah woh usse dekh raha tha, usse laga ke woh khud ko bhi maaf nahi kar payegi.

"Kya mummy?" Uske lab hilay. Woh mushkil se alfaz ada karte toot-ta bikharta lag raha tha.

"Nahi, nahi... Faris!" Usne be-ikhtiyar uske thande padte, kapkapate haath tham liye. Woh ro rahi thi. To wo samjha kuch ho gaya hai usne apni maa ko kho diya hai.

"Woh theek ho jayengi... woh bilkul theek ho jayengi..."

Aankho mein dard liye woh gehri saans leta apni hatheliyo mein sar gira gaya.

"Woh humein chhod kar nahi ja sakteen... tumhein chhod kar nahi ja sakteen. I’m really sorry ye sab ho gaya," usne baazu se pakad kar uthana chaha, toh woh ba mushkil se qadam ghasit ta aage badha.

Rayyan ko uthaye, Mudhat unke peeche thi. Woh Faris ko dekh rahi thi. Kitni mohabbat thi usse Jameela Dawood se, ke sirf judai ke tasavvur se hi woh usse marta hua lag raha tha. Kitne baras beet gaye, kitna bara ho gaya woh, magar jahan Jameela Dawood thi, wahan woh chhota sa Faris hi tha, jise apni poori duniya tareek hoti nazar aa rahi thi.

Rahdari se lift aur phir corridor mein qadam uthata woh ICU mein chala gaya. Yun jaise aankhon se dekh kar tasalli karna chahta ho ke Jameela Dawood ki saansein chal rahi hain. Zindagi se unka taluq khatam nahi hua. Woh unka haath thaam kar un par jhuka hua tha. Woh aansuon se tar aankhon se unhe qareeb se dekh raha tha.

"Mummy..!" Unki aankhe band thi. Unke lab saakht the. Woh uski pukar par foran jawab deti thi, ab nahi de rahi thi. Unka haath uski giraft mein bejaan mehsoos ho raha tha. Dharkano ki nishandahi karti lakeeron mein use zindagi nazar nahi aa rahi thi.

Nurse aur doctor andar daakhil hue toh use bahar jaana pada. Band darwaze ke samne woh balo mein ungliya phansaye khada raha.

Muntazir, ghamon se choor, zakhmo se nidhal...

Jannat uth kar uske paas aa gayi. Bahut narmi se baazu se pakad kar use bench par bithaya. Paani ki bottle haath mein di. Mushkil se chand ghoont liye. Ab woh gehri saansein leta apne aap ko is kefiyat se nikalne ki koshish kar raha tha, jo ek daldal jaisi thi.

"Woh theek ho jayengi." Andar se reza-reza hoti Jannat Kamal ne upar se mazbooti dikhai. Woh mazbooti jo usne apne sajdo aur duaao se li thi.

Woh baitha raha, yun jaise koi awaaz us tak na pohanch rahi ho. Uske andar sab kuch ek dam se tha gaya tha. Na shor, na awaaz. Na cheekh, na pukaar. Jannat uski aankho mein haza ka samandar dekh sakti thi. Uske chehre se karb ki tahreer khoj sakti thi.

Usne Faris ka thanda padta haath apne haathon mein liya. Usne haath nahi jhatka, ghussa nahi dikhaya.

"Sab theek ho jayega... sab theek ho jayega," woh keh rahi thi, woh dohra rahi thi. "Aunty bohot bahadur hain. Woh apni bimari se ladna jaanti hain. Woh jald uth jayengi."

Woh chup raha. Sar jhuka hua tha. Jannat ki giraft uske daaye haath par mazboot hone lagi. Use rona aa raha tha, magar woh zabt kiye hue thi.

"Faris!" Larazti awaaz mein pukara. Kuch toh kahe woh, Usne abhi tak ek lafz bhi ada nahi kiya tha, jaise kuch bolne sunne ki har salahiyat khatam ho chuki ho.

•••

Unke hawas be-daar ho rahe the. Safaid dhund mein roshni ka mubhim sa tasavvur tha. Aawaz mein thi aur madhyam sa shor tha. Shirazi Mansion ka bagh, ghode, taweel rahdariyo mein bhaagte daudte Hammad ka tasavvur. Uski hasi muskaraahat aur phir bhaag kar inse lene ka woh manzar, band aankho par theher gaya.

Woh use dekh rahi thi, use sun rahi thi. Woh ek mukammal family, ek mukammal zindagi ko maazi ke pardo par ek baar phir ubharta hua dekh rahi thi. Woh Hammad, woh ek dum se chhota sa bacha ho gaya. Woh baby cot mein tha. Woh use utha rahi thi. Woh darwaze mein Haroon Shirazi ko khada hua dekh sakti thi. Suraj ki zar-kar roshniyo mein woh manzar. Woh zindagi. Woh sukoon bhare lamhaat unhein waheen kahin muallaq kar gaye.

Woh bas yahin kahin theher jaana chahti thi. Apne bete, apne shauhar ke saath. Apne hi ghar mein. Apni hi zindagi mein. Woh us mukammal tasveer ka ek hissa ban jaana chahti thi.

"Mummy..."

Gird-o-nawaah mein woh awaaz bohot aahista se goonji thi. Unke haath mein painting brush tha. Woh safaid canvas par maharat se samandar ki thaathe maarti lehro ka manzar bana rahi thi.

Manzar badal gaya tha. Ab woh kitchen mein thi. Woh Hammad ke liye sandwich bana rahi thi.

"Mummy, please!"

Woh kushada se kamre mein, carpet par bikhre khilono ko basket mein daal rahi thi. Hammad unke aas-paas hastw hue bhaagta phir raha tha. Woh unki gardan mein baazu daale jhool raha tha.

Haroon coffee ka mug liye khidki ke paas khada tha. Uski naram muskaraahat zindagi ka ehsaas dila rahi thi.

"Woh ek ghalti thi," Haroon keh raha tha.

"Kya?" Woh apni jagah se uth khadi hui.

"Aarzoo se shaadi. Woh ek ghalti thi."

Unke labo ki muskaraahat ek dum se madhoom ho gayi. Khushiyon ke rang, kahin kahin se pheeke aur maand padne lage. Roshniya madhyam hone lagi. Nanhe Hammad ki qelqariyaan khatam ho gayin.

"Kaun Aarzoo? Kaisi shaadi?" Unke lab hilay.

"Aankhe khole mummy..."

Aankhein kholi to unhein apna haath mazboot giraft mein mehsoos hua. Unke haath ki pusht par aansuo ke qatre ubharne lage.

Aur phir manzar badal gaya. Wohi tasveer, wohi zindagi, wohi khwab aur chahat. Woh ek daira tha, baar baar ghoom raha tha. Woh uske wash mein khadi, zindagi ke haseen tareen lamhaat ko jee rahi thi. Woh is daire se ab kabhi nikalna nahi chahti thi.

"Mummy..."

Manzar bas ek lamhe ke liye badla. Deewaro mein daraad nazar aayi. Woh awaaz jo bohot halki thi, woh ek dum se buland hui.

"Aap mere saath aise nahi kar sakti. Aap mujhe chhod kar nahi ja sakti."

Woh Hammad ko seene se lagaye, waheen tehal rahi thi. Ruk gayi. Gardan mod kar adh-khule darwaze ko dekhne lagi.

"Chalein?" Outing ka program tha. Haroon pooch raha tha. Unho ne sar hilaaya.

Wahan koi tha. Unhon ne Hammad ko baby cot mein sula diya. Aahista se qadam uthate hue darwaze tak aayi.

Phir rahdari mein, aur ab woh deewar ke saath lagi band almari ke samne khadi thin.

"Jameela?" Haroon unke peeche aaye magar dikhayi na diye. Hammad ki awaaz bhi kahin gum ho gayi.

Khauf aur haras se bhari hui hazel aankhein, tar chehra, bikhre hue baal, aur apne aap mein simta hua woh bacha...

Woh girne jese andaz mein neeche baith gayi. Shirazi Mansion andhere mein doobta ja raha tha. Woh ek dam se wahan akeli reh gayin.

"Faris!" Aawaz dete hue uthi.

"Faris!" Uski talaash mein woh yahan wahan betaabi se qadam uthane lagi thi. Unhone har ek manzar ko aaine ki satah par ubharte, toot'te aur bikhrte hue dekha. Woh dheemi dheemi siskiya thin jo samaat se takrai thin, aur agle hi pal unki aankh khul gayi thi.

Unhone ek dum se saans kheenchte hue daahine haath ko junbish di thi. Monitor ki beep, doctors aur nurses ki awaaz. Unka wujood bhaari ho raha tha. Unki aankhein dukh rahi thin. Lab kapakpa rahe the. Woh awaaz dene se bilkul qaasir thi.

Jo manzar roshniyo ki zad mein tha, woh aahista aahistagi se tareek hone laga. Unke aas-paas andhere chhane lage. Shor khatam hone laga. Woh sukoon ki wadiyon mein utar rahi thin. Daahina haath abhi bhi kisi ki giraft mein tha.

"Mummy!" Woh unka haath pakre jhuka hua tha. Doosre hi pal woh hosh-o-khirad se begaana ho gayi thin. Phir unhein jaane kitni der baad hosh aaya.

Woh unka haath pakre jhuka hua tha. Kuch keh bhi raha tha. Aankh khuli toh unhon ne labon ko junbish di. Ungliyan mutaharrik hui. Neem tareeki mein Faris ki mojoodgi ka ehsas hua. Gardan moray woh use dekhti rahi.

Unke barabar mein hi kursi par baithe woh waheen so gaya tha. Unka daahina haath pait par dhara tha. Aahistagi se harkat dete uske balon mein haath phera. Neend se kuch chonk kar bedar hotay usne sar uthaya aur phir utni hi tezi se kursi chhod kar uth gaya.

"Mummy!"

Uske baal bikhre hue the, shave barhi hui thi. Shirt ke collar durust nahi the. Rat jage ki gawaahi deti aankho mein bahut sa sar thehra tha. Woh use dekhti rahi, kuch kehne ki himmat na thi. Bas us par giraft barhaye rakhi.

Kuch hi der mein doctor aa gaya. Woh unke sawalat ka jawab sar ki jumbish se de rahi thin. Unho ne apne baaye aur phir daahine haath ki ungliyo ko bhi harkat dene ki koshish ki thi. Unka bed sitting position mein adjust ho chuka tha. Nurse drip badal rahi thi. Faris qadre faasle par hi khada tha.

Phir waqfe waqfe se jitni baar woh neend se bedar hui, unho ne use hi dekha. Woh waheen tha, unke be-had qareeb. Unki khulti-band hoti aankho ko bohut tadap aur intezaar se dekhta hua. Bahut se pachtawo aur aziyato mein ghira hua.

•••

Mobile phone kaan se lagaye Adina apni jagah sadme se gung hui thi

"Kya keh rahe hain aap?"

"Rayyan ka chacha usey le gaya hai."

Woh sofa se uth khari hui thi. Aankho mein be-yaqeeni ka tasur liye. Ek dum se mushta'il hui thi.

"Aap ne kyun le jane diya usay? Main keh kar gayi thi ke Ryan ko main le jaungi."

"Bas kar do, Adina," Tariq sahab, jo is mumkinah surat-e-haal se pehle se ghabraye hue thay, jhunjhla kar bole.

"Bachhe ka chacha hai, hum kaise mana kar saktay thay?"

"Lekin maine aap se kaha tha!"

Tariq sahab ne zabt kar ke apni peshaani masli.

"To kya hum usay mana kar detay? Kis haq se mana kartay ke uski maa ki ijazat nahi hai? Tum to usay apne saath rakhna hi nahi chahti thi!"

Us ne gusse se call hi kaat di.

Usay yaqeen nahi aa raha tha, Faris Shirazi uske bete ko le gaya tha. Yeh sadma tha. Aur yeh sadma uske hawaas par bhaari ho raha tha.

Gehri saans layti hui woh abhi bhi bay-yaqeeni ki si kefiyat mein thi. Jannat ka wahan aana aur phir Faris ka is bachhe ko is ghar se khud le jana. Uska sir nafi mein hila tha. "Aisa kaise mumkin hai?" Aankho mein gussa utar aya. Lab sakhti se bheench gaye thay.

Waqt jaise palat raha tha. Faris Wajdan ke saath guzari gayi zindagi, Hamad se nikah, sab aankho mein aa raha tha. Jis raat Hammad use talaaq de kar gaya tha, usi raat us ne abortion ka faisla kar liya tha, magar agle din shah surkhiyo mein nazar aati uski hadsati maut ki khabar ne uska irada badal diya tha. Apne khusare mein usay bohot bara faida dikhai dene laga tha. Woh Hammad ki aulad ka istemal kar ke is khandan se jud sakti thi. Woh is bache ke zariye poori jaidaad par qabiz bhi ho sakti thi.

Lamho mein us ne planning kar ke tamam hisaab kar liye. Woh is khandan ki jaah-o-hashmat aur amarat se waqif thi. Bete aur potay ka gham liye Azam Shirazi apni nasal ki baqa ke liye usay rad nahi karenge. Woh jo talaq ke gham aur sadmay mein thi, ek dum se halki-phulki ho gayi. Kando se har bojh sarak gaya. Apne flat mein khushi se ghoomti rahi, jhoomti rahi, sochti rahi. Sab uska hoga. Uski aulad ka hoga.

Intezaar ek hafte tak tha. Us ne kar liya. Itwaar ki shaam uska Islamabad jane ka irada tha. Woh Jamila dawood aur Azam Shirazi se milna chahti thi. Nikah, talaaq ke kagazat aur pregnancy ki report, usne sab kaghazat uthaa liye. Kya kehna hai, soch liya. Kis tarah se baat karni hai, tay kar liya. Magar us raat achanak break hone wali khabar ne uske hawaaso par bijli gira di thi.

Hammad Shirazi akelota nahi tha. Haroon Shirazi ka doosra beta manzar-aam par aa chuka tha. Wo sadme se gung aur saakit khadi reh gayi thi.

Woh Faris Wajdan ki tasveer thi jo dikhai ja rahi thi. Woh Faris Wajdan ka hi zikr tha jo har jagah ho raha tha. Apne baap aur bhai ka qatil Shirazi khandan ki aulaad. Uska dimagh ma'of hone laga tha. Chakrakar reh gayi thi. Wohm-o-gumaan mein bhi nahi tha ke aisa kuch ho jayega. Jise sawaliya nishan bana kar chor chuki hai, uska talluq isi khandan se nikal ayega.

Us ne mulaqaat ka irada tark kar diya. Tawajjo khabro par laga kar baith gayi. Faris Wajdan par qatal ka ilzaam lagaya ja raha tha. Usay apne baap aur bhai ki maut ka zimmedar thehraya ja raha tha. Daanto se nakhun kaat'tay, balon mein haath phair'tay, be-qarari se apne kamray mein tehltay, woh poori kahani ko jaise ab samajh pa rahi thi.

Hammad ne usay aise hi nahi approach kiya tha. Woh Faris ki haqeeqat se waqif tha. Uske ilm mein sab kuch tha.

Woh uski khoobsurti nahi thi jo Hammad ko uski taraf layi thi. Woh bhai se mukhalfat thi jis ne Usay mohra bana diya tha. Woh inteqam ke is khel mein bas sirf istemal hi hui thi aur yeh idraak usay angaaro par la raha tha.

Ghalti uski thi. Mansuba uska tha. Hammad Shirazi ne usay talaq ke liye force nahi kiya tha. Abortion ka faisla bhi uska hi tha. Faris Wajdan ke muqable mein, Hammad Shirazi apne khandani status ki wajah se usay behtar laga tha. Woh usay apnane ke liye har had se guzar raha tha. Itne ameer naujawan ki aisi deewangi ke baad, woh aur kya chah sakti thi?

Woh har soorat Faris Wajdan se jaan chhuda kar Hammad Shirazi se shadi karna chahti thi. Usay apni zindagi aish o ishaarat se guzarna thi. Woh aulad ki kisi zanjeer mein nahi jakarna chahti thi. Woh Faris Wajdan ke saath mazeed koi taluq nahi rakhna chahti thi. Woh usay talaq dene ko tayar nahi tha, abortion ke liye bhi nahi.

Rukawat sirf aulad hi thi. Woh aulad jise woh ab nahi chahti thi.

Us raat parne wala thappad bas aakhri hadd sabit hua tha. Woh lamhon mein faisla karti thi, saniyo mein step uthati thi. Usne abortion karwa kar apne raste hamesha ke liye juda kar diye the. Usne har woh rukawat mita di thi jo uske aur Hammad ke raste mein aa sakti thi.

Rukawat khatam. Shadi bhi ho gayi. Magar sirf chheh mah tak uske saath rehne ke baad, Hammad Shirazi ne usay talaq de di thi. Uski planning mein uska wajood bas yahin tak tha. Husn ka jadoo bas jadoo hi tha, zara dair tak asar dikhakar khatam hone wala.

Hammad Shirazi mar chuka tha magar jo maar woh usay de gaya tha, woh usse sambhal nahi pa rahi thi.

"Kaisa lagta hai jab aapko aap jaisa insaan mil jaye?"

Yado ko jhatak kar ab woh laptop screen par dekh rahi thi. Faris Wajdan par apne baap aur bhai ke qatal ka ilzam tha. Nichla lab kaat'te, zehan mein ubharte be-tahasha khayalat ke zed mein ab woh yeh chahti thi ke yeh ilzam sach sabit ho jaye. Faris Wajdan ko saza ho, woh uske raste se hat jaye aur tamam jaidad uski aulad ke hisse mein aa jaye.

Magar jaisa woh chah rahi thi, waisa nahi hua tha. Pehle uski zaat par lagaya gaya najayaz aulad ka shuba door hua tha jab Aarzoo Jahangir aur Haroon Shirazi ka nikahnama public kar diya gaya tha.

Aur uske chand hi dino baad Azam Shirazi ne apni tamam jaidad Faris Wajdan ke naam kar di thi. Usne shadeed gusse mein laptop farsh par de maara tha. Woh paagal ho rahi thi. Jo socha rakha tha, woh ab na mumkin lag raha tha. Zehan mein tarah tarah ke khayalat aa rahe the, gussa aa raha tha.

Usay apne andar gusse aur aag ki wajah pehle samajh nahi aayi thi. Ab aa rahi thi. Faris Wajdan ko chorhne par ab woh be-tarha pachtawa mehsoos kar rahi thi. Jald bazi mein faisla na karti to aaj bhi uski biwi hoti. Hammad ke chakron mein na phasti to aaj sab kuch uska hi hota.

Waqt palat nahi sakta tha. Woh apne maazi ko ab badal nahi sakti thi, magar apne mustaqbil ke liye ab woh haath par haath dhare nahi baith sakti thi. Usay kuch to karna hi tha.

Woh pehli fursat mein Islamabad rawana hui thi. Haath mein nikah ke papers, talaq ke kaghazaat, aur pregnancy reports. Woh puri tayari ke sath ayi thi magar uski mulaqat nahi ho saki thi. Woh baar baar mukhtalif phone numbers try karti rahi, paigham bhijwati rahi, kisi tarah Jameela Dawood ya kisi aur se uska rabta ho sake.

Magar uske muqable mein bhi Faris Wajdan hi tha, uske tamam tar iradon ko khaak mein milata, uske liye Shirazi khandan ka har darwaza band karta hua.

Ab zaroori ho gaya tha ke woh uske shubhaat door kar de. Apni mohabbat ke jaal mein jis tarah pehle phansa chuki thi, waise hi dobara phansa le. Woh uski biwi reh chuki hai, dedh saal ka saath hai. Woh sari ghaltiyo ka malba Hammad ke sir daal degi, maafi maang legi.

Usay daulat, paisa, kuch bhi nahi chahiye, sirf Faris ka saath chahiye.

Usne phone calls aur text messages bheje. Uske office mein gayi. Har jagah uska rasta roka, har jagah aansu bahaaye, wazahat dena chaahi, magar uske haath sirf nafrat aur dhutkaar hi aayi.

Usay apne khasare ka ehsas jaise ab shiddat se ho raha tha. Kuch bhi uske hisaab se nahi ho raha tha. Uski har tadbeer ulti ja rahi thi. Sirf Jameela Dawood se mulaqat hi uski jagah Shirazi House mein bana sakti thi. Ek baar woh Shirazi House mein dakhil ho jaye, faris tak rasai khud hi hasil ho jaayegi. Jameela Dawood apne bete ki aulaad ko kisi taur bhi khona nahi chahein gi. Woh apne bete ki aulaad ke liye unka patch-up bhi karwa sakti hain.

Woh rabte ki koshish mein lag gayi. Qismat achhi thi ke kamyab ho gayi. Phone par unhein sab bata diya, apni reports bhi bhej di. Apne halat bayaan kiye, apne dukh aur pachtawe ke saath roti hui unse baat ki. Unhone call kaat di. Kuch nahi kaha. Woh muntazir rahi. Kuch dino baad, unhone use ghar bula liya. Uski khushi ka koi thikana nahi raha.

Pehli fursat mein hi woh Shirazi House pohanch gayi. Sadr darwaze se andar dakhil hote hi jis pehle shaks par uski nazar pari, woh Faris hi tha. Usay dekhte hi woh apni jagah pathhar hua tha.

Uski aulaad ki jaan lene wali, uske ghar mein, uske samne khadi thi. Jisne uski zindagi ko jahannum banane mein koi kasar nahi chhodi thi. Woh ab gham se nidhal aur karb mein dubi pachtawo ke saath nazar aa rahi thi. Woh tarap kar uski taraf barh gayi. Roti hui maafi maangne lagi.

“Faris! Please... meri baat suno. Main aisa nahi karna chahti thi. Mujhe pata nahi kya ho gaya tha. Hammad ne tumhare khilaf bohot bhadkaya. Main... main bhatak gayi thi. Main aaj bhi tumse mohabbat—”

Shadeed gusse ke alam mein Faris ne intehai nafrat se uska haath jhatak diya. Uski aankhein lahu rang ho rahi thi. Woh saamne thi toh uska gala ghont dena chahta tha. Woh usse ek ek jurm ka hisaab lena chahta tha. Magar jabt se peeche hat te. gusse ko zabt karte hue, usne Agha Ali ko hukm diya ke use ghar se nikal dein.

Tabhi Jameela Dawood aa gayi thi. Unhone Faris ko rok diya.

“Yeh aap kya kar rahi hain, Ammi?” Aankhon mein shiddat aur hairani liye woh beyaqeen sa khada reh gaya.

“Maa banne wali hai,” Jameela Dawood rone lagi. Unki aankhein suji hui thi, chehra utra hua. bete ke gham se nidhal woh barso ki beemar lag rahi thi. Woh Hammad ki aulaad ko khona nahi chahti thi. Woh Adina Zubair ko is ghar me rakhne ke liye taiyar thi.

“ Aap isay jaanti bhi hain mummy?" Uski rage ubhri hui thi.

"Gor se dekhe kon hai ye.."

"Faris" wo sisak padhi.

"Mummy yeh aurat ek barbaadi hai!”

Woh hatheliyo par sar girati sofe par beth gayi. Woh ro rahi thi unka dil phat Raha tha. Unhe apne bete ki yaad aa rahi thi.

"Faris Hammad ne mujhe bhadkaya.."

"Aik lafz nahi" sbke bahut ghusse aur tahammul se apne ghusse ki aag me jhulashte huwe wo uski taraf muda. Uski aankho me shole nazar aa rahe the.

“Kitne paise chahiye tumhein?” uske kareeb pahuch kar sansanati awaz me poocha, uski aankho ka Qaher bhara taasur is lamhe Adina zubair ke reerh ki haddi mein sansanahat dora gaya. Faris ab woh nahi raha tha jise woh jaanti thi.

"Faris, yeh tum kya keh rahe ho? Main yahan is liye nahi aayi!"

"Tumhari keemat bohot aasani se lag jaati hai. Batao, ab kitne mein bikna chahti ho?"

Woh karakht lehje mein poocha gaya sawal, Adina ke chehre par zanaatay daar thappad ki tarah pada. Phati phati aankhon se woh usay dekhti reh gayi. Zillat ki tawaqqa thi, magar wo use uski nazro mein itna gira dega yeh umeed nahi thi.

"Had mein raho!" Be-izzati bardasht nahi hui.

"Had mein tum raho," Faris ne sakhti se baat kaat kar, ungusht-e-shahadat (index finger ) lahrayi.

"Dobara is ghar mein aayi toh main bhool jaunga ke tum ek aurat ho. Phir main tumse tumhare hi hisaab se niptunga," uski karakht awaaz aur tehqiir bhara lehja kaat raha tha.

"Now, get out!" Usne sadar darwaze ki taraf ishaara kiya.

“Bohot pachtaoge tum!” Aankho mein aansu liye, sakht lehje mein kehti hui woh tan-fan karti ghar se nikal gayi. Be-izzati ka gussa ek taraf, apni planning na kaam hone ka dukh zyada tha. Jo kuch socha tha, kisi taur mumkin nahi tha. Faris Wajdan uske har raste ki sabse badi rukaawat tha. Woh is bache ke hote hue bhi kuch hasil nahi kar sakti thi.

Taham, usne bhi inteqaam ka faisla kar liya. Zidd baandh li.

“Achha, agar aisa hai, toh phir aise hi sahi.”

Abortion ka irada ek baar phir tark kar diya. Bache ko duniya mein laa kar Faris ki zindagi jahannum banai jaa sakti thi. Woh uska muqabla sirf is tarah kar sakti thi. Apni tazleel ka badla is tarah le sakti thi.

Woh Islamabad shift ho gayi. Apne aur Hammad ke talluq ko pitch karna shuru kar diya. Elitist class ke logon mein uthna-baithna shuru kiya. Dosti banai, khabrein phailai. Usne kaha,

"Shirazi Enterprises ke CEO Faris Wajdan ki pehli biwi hoon. Talaaq le li thi, kyunke woh tashaddud karta tha. Tabhi mujhe usse chhodna pada. Hammad Shirazi ne meri jaan bachai. Hammad hi ne mujhe sahaara diya."

Woh jitni Faris ki image kharab kar sakti thi, usne ki. Jitni afwaye phaila sakti thi, phailai. Apni shaadi ki tasaveer kisi website par daal di. Khayal tha ke Faris ab usay zarur approach karega, magar woh kisi bhi baat par koi rad-e-amal nahi de raha tha.

Delivery ke baad, woh bacha le kar Faris ke office gayi. Wahan mulaqat na hui toh ghar par gayi. Ghar mein koi na tha. Jameela Dawood ko faalij ka attack hua tha, woh hospital mein thi.

Usne aik mahine ke intezar ke baad, usne rayyan ki tasaveer Jameela Dawood tak bhijwa di.

“woh bura haalat mein hai. Qoh bache ke saath Shirazi House mein aana chahti hoon.”

Ek aur waar, ek aur koshish...

Kamzor hidaaf Jameela Dawood thi. Woh unke jazbaat ka faida uthana chahti thi. Magar doosri taraf bhi Faris Wajdan hi tha, mazboot chataan ki tarah sab kuch rokta hua, Jameela ko uske pohanch se door rakhta hua.

Gumaan tha ke apne potay ki tasaveer dekhne ke baad, woh zarur rabta karengi. Magar unki taraf se khamoshi thi. Ghaliban, woh Faris Wajdan ke samne bebas ho gayi thin.

Us raat jab woh ghar pohanchi, toh usne Haider ko apne flat ke darwaze par khade paya. Uske haatho mein ek bag tha, cheezo se bhara hua.

Itni khatir raqam dekh kar woh chand lamhon ke liye sakte mein aa gayi thi.

"Yeh kaafi hai ya kuch aur bhi chahiye?" Woh khurdre lehje mein pooch raha tha. Woh aankho mein sard mehri ka ta'ssur liye Haider ko dekh rahi thi. Woh jaise Faris Wajdan ki agli chaal ko samajhne ki koshish kar rahi thi.

"Tumhara sahab kya chahta hai? Main logon ko uski asliyat na bataun?"

"Sirf ek hi mutalba hai. Aaj ke baad aap Jamila ma'am se rabta karne ki koshish nahi karegi."

Woh ab bhinch kar usay dekhti reh gayi.

"Aur Hammad ka beta?"

"Faris sahab usse koi talluq nahi rakhe ge."

Woh aankho mein sakhti liye chand lamhon tak usay dekhti rahi. Raqam bohot zyada thi. Inkaar nahi karna chahti thi. Sauda manzoor kar liya. Jamila Daud se rabta karne mein waise bhi koi faida nahi tha. Ab sab mamlaat Faris Wajdan ke haath mein thay. Usne paise rakh liye. Apne do maah ke bache ko apni maa ke paas chhod kar London chali gayi aur bhool gayi ke ek beta bhi hai. Waqfa-waqfa se uski maa ki call aa jati. Woh bache ki wajah se bohot pareshaan thi.

"Main Rayyan ki dadi se rabta karna chahti hoon."

"Iska koi faida nahi. Ryan ka chacha aap ki baat nahi hone dega."

dressing table ke samne khadi apne baal bana rahi thi.

"Tumhare bhai bohot pareshaan kar rahe hain, Adina. Tum rayyan ko apne paas kyun nahi bula leti?"

"Main yahan masroof hoon. Job kar rahi hoon. Bacha nahi sambhal sakti."

Woh bar-bar call kartin aur unka mutalba ek hi hota.

"Main Rayyan ko uske dadhiyal bhejna chahti hoon!" Unho ne faisla kar liya tha.

"Bhejna chahti hain to bhej dein. Lekin yaad rakhe, woh usay maar dega."

Usne is qadar sakht jumla kaha ke woh apni jagah dehel gayi.

"Yeh kya keh rahi ho tum?"

"Usne apne bhai ki jaan le li, bache ko kyun bakhshega?"

Kai dino tak uski maa ajeeb shash-o-panj mein mubtala rahi. Ghar ke halaat kuch tang thay. Bacha beemar tha. Majboor aakhir chhote ke liye rabte ki koshish ki. Apna paighaam ek mulazim ke zariye us tak pahuncha diya. Jumma ki shaam hi darwaze par dastak hui. Bahar siyah gaari khadi thi. Koi shakhs unhein paise dene aaya tha. Mahana kharcha Rayyan Shirazi ke liye uske chacha ki taraf se tha. Unki aankhon mein khushi ke aansu aa gaye. Fori shukriya ada kiya.

Paise ka aana hi tha ke woh ghar jo apni maa par is liye tang pad raha tha ke woh Adina ke bache ko sambhale hue thin, ek dum se kushada ho gaya. Bahuo ka rawaiya acha ho gaya. Bete modab ho gaye. Ab us nanhay se wujood ke liye kisi ka dil tang na tha. Unho ne phone par baad mein Adina se dobara koi shikayat na ki.

Maa ke inteqal par woh Pakistan aayi aur Rayyan se mile baghair hi chali gayi. Uske bhaiyo ne bhi bache ke hawale se koi dabao na dala ke kharcha baqaydgi se mil raha tha, jise ghar wale ab apni shah kharchiyo par udaane lage thay. Gaari khareed li. Furniture badal liya. Tiles lagwa li. Karobar shuru kar diya gaya. Bhaiyo ke halaat badal gaye magar usne palat kar Rayyan ki koi khabar na li. Usay ab apne bache se koi sarokar na tha. Woh apni zindagi mein masroof ho chuki thi.

Aur ab pore ek saal baad woh apni bhatiji ki shadi par bhaiyo ke ghar aayi thi. Vehm-o-gumaan mein bhi na tha ke is ghar mein uski mulaqat Jannat Kamal se ho jayegi.

Jannat Kamal... Faris Wajdan ki doosri biwi. Woh wahan Rayyan se milne aayi thi. Bairooni darwaze se andar baramde mein rakhi charpai par baithe uski nazar jaise hi adina par pari, woh sakte mein chali gayi.

"Yeh... yeh kaun hai?"

"Yahi to Rayyan ki ammi hai," Ruby ne bataya aur Jannat ke hawas par jaise bijli gir pari. Adina Zubair ki aankho mein be-yaqeeni thi. Qadam uthati woh uske sar par pohanch gayi.

"Tum yahan kya kar rahi ho?"

Jannat ke liye wahan khare rehna mushkil ho gaya tha. Woh use koi bhi jawab diye bina sarayyat se qadam uthati ghar se nikal gayi thi.

"Yeh yahan kya kar rahi thi? Kyun aayi thi woh yahan?" Kuch aur samajh mein na aya to mushtail ho kar Ruby par baras pari.

"Woh ji... Rayyan se milne aayi thin."

Adina apni jagah tham gayi. Use apne andar khatre ki ghanti mehsoos hui.

"Kya woh is bache ko apne saath rakhne ko tayar hain?"

Uska sar be-ikhtiyar nafi mein hila. Faris uski aulaad ko bhi kabool nahi kar sakta tha.

"Aur agar kar liya to?"

Saari raat woh bechain rahi. Subah uthte hi usne ghar walo ko apna faisla suna diya. Use zaroori kaam se Karachi jana tha. Rayyan ko filhal woh saath nahi le ja sakti thi, magar wapas aane par woh use apne saath rakhegi.

Uske bhaiyo ko is faisle par aitraaz hua. Bache ko woh apne saath hi rakhna chahte thay. Zara si behas ke baad baat khatam ho gayi thi. Uski aulaad tha, woh use apne saath rakhne ka haq sirf uske paas tha. Woh Karachi chali gayi.

Aisa kaise mumkin tha? Woh shakhs jo usse shadeed nafrat karta tha, uski aulaad ko kaise rakh sakta tha Ho kya raha tha? Yeh kaisi chaal thi jo woh chal raha tha?

Uske liye sabr mushkil ho raha tha. Woh pehli fursat mein Islamabad jana chahti thi.

Woh Rayyan ko apne saath rakhegi. Woh Rayyan ko apne saath London le jayegi. Usne achanak hi faisla kar liya tha.

❏❏❏