Jannat darwaza khol kar andar daakhil hui thi.
Kushida sa VIP room wing, jiske deewar-geer khidkiyo par parde gire huay the. Tamaam sahuliyat se mazeen kamra neem tareeki mein dooba hua tha. Sirf wahi hissa roshan tha jahan Mrs. Shirazi ka ICU bed rakha hua tha. Uski nigahe Farris ki talaash mein mashriqi deewar ki taraf uth gayi thi.
Woh sofa par baitha-baitha hi so gaya tha. Aahistagi se darwaza band karti, woh uske paas hi chali aayi. Lunch box aur purse usne mez par rakh diya. Shaal utaar kar us par phela di. Gardan ek taraf ko jhuki hui thi. Usne bohot ihtiyaat se seedha karna chaha aur uski aankh khul gayi.
Jis tarah se woh jhuki hui thi, ghabrahat ke aalam mein foran se seedhi ho gayi.
Woh aankhein masalta seedha ho baitha.
Baal peshani par be-tarteebi se bikhre huay the. Aankhein soojan ka shikar lag rahi thin. Kalai mod kar waqt dekha. Raat ke nau baj rahe the. Phir sar utha kar use dekha. Woh yahan kya kar rahi thi? Saat baje woh use Rayyan ke saath ghar bhijwa chuka tha.
"Kuch kha lo," woh bag khol rahi thi. Cover paper hata kar burger uske dahine haath mein thama diya. French fries box bhi khol kar pesh kar diya.
Kuch dair tak woh baitha raha. Phir usne aahistagi se ek bite liya, toh usne bag se can ki bottle nikaali. Dhakkan khol kar mez par rakh diya.
Woh uski aankhon mein thakan aur fikar dekh sakta tha. Sharmindagi, pachtawa, dukh... uske chehre par har tehreer nazar aa rahi thi. Woh samne baithi thi, toh iztirab abhi bhi numaya ho raha tha. Usne nazre hata lein.
Woh mrs. Shirazi ke paas kuch dair tak baithi rahi thi, phir woh uske paas aa gayi thi.
"Neeche canteen se coffee le aau?" Woh ab usse pooch rahi thi. Use sardard ki goli toh nahi chahiye? Kisi cheez ki zarurat toh nahi? Woh nafi mein sar hilata khidkiyon ke paas ja khada hua. Goya mazeed kisi sawal ki chahat na thi.
Woh kuch dair tak ungliya masalti baithi rahi. Maafi, maazrat, dukh aur pachtawe.. woh usse baat karna chahti thi, magar kar nahi pa rahi thi.
"Rayyan ki chot kaisi hai?"
Usne chonk kar sar uthaaya. Faris pooch raha tha. Woh uske sawal par lamha bhar ke liye taajjub mein aayi thi.
"He's fine!" usne jawab diya. "Doctor ne kaha uska haath jald theek ho jayega."
Ghar jaane se pehle uska check-up hua tha. Haath par bandage lagi thi. Kaafi khauf-zada tha aur bohot pareshan bhi kiya tha. Abhi bhi woh usse ghar mein bohot mushkil se sula kar aayi thi. Mudhat na hoti, toh woh dobara hospital bhi na aa pati.
Apne sawal ka jawab lekar woh dobara rukh mod gaya.
Woh uski pusht ko dekhti rahi. Ek baar phir dil chaha, uth kar jaaye, uska haath pakre aur baat kare. Maafi hi toh hai, maang le. Yeh jo dari ki aag hai, mit jaayegi. Aur yeh jo ajnabiyat hai, khatam ho jaayegi.
Woh jebo se haath nikalta wapas aa gaya. Usne himmat jama karte kuch kehne ko sar uthaya, aur woh couch se apni jacket aur mobile uthata usi lamhe bhar me room se chala gaya.
Woh aankho mein nami liye, apni jagah baithi reh gayi thi.
Faris Wajdan, Rayyan Shirazi ko ghar mein le aaya tha, magar jo daraar unke beech aa chuki thi, use bharna ab use mushkil sa lag raha tha. Shayad yeh khauf hi tha jo usse pare dhakel raha tha, ya woh dukh jo woh use de chuki thi. Mrs. Shirazi ki is haalat ki zimmedar woh khud thi. Nichla lab kaat-te aankhe masal dali. Jaane kuch theek hoga bhi ya nahi. Uski toh ab baat karne ki himmat bhi nahi ho rahi thi.
Unke hawas bedaar huay toh unhone Jannat ko dekha.
Neelgo roshni mein woh uski aankhon mein aansu aur honto par naram muskaan dekh sakti thin.
"Ab aap ki tabiyat kaisi hai?" Madhum awaaz mein unke gaal par haath rakhte huay poocha.
Unhone aahistagi se sar ko junbish di thi. Aankhein kuch bojhal aur wujood bhaari tha. Nigahain Faris ki talaash mein yahan wahan bhatakti rahi. Jannat ne parde kheench kar hata diye aur unka bed sitting position mein adjust kiya.
"Faris kahan hai?" Naheef awaaz mein mushkil se alfaz ada karte huay poocha. Saari taaqat jaise khatam ho kar reh gayi thi. Na sadma kam tha, na jhatka. Kamzor dil par ye situation be-had bhaari pad rahi thi.
"Bahar gaya hai," jhuk kar be-had aahista se kaha. Jab se unhein room mein shift kiya gaya tha, woh unke saath hi tha.
Side table par nurse unka lunch rakh rahi thi. Jannat paas hi baith kar apne haatho se unhein soup pilane lagi. Saath hi bolti bhi ja rahi thi,
"Zindagi kitni khaali ho gayi hai. Ghar kitna veeran lagta hai. Uska toh ab kahin dil bhi nahi lagta."
"Aap ghar mein nahi hain, toh hum bhi beghar ho gaye hain."
Unki aankhein nam thi. Muskurana chaha, magar muskara na saki. Bohat si baatein yaad aa rahi thi. Faris ka wujood aankhon mein theher gaya tha, uska gussa, uska ishtial. Unhone khushk labo ko tar karte huay aankhein moud li thi. Wo situation tasavvur mein bhi dil par bhaari pad rahi thi.
"Apapko kisi se milwana chahti hoon," lunch ke baad Jannat ne kaha.
Kuch hi der baad darwaza khol kar Madhat andar aayi thi. Usne chhote se bachay ko uthaya hua tha. Unki aankhon mein na-samjhi ka taseer ubhara. Dusre pal hairat aur phir be-yaqeeni ka.
"Ye Rayyan hai. Rayyan Shirazi."
Jannat ne na bhi bataya hota, toh woh pehchan gayi hoti. Woh unke Hammad ka beta tha. Unka dil ek dum se doobne laga. Be-ikhtiyar uthne ki koshish ki, magar uth nahi saki.
Jannat ne Rayyan unke hawale kar diya. Usne safed shorts par asmani rang ki shirt pehni hui thi. Baal saleeqe se jame huay the. Doodhiya rangat... badi badi aankhein jo unki jaisi thi. Usmein unhein Hammad ki shabiha nazar aayi. Uska matha chuma, uski khushboo ko andar sama liya, aur rone lagi.
"Aunty!" Jannat ne fikrmandi se pukara. Rayaan unke seene par sar rakhe, bohot khamosh aur pur-sukoon tha.
"Kaun laya hai isse?" Woh kapkapati awaaz mein pooch rahi thi.
"Faris laya hai," Jannat ne jawab diya.
Samayat par lamha bhar ke liye yaqeen nahi aaya. Dukh aur aziyat unke ang ang mein uttar gayi.
"Aapke liye laya hai."
Rayyan ek dum se rone laga, toh Mudhat use uthaye bahar chali gayi.
Room mein ab mukammal khamoshi thi. Ek aisi tareeki thi jo andar tak uttar gayi thi. Khushi ka ehsaas ek taraf, dil par ek bhaari bojh sa tha. Kuch hi der mein nurse aa gayi thi. Jannat unke paas tab tak baithi rahi jab tak wo apni dawaon ke asar mein so nahi gayi thi.
Jab dobara aankh khuli, toh kamre mein sirf Faris tha. Woh unke paas hi kursi par baitha hua tha. Unka haath apne haath mein liye, unhein dekhta hua. Jaane kab se woh wahan baitha hua tha, intezaar sa karta hua.
Tabiyat mein pehle se kuch behtari thi ke ab woh ungliyo ko harkat de pa rahi thi. Faris ko apne haath par unki giraft barhti hui mehsoos hui. Woh uth kar aur paas baith gaya.
Woh apne bete ko dekhti rahi. Jaane kin toofano se lar kar aaya tha woh. Hontho par kapkapahat thi jo theher gayi. Bohat kuch kehna chahti thi, magar keh nahi pa rahi thi.
"Mummy..." Usne nafi mein sar hilaya, jaise unki aankho mein aansu na dekhna chahta ho.
"Bohat badi qurbani maang li maine tumse," unki awaaz bheegi hui thi. "Bohat bade imtihaan mein daal diya hai maine tumhein."
Usne phir nafi mein sar hila kar unhein aur kuch kehne se rok diya.
"Sab kuch le lein, saare imtihaan, saari qurbaniyan... lekin chorh kar mat jayein mujhe," uski awaaz jazbaat ki shiddat se kapkapa rahi thi.
"I'm sorry beta, I'm really sorry!" Unki awaaz laraz rahi thi.
Usne unke haath apne haatho mein le kar unki aankho mein dekha.
"Kya aap mere liye itna nahi kar sakti? Apni bimari se nahi lad sakti?"
Unhone uske gaal par apna haath rakha.
"I'm sorry, pata nahi kya ho gaya mujhe," woh uske halat dekh kar bepanah sharminda lag rahi thi. Unki tabiyat kharab kyun hui, unhone apne bachon ko pareshan kyun kar diya.
Woh ab usse dekh rahi thi, bohot ghor kar, bohot dukh aur karb ke saath. Woh bavaqt theek lag raha tha, uski aankhein muskurahat ka saath de rahi thi, phir bhi unka dil waham mein gira hua tha. Unhein takleef ho rahi thi.
"Faris!"
"Ji, Mummy?"
Woh ab uski aankhon mein dekh rahi thi, bohot gaur se, sanjeedgi aur fikrmandi ke saath. Woh, jo aksar uske andar ki kahani ko bhamp lete the, aaj nakam ho rahi thi.
"Kya tum theek ho?" Unke lab hilay.
Usne kuch hairan ho kar apni maa ko dekha. Phir asbat mein sar ko jumbish di.
Unhein yeh jawab nahi chahiye tha.
"Kya baat hai, Mummy? Aap pareshan kyun lag rahi hain?"
Unhone kai aansu apne andar utar liye.
"Main apne betay se pooch rahi hoon, kya woh theek hai."
Zardi mayil madhham si roshni mein unki aankho mein aansu numayan ho rahe the. Bohat sabr ke saath pooch rahi thi, bohot dukh se guzar rahi thi. Rayyan Shirazi uske ghar mein tha, uski nazron mein tha. Woh uske dukh, uske karb se waqif thi.
"Agar... agar bohot mushkil ho raha ho, toh tum mujhe bata sakte ho. Main nahi chahti ke mera beta kisi takleef se guzre." Bhaari dil se, be-bas ho kar keh diya. Unki kapkapati ungliyon ki giraft ab bohot mazboot ho gayi thi. Woh unhein dekh raha tha.
"Main theek hoon, Mummy," woh muskara kar bola. Uski muskurahat unki aankho mein bhi nazar aayi.
Magar kaise? Woh theek kaise ho sakta hai? Jis bache ka woh naam tak nahi sunna chahta tha, us bache ko woh ghar mein kaise laa sakta tha? Is tarah achanak kya hua tha? Kya woh unki wajah se is faisle par majboor hua hai? Kya woh ek baar phir kisi azmaish se guzar raha hai? Apne aap ko maar raha hai?
"Tum Rayyan ko le aaye," unke lab hilay. Woh jaise ab samajh gayi thi ke unhein kis baat ka khauf tha, kis baat ki fikr thi. Woh apne aap mein jaise ab thame tha.
Manzar zehan mein ubhar aya. Us raat ki tareeki aankho mein utar aayi. Woh jaan gaya tha ke woh kya soch rahi hain, kya pooch rahi hain.
Kuch dair tak woh chup raha. Ehsaasat ko bayan karne ke liye na to mazid alfaaz the, na koi baat zehan mein aayi.
"Main nahi chahta ke Shirazi khandan mein koi aur Faris ho."
Jameela dawood ki aankho me aansu tham gaye. Woh apni jagah thehar si gayi. Ye jawab sunne ki tawaqqa nahi thi. Itni mukhtasir baat bhi dil par aik gehra asar chor gayi thi. Uska maazi ab unke samne aa raha tha.
"Aap chahti thi ke main use khud le aau... main use le aaya hoon."
Unki palko ki baadh ko phalang kar aansu gaalon par phisal gaye. Lab hilay, magar kuch keh na sakein.
"Woh aap ka hai, aap ke paas hi rahega. Mujhe maaf kar dein ke main aap dono ke darmiyan aa gaya."
Unka dil ek dum se bhari ho gaya. "Nahi, tum darmiyan mein nahi aaye." Unhone nafi mein sar hilaya. "Main ne tumhein chuna tha, main ne tumhare saath rehne ka faisla kiya tha. Main tum dono ko saath dekhna chahti thi." Woh na chahtay hue bhi ro padi. "Main marne se pehle tumhein aur Rayyan ko saath dekhna chahti thi."
"Mommy, please! Aise to mat kahen," woh tadhap kar bola. "Aap mujh se maut ki koi baat nahi karengi," Wazeha kar diya. Magar woh bohot hassas ho rahi thi.
"Mummy, aap phir ro rahi hain," woh fikrmand hua. "Doctor ne aap ko stress lene se mana kiya hai." Unhone aansu saaf karte hue apne aap ko sambhala aur gehri saans li. Farris ki aankhon mein dekha.
"Alhamdulillah!" Unke dil mein ek badi khushi mil gayi thi unhe Jo socha bhi nahi tha, woh ho gaya tha.
"Aap bas theek ho jayein," usne unki aankhon mein dekhte hue unhein taqeed ki.
"Main ab bilkul theek hoon. Mujhe tum abhi ghar le chalo."
Woh dheere se has diya, "Ye kaam to doctor ki ijaazat se hi ho sakta hai."
Woh nam aankhon ke saath muskura kar reh gayi.
â¢â¢â¢
Agle din Jannat aayi to Rayyan bhi saath hi tha. Woh pehle se behtar lag rahi thi. Rayyan ko god mein le kar uska munh choomte rahi, usse baatein karti rahi. Uske haath par bandage lagi thi, thodi par nishan tha, aur peshaani par bhi, is umar ke bachho ko aisi chote to nahi lagti. Uska nanha sa haath pakad kar rone lagi.
Dadi thi, dil jaan gaya tha ke Uska nanihaal me khayal nahi rakha jata, Jannat ne unhein tasalli di, ke Ab to woh ghar aa gaya hai.
Unse baatein karte hue Jannat ne kameeray mein nigahe dodhayi. Faris ka mobile aur wallet wohi tha, magar woh khud wahan nahi tha. woh jab bhi hospital aati thi, woh kahi na kahi chala jata tha.
Mrs. Shirazi se baatein karte karte woh unke paas hi baithi rahi. Jaane lagi to usne dekha ke woh corridor mein baitha nazar aaya. Khidki ke paas, seenay par baazu baandhe, bilkul khamosh.
Woh aankho mein khizan ki nami liye usay door se dekhte rahi. Phir aansu saaf karte hue Rayyan ka haath thaame wahan se chali gayi.
â¢â¢â¢
Jameela Dawood hospital se discharge hokar ghar aa gayi thi.
Woh unhein ghar par milne aa rahe the. Phoolo ka dher tha jo unke kamre mein lag chuka tha. Mehmanon ki khaatir-madarat mein woh din bhar masroof rahi. Sabse aakhir mein Mrs. Usman gayi thi. Unke jaane ke baad Mrs. Shirazi apna parhezi khana kha kar so gayi, toh woh bahar aa gayi. Usne Faris ko kitchen ki taraf jaate dekha, toh uske peeche wahin aa gayi.
"Main khana laga deti hoon."
"Main khud kar lunga," usne sanjeedgi se kehkar cabinet khola aur bartan nikale. Microwave mein pulao garam kiya, plate uthai aur seedha samne sheeshe ki deewar ke paas rakhe sofa par ja baitha. Wahaan se swimming pool aur aaqbi lawn ka wasee-o-areez manzar nazar aata tha.
Woh lab kaat kar reh gayi.
"Chai piyoge?" Kaafi taradud ke baad woh kuch himmat jama karke uske paas dobara aayi. Usne sar utha kar use dekha. Peshani par bal be-terteebi si liye hue the, aur qudrati nam aankhon mein surkh dooriyan nazar aa rahi thi.
"Khud bana lunga," usne jawab diya aur rukh modh kar khana khane laga.
Jannat ne nicha lab kaat kar reh gayi. Khana khane ke baad woh chai bana kar apni study mein band ho gaya. Guzishta kai roz ka yahi mamool tha. Dono ke darmiyan ab koi baat nahi hoti thi. Woh karna bhi chahti, toh Faris nazarandaz kar deta tha. Ghalti uski bhi thi ke usne ab tak apne rawaiye ki maafi nahi maangi thi.
Kuch dair tak woh yunhi be-maqsad rahdari mein ghoomti rahi. Phir coffee banayi aur darwaze par aahista se dastak deti andar daakhil hui. Woh samne hi office table par laptop khole betha hua tha. Us par nazar padte hi uski bhanwein ghair mehsoos andaaz mein sikud gayi thi.
"Mujhe coffee nahi chahiye," Faris ke laptop par ungliyan tezi se mutaharrik rahi. Jannat ne mug uske samne rakh di.
Neecha lab kaat-te huye woh chand lamhon tak uske paas khadi rahi.
"Kya hum baat kar sakte hain?" Narmi se pucha. Jitni der ho chuki thi, ab mazeed nahi karna chahti thi.
"Main masroof hoon," sard sa lehja. Jannat ki himmat khatam hone lagi. Jo alfaaz tareeb de rakhe the, gum hone lage. Jo soch rakha tha, woh bhoolne lagi.
"Sirf paanch minute," minnat bhare lehje mein kaha.
Woh suni ansuni karta raha aur apna kaam karta raha.
"Please, Faris." Kandhe par haath rakha toh usne laptop band kar ke apni office chair ka rukh uski taraf ghuma diya. Seene par baazu baandhe usay dekhne laga. Uski aankhon ka tasur Jannat ko pareshaan kar gaya.
Aisi sard-mehri thi un mein, aur aisa khaali pan tha jaise un mein kabhi kuch tha hi nahi.
"I'm really sorry," Jannat ne kaha.
"Kis liye?" Uska lehja ajnabi sa tha.
"Mujhse jo ghalti hui,"
"Kya tumse bhi ghalti hoti hai?" Uska sard lehje mein pucha gaya sawaal Jannat ke aasab par bhaari pada. Woh lab kaat kar reh gayi.
"Main maanti hoon maine tumhein hurt kiya. Main tumhari ijazat ke bagair..."
"Meri ijazat ke bagair tum mere bhatije ko mere hi zulm se bachaane gayi thi. Ismein yeh ghalti kahan se aa gayi?"
Jannat kamal lajawab ho kar reh gayi. Faris Wajdan ne us ke liye har hijjat aur daleel ka jawaaz hi khatam kar diya. Us ne palkain jhapka kar aankhon ki nami ko chupaya.
"Faris..."
"Mujhe tumhare wahan jane se ab koi masla nahi hai. Pehle tha bhi toh ab nahi hai. You may leave now!" Usne laptop dobara khol liya. Jannat ne aansoo zabt kiye.
"Main maanti hoon, mujhe tum par bharosa karna chahiye tha." Uski awaaz kamzor ho rahi thi.
"Main tumhare bharose ke laayak nahi hoon."
Jannat ko apna dil mutthi mein jakarta hua mehsoos hua.
"Aise ni karo please, main apni ghalti tasleem kar rahi hoon." Muztarab ho kar kaha.
"Jab ghalti thi hi nahi toh tasleem kya kar rahi ho?"
Jannat kamal kuch keh nahi saki.
"Main sirf aunty ke liye wahan gayi thi," lab halke se hilay, himmat khatam ho rahi thi.
"Haan toh theek hai, kya main ab koi shikwa ya aitraaz utha raha hoon?"
Woh aankhon mein nami liye usay dekh kar reh gayi.
"Ab tum ja sakti ho." Woh apna kaam karne laga.
Woh kuch dair tak khadi rahi, phir ahistagi se qadam uthaye study room se nikal gayi.
â¢â¢â¢
Sara din Mrs. Shirazi se unki dosto ki mulaqat hoti rahi. Unka mobile Jannat ke paas tha. Calls woh attend kar rahi thi. Unki sehat yaabi ke tamam paighamat bhi wohi likh rahi thi. Faris ki mojoodgi mein apne aap ko yahan wahan goom karne ki joostju bhi jaari thi.
Raat ki baat ke baad se woh uska samna nahi kar pa rahi thi. Sakhti, sard mehri, aur begangi ka tassur uski aankhon mein aansoo bankar raha tha. Kitni himmat karke woh uske paas gayi thi, aur usne sirf do mint mein sab khatam kar diya. Aisi baat keh di jisay rad karne ko kuch bacha hi nahi.
Ab woh kaise yaqeen dilaye ke woh uske liye ghair aham nahi hai. Usne socha aur dimaag ne ek lambi si charge sheet dikha di.
"Agar woh aham hota toh woh uski baat ko ahmiyat deti, uski narazgi se darti, uska lehaaz karti, jhoot na bolti, planning kar ke na jati."
Sara din woh dukhi aur pareshaan rahi. Shaam mein Mrs. Shirazi ke kamray mein thi jab woh dastak de kar andar aaya. Uski dhadkanein tez ho gayi. Mobile samne karte apni nazrein jhuka gayi.
Rayyan uski god mein sir rakhe apna feeder pee raha tha. Uska baaya haath Rayyan ke balon mein chal raha tha aur doosre haath se typing ho rahi thi. Gahae bagahe woh Faris ko bhi dekh leti. Woh bed par unke paas baitha baatein kar raha tha. Chehre par narami thi, muskaan bhi.
Isi dauran uske mobile par Ayema ka message aa gaya.
"~Maine Faaris bhai ko sorry ka itna bara message likh kar bheja aur unhone mujhe block kar diya." Sath hi roti dhoti emojis moosool hui.
"Mujhe dar lag raha hai Jannat, bhai ko pata chalega toh woh mujhe bohot daantenge."
Usne chupke se uska WhatsApp contact khola ye jaanne ke liye ke kahin woh toh block nahi ho gayi. Usne bhi toh kal raat hi usse baat ki thi.
Sad shukar ke Range Rover ki DP nazar aa rahi thi. Dil ko sukoon sa mila.
Block ho kar zyada dukh hota tha usay.
"Faris bhai ke saath sulah ho gayi?" Usne agla sawal kiya. Unke maamlaat theek ho gaye to talwar uske sar par se bhi hat jayegi.
"Abhi tak to nahi." Usne kuch mayoosi se jawab likha.
"To unhein manao na."
"Kaise manau? Wo ab koi baat hi nahi karta."
"Tum unke liye koi gift lo ya dinner arrange kar lo," usne badi fikarmandi se mashwara diya. Agle hafte wo apne bhai ke paas Dubai ja rahi thi aur chahti thi ke isse pehle hi yeh maamla theek ho jaye. Bhai ko filhal to kuch pata nahi tha magar Faris par kya bharosa. Uske wahan pohanchte hi phone khadkade.
"Gift!" Jannat ki aankhein chamkein.
"Yeh to mere zehan mein hi nahi aya. Mujhe kya lena chahiye?"
"Ab yeh bhi main batau?" Aima ka sard se bhara jawab aya.
"Ghadi, perfume ya phir cufflinks," wo soch mein par gayi.
"Decide kar ke jaldi se unhein raazi karo," Aima keh rahi thi.
"Tum to jaise apne Faris bhai ko jaanti hi nahi ho," Jannat chir gayi.
"Main nahi jaanti? Tum to jaanti thi na. Phir bhi unhein naraz kar diya."
Jannat ke lab bheench gaye. Aima se baat karne ke baad kuch der tak socho mein ghiri wahi baithi rahi. Rayyan Shirazi uske pehlu mein bekhabar so gaya tha. Wo sar jhuka kar usay dekhne lagi. Uske aas paas na koi shor tha, na garmi ki tapish. Usne to doodh bhi sair ho kar piya tha. Usmein koi milawat bhi na thi.
Usay wahan daant bhi nahi par rahi thi aur bache usay tang bhi nahi kar rahe thay. Aur Ruby zara zara si der baad use bhool kar bhagte hue paas bhi nahi pohanch rahi thi.
Jannat usay dekhti rahi. Jitne sukoon se Rayyan so raha tha, wo bhi is lamhe utne hi sukoon se sona chahti thi. Magar uska sukoon aur aaram to Faris Wajdan ki narazi mein hi khatam ho kar reh gaya tha. Gehri saans le kar uth gayi. Rayyan ko mrs. Shirazi ke paas sulakar bahar ayi to Faris study room mein tha. Uske paas jaane ki himmat nahi ho rahi thi. Bar bar uski baatein zehan mein aa rahi thi. Uska ajnabi sard lehja dil mein khauf sa bitha raha tha. Pata nahi sab kaise theek hoga? Wo bebasi se band darwaze ko dekh kar reh gayi thi.
âââ